Н.Б.Голенковонь творческяй илядьстонза

СОНЬ ЯЛГАНЗА—СОНЬ КОЗЯШИЦ
12 сентябрьста Саранскяйса А.С.Пушкинонь лемса Национальнай библиотекать Актовай залсонза ётасть Мордовия Республикань Заслуженнай писательть, Мордовия Республикань Государственнай премиянь лауреатть, мокшень содаф прозаикть Н.Б.Голенковонь 60 кизонь топодеманцты лемтьф «Монь ялгане–монь козяшизе» юбилейнай творческяй илядец и «Весяла ёфкст» книганц презентацияц.
Вятезе пуромксть А.С.Пушкинонь лемса Национальнай библиотекать главнай библиотекарец В.И.Пронина.
Васенцекс юбилярти лямбе валхт азсь Мордовия Республикань Государственнай Собраниять Председателенц заместителец И.М.Москаев. Иван Михайловичень валонзон коряс, сон содасы Николай Борисовичень пяк кунара. И тячи оцю мяльса примай участия юбилеенцты лемтьф илядьса. И.М.Москаев поздравляндазе писательть республикань Государственнай Собраниять депутатскяй марнек корпусонц эзда. Тяда башка, лувозе телеграммать, кона сась Н.Б.Голенковонь лемс Российскяй Федерациянь Государственнай Думань депутатть А.Н. Грешневиковонь эзда, конань мархта лама кизода инголе Николай Борисович тонафнесь Ленинградскяй государственнай университетса.
Сяда тов юбилярть поздравляндазь Саранск ошень округонь администрациянь Социальнай политикать коряс Департаментть культурань Управлениянц межнациональнай и межконфессиональнай отношениянь кизефкснень коряс отделонц заведующаец Е.В.Щукина, Мордовия Республикань Образованиянь министерствань общай образованиянь отделонь Главнай специалистсь Н.В.Салмова, Мордовскяй (мокшень и эрзянь) народть Межрегиональнай общественнай организациянц Исполкомонц председателец профессорсь А.С.Лузгин, Саранск ошень 20№ гимназиять директороц Р.К.Аюпов, «Мокша» журналть главнай редактороц В.М.Лобанов, «Якстерь тяштеня» идень журналть главнай редактороц В.И.Брындина, ламотне лиятне.
Актовай залу пуромфнень ёткса ульсть школаса тонафнихть. Николай Борисович кирди кеме соткст мархтост, ноляй теест дневникт, тяштьфонц эзда ламось иттнень колга и лемтьф шабатненди. «Весяла ёфкст» книгац, конань презентацияц ульсь библиотекаса, тяштьф теест—стирнятненди и церанятненди.
Тяда башка, юбилейнай творческяй илядьс сашендсть национальнай СМИ-нь  журналисттне, М.Е.Евсевьевонь лемса Мордовскяй государственнай педагогическяй институтонь филологическяй факультетонь преподавательхне и студенттне, Н.Б.Голенковонь творчестванц кельгиенза и содаенза.
Корхтайхне башка мяль шарфтсть сянди, што Николай Борисовичень юбилеец теест кода мала ломанень юбилей, а лувись сонь содасы кода прозаиконь, поэтонь, юмористонь... Кепотьксонди, Н.Б.Голенков машты пеетькшнема-сингоряма, но аф обжазь, а тя или тона прябалать няфтезь.
Сон сидеста сувси «Якстерь тяштеня» идень журналу, «Мокшень правда» газетав,—изданиятненди, конатнень эса работасть ламонь киза, коса сонь кода оцю инжиень учсазь коллектифне.
А.С.Пушкинонь лемса Национальнай библиотекать главнай библиотекарец В.И.Пронина тись электроннай презентация, кона лемтьфоль писательть эряфонцты и творчестванцты. Н.Б.Голенковонь произведениянза ванфтовихть тя библиотекаса, теест оцю вешфкссь лувихнень ширде.
Пуромксса аф весть азфоль, што писательсь—пара вайме, ляпе седи, вельф скромнай ломань. Машты сембонь мархта марстонь кялень мушендома.
Н.Б.Голенковонь валонзон коряс, несколька кизода меле сонь ули нинге фкя юбилеец—топоди ведьгемонь киза творческяй кинцты. Инголе сонь оцюфт планонза.
Т.АЛЬШИНА.