Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     

 
 

 

Юмор и сатира

НОГАЙ АННАТЬ ИЛАЦ

 
Ногай Аннась—сире стирь. Одстовок ни нармонель, лиенделезень сембе шабра велетнень, фкявок радня афоль кадонда. Недялянь пиравакшнель. А сиредембяльхть ёфси кольсь-каладсь. Хуш и монашкакс тиенди, но зарниктонга зарник. Калмама и поминкас якай кода свадьбас. И морафнема кулыень кудс тернесазь, и явсекшнема, и шары бабакс. Срхкай шобдава ой да вай. Тиенди сире сяряди ломанькс. Мярьгат, щас сонць боком веляй. Аф пачкодян, кле. Кие алашаса инксонза сай, кие машинаса. А меки ськамонза сай, вельф комляв. Ульцяти аф тяльги. А сонць, ков саты вайгялец, морай:
Копордаван, мораван,
Праян, боком велян,
Киндивок аф тораван,
Кидовок аф пелян.
—Ха-ха-ха,—ктордыхть Гуже веленянь аватне.—Ся кие, шта, тоса пешкоткшнись?
—Содаф ни кие, Ногай Аннась калмама вастста сай. Мамась пеконь аф ужяльдезь и аньцек морси, ужялясы-ризфнесы кулофть.
И видекс, аш теенза кизот-тялот. Сидеста кудозонзовок аф пачкоди, прай киньге кудонц инголи. То фкясь вятьсы куду, то омбоцесь.
—Аф бабакс, Анна, тиендят,—сюцихть эсонза ялганза.—Кали тейть тяшкава симомаль?
—Васькафтовонь ни, афи содаса месендень.
Весть прась Мичке Манять кудонц инголи. Сумкац вакссонза. Шабатне таргазь штатолонзон, пезфнезь шуварти, крьвястезь и кармасть перьфкаст шарондома, хоровотт вятнема. Финцне ктордыхть, омбонцне сюцихть иттнень эса. А сонць Ногай Аннась кятавгодомда меле тусь кудгаст, пеняцякшнема.
—И аф визькс тейть, Анна,—сюцесть эсонза шабатнень бабасна.—Тонць боком, шабатне штатолхнень шуварти пезфнезь. Грехсь конашка.
—Васькафтовонь. Вийнень ашесть сата. Пцтай каршезон пачкодень, а куду ашень сував.
Кой-кона велетнень эса калмамда инголе ушнихть банят, коза тернесазь паряма-штама покойникть раднянзон, штоба сят ару ронгса, ару ваймоса прважалезь мала ломаньцнон тонашис, лия эряфс. Кодама баня монашкафтома. Тердезь паряма и Ногай Аннать. Ся васенда сельмонь таргоземс явсекшнезе покойникть, тоса морафнесь вельхкссонза. «Кяжиняфтома» ашель кода. Сонць кельгозе покойниксь. А кда тяфта, пялонза сайхневок каванямат, ату кяжияй кулофсь, аф мусы тонашиса вастонц.
Тусь бабась баняв, а меки сама аш.
—Кальдяв афоль тие,—мярьгсь кие-бди удавати.—Ату гастясы баняцень Ногай Аннась да калмафтсазь нинге кядьстот.
Мольсь азоравась ваномонза. Монашкась озаф баня киякскяти и морси сиде моронят:
Монць андса эсь пекозень,
Шкайть пильгс сюконян.
Сатыхть покойникне
векозон,
Хуш монцьке сиренян.
Лияста можналь аньцек рахамс Ногай Аннать лангса. А тяни Сёмарясь обжавсь.
—Мезе тетьксесак кргапарьцень! Урядафт банястон! Сёмазе нинге эзем лангса, а тон морсят.
—Простямак, Сёмарясь. «Сяпинясь» гастямань.
—Сяка архт куду, ваймак вандыс. Ату кие вастозот морафнема кармай.
—Видеце. Аньцек вятемак. Монць афи пачкодян.
Ульсь и тяфтавок. Пингсь сёксель, кельмоль. Ногай Аннась сась калмама вастста. Куду ашезь пачкоде, прась кудонц инголи рдазти. Сяка Сёмарясь и сувафтозе куду:
—Тон месть, Аннакай, эсь кядьтот пря ёрат юмафтомс, кельме ульцяса вдь.
Каршек мезевок ашезь отвеча. Арась ломаненди, сась спасибань азома.
—Но идить, Сёмарясь, эряфозень. Кулан, мярьгонь, тязк. Курок шачема шизе, тертте илас.
—Аф эряви илацевок. Сиренят ни, ванфтк сяда пряцень, тяшкава тят мама.
—Аф ламня и копордань. Мярьгонь, пачкодян куду. А сон, няк кода лиссь.
—Бабати лама што ли эряви.
Кирдезе валонц Ногай Аннась, тердезе шачема шинь илас Сёмарять. А ся ашезь атказа.
—Лама ломаньда тердят илас, Аннакай?
—Саят и няйсак.
Сёмарясь анокс содазе, кодама бабань илась. Но честь сиреняти путсь. Аноклась казне, сявсь сюлеканявок.
—А косот инжихне, Аннакай?—кенкшень панжемста кизефтезе авась.
—А минць аф саттама, што ли?
—Саттама, конешна.
Венептезе казненц. Сюлекать путозе шава шранц лангс. Сиренясь путсь фкя стопка. Панжезе сюлекать. Фкя стопканя нюрьхтясь, нилезе, омбоцеть нилезе.
—Вов ладясь, шачема шинкса. Пря потмозевок панчсь.
—А мес тейне аф каят эсь винанястон?
—Ожу, кенерят, шра аноклан.
—А мезе илань шрацти аноклать?
—Сараз печконь, путыне пима.
—Ся саразсь омботтивок аф пий.
—Вдь аф эряскодат, Сёмарясь?
—Мон ни арьсень тонь видексонь ила, а тяса…
—Мезе ина… Ожу-ка, нинге фкя стопканя нюрьхтян.
«Ха-ха-ха» рахазевсь Сёмарясь.
—Учсаськ саразонь пиматьке. Ату кодама ила саразонь палняфтома.
А меле Сёмарясь ашезь кирде, ушедсь морама.
Аннаказе тердемань,
Тячи шачем шиц.
Шра лангоняц шава,
Аяш нльне кшиц.
Сёмарясь стясь и тусь куду.
—Тон коза?—пешкодсь мельганза Ногай Аннась.—Тяни ни пий саразсь, тняра учеть.
—Сай шачема шистот сивсаськ,—отвечась конаксь.—Снярс, пади, пий.
—Ну, воляце, Сёмарясь, тят кяжия. Ёрань кода цебярьста.
—Аф кальдяв лиссь, Аннакай, илаце, пяк весяла. Одувок тяфта тик.
Илья ВЕШКИН.
 

20.09.2018 №37
 
 
 

 
НОВОСТИ
 
 
 
 
 
 

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019  № 14
 

1 апрельста ушедсь 2019 кизоть омбоце пяленцты газетас и журналс сёрматфтомась

11.04.2019  № 14
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин