Международнай экспедицияда мельдень интервью

Сире Теризморгань Национальнай культурань центраса
 Музеень секторть заведующаец, Славань орденонь кавалерсь Н.М.Кадерова:
«НАЦИОНАЛЬНАЙ КУЛЬТУРАТЬ ВЕЛЬДЕ ВАНФТОВИ И ВИИЯФТОВИ МОКШЭРЗЯНЬ НАРОДСЬ»
—Нина Михайловна, мезсь тусь мялезт «Волгась—ялгаксшинь ляй. Волжскяй нароттнень культураснон диалогсна» Международнай этнокультурнай экспедицияса-фестивальса? Мезсь, койсот, тоса няйфть и кульфть эзда кондясти тейть мокшэрзянь национальнай культураса сяда товолдонь тефнень анокламста и тиемста?
—Мокшэрзянь национальнай культураса мон работан кунара ни—нильгемонь котува киза. Комсь ветие кизотнень эздост мон лемдине Сире Теризморгань Национальнай культурань центрати, коса покодень директоркс. Эрь кизоня Национальнай культурань центразонк Мордовияста и Россиянь лия региоттнень эзда, а тяфта жа ичкоздень и маластонь омба масторста сашенды комсь тёжяньда лама инжи.
Тяка пингть, койсон, фалу пара васьфнемс ся ломаттнень мархта, конат тяфта жа работайхть национальнай культураса, и кулемс ширдест мезевок одня. Сяс, мзярда тердемазь Международнай этнокультурнай экспедицияс, мон пара мяльса срхкань кис. И ашень эльбяде. Тяддень экспедицияса ульсть культурань лама работникта, конат покодихть Мордовияса и Россиянь лия региоттнень эса. Да и сонцьке этнокультурнай экспедициясь, койсон, пцтай марнек ульсь лемтьф национальнай культурань кизефксненди. Сяс тяса ульсь мезе азондомс и ульсь мезе кулемс.
Мярьктяма, «Культурась—государственнай национальнай политикать инь оцю тевоц» форумса, кона ётафтовсь этнокультурнай экспедицияса, мон азондонь пуромфненди Сире Теризморгань Национальнай культурань центрать работанц и сонь сатфксонзон колга. Тяфта жа тусть мялезон «Мокшэрзянь модать талантонза» лем ала народнай промыслань и ремеслань выставкась-презентациясь, «Финно-угорскяй мирсь журналистонь сельмоса» семинарсь, «Россиясь—минь кудоньке» лем ала финно-угорскяй фотожурналисттнень выставкасна и Международнай этнокультурнай экспедициянь сембе мероприятиятне, конат лемтьфтольхть мокшэрзянь и финно-угорскяй лия народонь национальнай культуратненди.
Сяс тячи ули кода азомс: Международнай XVII этнокультурнай экспедициясь-фестивальсь тейне казсь сатомшка оцю и од рабочай опыт, кона, конешна, пяк кондясти национальнай культураса од тевнень анокламста и тиемста.
—Сире Теризморгань Национальнай культурань центрать тевонза лац содафт аф аньцек Мордовияса и Россиянь ламоц региоттнень эса, но и омба масторса. Но сяка, Нина Михайловна, тейнек пара улель содамс: Центрать кодама тевонзон колга тон азондоть Международнай этнокультурнай экспедицияса?
—Международнай этнокультурнай экспедицияса ульсь сатомшка лама ломаньда, кит сашендсть минь Центразонк. Сяс «Культурась—государственнай национальнай политикать инь оцю тевоц» форумса мон васенцекс пачфтине: Сире Теризморгань и Мордовиянь Национальнай культурань центратнень марстонь инь оцю сатфкссна ащи вов мезьса—минь, мокшэрзятне, лоткаме виздемда мокшень и эрзянь кяльса корхтаманьконь. И тя сатфкссь фалу кармай эждема монь ваймозень эса.
Тяфта жа мон лотксень  мокшэрзянь кунардонь пингонь койхнень лангс, конатнень ванфтоманкса и виияфтоманкса минь Центраньке путни лама вий. И, конешна, национальнай культурань сфераса лия покодихненди кондясти минь рабочай опытоньке, конань колга мон сатомшка келиста азондонь.
Кепотьксонди, азондыне, кода минь минць тиенттяма мокшэрзянь кунардонь пингонь щапт, кода тонафтсаськ мокшэрзянь Национальнай культурань ня и лия тефненди иттнень кружокса, кода ванфнесазь и виияфнесазь мокшэрзянь моронь морамань койхнень «Лаймоня» идень фольклорнай ансамбльсь и Мордовия Республикань Государственнай премиянь лауреатсь, Сире Теризморгань народнай хорсь.
Ня и лия тевоньке, конатнень колга мон азондонь Международнай этнокультурнай экспедицияса, надиян, арайхть рабочай козя опытокс мокшэрзянь и национальнай лия культураса покодихненди, кит ульсть тя форумса.
—Кодама соткст эсь тевонтень вятемста тинь кирттяда финно-угорскяй народонь лия организациятнень мархта?
—Минь кирттяма кеме соткст финно-угорскяй народонь национальнай культурань центратнень мархта кода Россияса, стане и омба масторса. Аф стак вдь Сире Теризморгань Национальнай культурань центраса инжикс ульсть Россиянь Президентсь В.В.Путин, Финляндиянь ся пингонь Президентсь Тарья Халлонен и Венгриянь эстонь премьер-министрсь Ференц Дюрчань. Сяс ялгаксшинь сотксне финно-угорскяй народонь организациятнень мархта, конат покодихть национальнай культураса, ладявсть сатомшка тёждяста. Нят—Финляндиянь «Кастронень обществац», Венгриянь Художественнай академиясь, Эстониянь Таллиннскяй Художественнай академиясь, Мордовиянь Национальнай культурань институтсь, Народнай творчествань кудсь и лия организациятне, конатнень мархта минь тиенттяма марстонь фкя оцю тев—ванфттама и виияфттама эсь народоньконь национальнай культураснон эса.
—Нина Михайловна, кода содаф, сатомшка оцю лезкс Центрати тевонзон тиемста тяфта жа макссихть Сире Теризморгань эряйхне.
—Тя афкукс тяфта. Велесонк тячи эряй 780 ломань, конатнень эзда сядось тонафни школаса. И мзярда эрявксни—сембе велесь примси участия мероприятиясонк. Мярьктяма, мзярда «Мир» телеканалсь Сире Теризморгаса тись программа мокшэрзянь кунардонь пингонь койхнень колга, массовкаса ульсть сембе велеряйхне. Тяфта жа улендсь сембе лия оцю мероприятиятнень эса.
Надиян: сяда товга кармай тяфта. Сяс мес аньцек мокшэрзянь национальнай культурать ванфтоманц и виияфтоманц вельде ванфтови и мокшэрзянь народсь!
—Нина Михайловна, удалаза сембе арьсефонте.
—Сюкпря пара валонкса. Карматама работама.

В.НЕСТЕРОВ.