Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Тема дня

Мордовия Республикань Технопаркть Научно-техническяй советонц заседанияста

ОПТОВОЛОКНАСЬ—МИНЬ НЕФТАНЬКЕ!,—азозе Мордовиянь Оцюнясь В.Д.Волков
Ётай недялять, 13 сентябрьста, Саранскяйса етась Мордовиянь Технопаркть Научно-техническяй советонц заседанияц, коса примасть участия Мордовия Республикань Оцюнясь В.Д.Волков,  РАН-нь академикне Е.Н. Каблов и Е.М.Дианов. Мероприятиясь лемтьфоль оптоволоконнай производствать виияфтоманцты.
Заседаниять ушедомда инголе республикань Оцюнясь и инжихне ульсть Мордовиянь Технопаркть видеса инновациянь проектированиянь центраса, коса содафтсть научно-испытательнай центрань лабораториять мархта. Тяда меле ванфоль промышленнай продукциянь выставкась.
Заседаниясь ушетфоль государственнай казнетнень максомаста. Славань II степенень орденца В.Д.Волков казезе «РТИ» АО-нь генеральнай конструкторть С.Ф.Боевонь, Славань  III степенень орденца казьфтольхть      РАН-нь волоконнай оптикань Научнай центрать научнай руководителец Е.М.Дианов и Санкт-Петербургскяй политехническяй университетть ректороц А.И.Рудской.
РАН-нь академиксь Е.Н. Каблов заседаниять ушедомста китькстазе, што Россиянь Президентсь путсь задача пуроптомс странаса цифровой экономика. В.В.Путин азозе, што лия  странатнень эзда технологическяй лядондомась вяти странать безопасностенц и экономическяй возможностензон киремаснонды, а меле—суверенитетть юмафтоманцты. Кода мярьгсь Е.Н.Каблов, цифровой технологиятнень виияфнемаса оцю васта занци оптоволоконнай инфраструктурась. «Мордовияса ули «Волоконная оптика и оптоэлектроника» Промышленнай кластер. Волоконнай оптикась фкя инь васенце специализациясь Мордовиянь Технопаркса»,—мярьгсь  академиксь.
Мероприятияса азфоль, што волоконнай оптикати пяк ару (высокочистый) кварцевай материалонь производства Россияса мзярс аш. Штоба машфтомс тя материалхнень импортснон эзда странань предприятиятнень ащемаснон, Технопарксь лиссь инициатива мархта панжемс республикать территорияса пяк ару кварцевай материалонь производства аф аньцек Мордовиянь, но и Россиянь волоконнай оптикань предприятиятненди. Тя инициативать мяльс сявозь, РФ-нь Минпромторгть видеса пуроптфоль оптическяй волокнать производстванц виияфтоманц коряс Рабочай группа, коза тяконь лувксса сувась и Мордовиянь Технопарксь.
В.Д.Волков эсь корхтамасонза поладозе, што Технопаркть Научно-техническяй советонц заседаниянц етафтомац—оцю события республикати, вдь тяса сотцеви-шарьхкотькшневи, кодама киге кармай мольфтевома республикать инновационнай сяда тов вииямац.
—Меля республикань Технопарксь сувась странаса вете инь цебярь технопаркнень лувксс,—пара мяльса азозе МР-нь Оцюнясь.—Оцю аськолкс регионть сембе ширде виияфнемасонза удалась тиемс футболть коряс Миронь чемпионатти анокламста. Ламода полафтсь Саранскяйть шамаликоц, строяф лама эсь лацонь объект. И тянкса минь спасибатама странань Президентти».
В.Д.Волковонь валонзон коряс, тяниень пингть эряви лац-ряц шарьхкотькшнемс, кодама путкс может путомс республикась странань наукати. Эрявихть кемокснемс внешнеэкономическяй сотксне. Республикань вятись мярьгсь, што мекольдень кизотнень регионца ламода кассь экспортсь. Улихть сатфкст фармацевтикаса. Нолдаф тевс инь од антибиотиконь пяшксе циклась. А тя оцю аськолкс странать лекарственнай безопасностенц обеспечендамаса. Продукциясь пачфневи Вьетнаму, Германияв и Латинскяй Америкав. Виияфневи вагоностроениясь, ладяфт соткст Кубать и Иранть мархта. Целайнек экспортть коряс Мордовиясь работай 80 страна мархта.
Заседаниять пингста лятфтафтольхть волоконнай оптикаса мекольдень сатфксне. Азфоль, што оптоволокнати тяни пяк оцю вешфкссь. В.Д.Волков азозе, што Мордовияти, конань аш минеральнай ресурсонза, оптоволокнась—тя нефта. Тяда меле МР-нь Оцюнясь кемокстась сотрудничендамать колга Соглашения Россиянь кластерхнень и технопаркнень виияфнемаснонды содействиянь Ассоциациять директоронц А.В.Шпиленконь мархта, а «Технопарк-Мордовия» АУ-сь кемокстась Соглашения М.Ф.Стельмахонь лемса «Плюс» НИИ-ть мархта.
О.Евдокимова.

20.09.2018 №37
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин