Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

МАЗЫХТЬ МОКШЕНЬ СТИРЕНЬКЕ

Мокшень стирьхнень мазышиснон колга нинге кунардонь пинкнень тяшнесть мянь омба масторонь учёнайхне. Тянивок ширезонк сашенды инжихне шарфнихть мяль аф аньцек шама путксс, ронгс-пондс коре мазышиснонды, но и шнашендсазь синь эрь кодама тевса асуснон, машты кядьснон. А кодама дивандай сельмованф прафнихть стирьхнень мокшень щамснон-карямснон лангс! Сембе тя мазышить ули кода няфтемс, а лувихненди няемс газетасонк азф конкурсса, кона мольфтеви аф фкя киза ни. Лятфтасаськ, што конкурсса участвондаманкса стирьхненди эряви тифтемс снимкат мокшень щамса и кандомс синь редакциязонк или кучемс почтать вельде. Фотографиятнень стане жа ули кода тифтемс фотографоньконь кядьста. Кда эвондайхть кизефксонте, гайфтеда 24-57-73, 24-57-03, 24-57-90 телефоттнень коряс.
А тяни пара мяльса содафттядязь тячиень участницаньконь мархта.
Мокшень стирсь Марина Маркина шачемас-касомас коре Атюрьевскяй райононь Мокшень Козловка веленне. Семьяса Марина кассь брадонц мархта кафонест. Василий тяниень пингть служай армияса. Анна Васильевна и Анатолий Иванович Маркиттне старандасть ёмластокиге касфтомс идьснон трудонь кельги, тевда-работада аф пели ломанькс. И теест тя, эряви азомс, удалась. Маркиттне куд пирьфсост фалу кирнесть лама жуватада, а стирьсна-цёрасна шабакскиге лезнесть мельгаст якамаса. Перень-садонь тефневок тонадовсть теест пяк рана. Шабрасна сяка-тев дивандакшнесть ёмла Маринанять лангс: курмозьс тяльги шабаня, мярьгихть, модамарень, помидорань нетькснень ёткстовок аф няеви, а стама отькорьста панденятнень эса кочки, оцю ломанти тяфта аф сафтови. Кудботмонь урядайське фалу Маринасель.
Школаса тонафнемась ма-кссевсь Марина Маркинати тёждяста. Эрь предметть коряс аньцек «нилет» да «ветет» сявондсь. Сяда кельговикстольхть теенза мокшень кялень и литературань урокне. Кода азозе сонць стирсь, сон пяк кельгсы родной кяленц и пяк пичеди сонь ванфтоманксонза. Марина аф шарьхкотькшнесыне ся ломаттнень, конат виздихть эсь кяльсост корхтамаснон, сепондсазь национальностьснон, а аньцек лисихть велеста ошу, эстокиге рузыяйхть. Аф тяфтамотнень ёткста тячиень героиняньке. Седисонза оцю толкс юрнай марнек минценнети кельгомась. И тянди, шарьхкотьф, оцю путкссна шачфтыензон-касфтыензон, конат ёмластокиге тонафтсть эсонза эсь народонц, шачема масторонц кельгома.
Марина Маркинась оцю мяль шарфни мокшень    поэттнень и писательхнень творчестваснонды. Кельгсыне мокшэрзянь народнай сказительницатнень Ф.И.Беззубовать и Е.П.Кривошеевать произведенияснон. Школаса тонафнемста Марина аф весть примсесь участия мокшэрзянь литературать коряс районнай олимпиадатнень эса и лисендсь сяськихнень ёткс.
Тяниень пингть М.Маркинась тонафни Н.П.Огарёвонь лемса МГУ-нь филологическяй факультетса. Тядде сон ётась омбоце курсти. Стирть мялец улемс учителькс, тонафтомс шабатненди мокшень кяль и литература.
Тонафнемада башка тячиень героиняньке кельгсы шра лангонь теннисса налхксеманц, мезсь сонь лисенди аф кальдявста. Марина примсесь участия спортонь тя видть коряс факультетскяй пялькстомаса и занцесь призовой вастт. Ётка пингста Маркинась пара мяльса кярьмотькшни сюреса сёрмадомати и рисавамати.
Стирть пяк мялезонза Саранск ошсь. Ялганзон мархта кельгсы улендемс А.С.Пушкинонь лемса культурань и ваймамань паркса, а стане жа «Мордовия Арена» од стадионть маласа.
Марина Маркинать мархта содафтомста эстокиге шарьхкодевсь, што сон пара вайме ломань. Удалаф, отькорь, сельмосонза палыхть весяла цятконят. Арьсетяма мокшень стирти, штоба сон сяда товга лядондоль тяфтамокс. Катк пяшкодевихть сембе мяльхне-арьсематне, Марина!
О.ЕВДОКИМОВА.

20.09.2018 №37
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин