РЕГИОНАЛЬНАЙ ЛЬГОТАТНЕ ПЕНСИОНЕРХНЕНДИ ВАНФТОВИХТЬ

17 сентябрьста Саранскяйса Мордовия Республикань Государственнай Собранияса ётась Мордовия Республикань котоце созывонь Государственнай Собраниять комсь котувоце сессияц. Работасонза примасть участия МР-нь Оцюнясь В.Д.Волков, правительствань члеттне, министрхне, организациянь и ведомствань вятихне и лият. Вятезе сессиять Мордовиянь Госсобраниять Председателенц заместителец В.В.Алёхин.
Котоце созывонь Государственнай Собраниять комсь котувоце сессиянц шинь повестказонза сувафтфтольхть вете кизефкст. Тяконь лувксса, примафтольхть полафткст «О мерах социальной поддержки отдельных категорий населения, проживающего в РМ» Мордовия Республикань законти. Законопроектсь аноклафоль и лихтьфоль парламентарийхненди ваномс Россиянь Президентть В.В.Путинонь рекомендациянзон мяльса кирдезь.
Законопроектть юроц сянь эса, штоба ванфтомс пенсиять ладяманц мархта сотф региональнай льготатнень граждаттнень мельге, конат юмафтолезь ба тя правать пенсияс лисема пингть касфтомста. Тяниень пингть республикаса пенсионерхнень, трудонь, военнай службань ветераттнень пенсияс лисемстост (аватне 55 кизоса, алятне 60 кизоса) ули правасна получамс социальнай лезксонь тяфтама мерат: пенсионерхне 144 цалковаень питнеса весть пандозь  транспортса ардоманкса  карьхценди, ошень транспортса питнефтома арнеманкса соцкартань получаманкса права. Трудонь, военнай службань ветераттнень—290 цалковаень питнеса единовременнай пандома, соцкартать коряс ошень транспортса питнефтома арнеманкса права, эряма васттнень инкса и коммунальнай услуганкса пандоманди карьхцнень 50 процентонь лувксса эрь ковонь ярмаконь компенсациянь получаманди права.
Колмогемонь кафксува депутаттнень эзда колмогемонь сисемсь максозь вайгяльснон сянкса, штоба ванфтомс ня льготатнень вяре азф кизотненди (аватненди 55 кизоса, алятненди 60 кизоса), од срокс коре пенсияс лисемозост. Стане жа региональнай льготатне ванфтовихть граждаттненди, конат юмафтозь тряйснон, ломаттненди, конат аф 25 кизода кржас заняфтольхть педагогическяй тевса, а стане жа сятненди, кит работасть велень и ош лаца поселкань здравоохранениянь учрежденияса аф 25 кизода кржас и аф 30 кизода кржас—ошень здравоохранениянь учрежденияса, театрань актерхненди (кинь стажец аф 15-30 кизода кржа), ломаттненди, конат работасть Крайняй Северса аф 15 календарнай кизода кржас.
Азомок эсь мялензон пенсионнай законодательствати полафткснень коряс, Мордовиянь Оцюнясь В.Д.Волков мярьгсь: «Владимир Владимирович Путин мзярдовок аф примси аф арьсеф решеният. Тя мезтьке Президентсь азозень эсь предложениянзон сяда меле, кода лац-ряц содафтсь странаса ситуациять мархта, сявомок мяльс региоттнень эса пенсионнай законодательствати азф полафткснень, тяконь лувксса, сявозень мяльс и минь республикасонк азф предложениятнень. Президентть сембе предложениянза водендафт сянкса, штоба пенсионнай реформась ёталь сяда тёждяста». В.Д.Волков китькстазе, што тяниень пингть сембе вийхне водендамат сянкса, штоба кафтонь-крда кирьфтамс странаса ашушить, касфнемс пенсиятнень и панчсемс од рабочай вастт оттненди и пенсиянь карша кизоса ломаттненди.
Сессияса ванфтольхть и лия кизефкст. Тяконь лувксса, кочкафоль Мордовия Республикань Государственнай Собраниянь представитель МР-нь Адвокатскяй палатать видеса квалификационнай комиссияв. Тяфтамокс арась юридическяй наукань кандидатсь А.А.Чебуренков. Тяда башка, сессиять пингста максфоль удостоверения МР-нь Госсобраниянь одс кочкаф депутатти В.В.Руженковонди.