Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     

 
 

 

Тема дня

Мордовиянь Национальнай банкть юбилеец

Ётай недялять, 28 сентябрьста, И.М.Яушевонь лемса Государственнай драматическяй театраса ётась торжественнай собрания, кона лемтьфоль Россиянь Банкть Мордовскяй подразделениянц пуроптомста 100 кизонь топодемати. Пуромксса примась участия Мордовия Республикань Оцюнясь В.Д.Волков.
Республикань вятись отмечазе, што сембе пинкнень Национальнай Банкть отделенияц путнесь и путни оцю путкс регионть социально-экономическяй виияфнеманцты, примась активнай участия од типонь банковскяй системать строямаса: советскяй образецонь ярмаконь знакнень полафтомаса, расчетонь электроннай технологиять тевс сувафтомаса, вкладонь страхованиянь системати банкнень сувамаса и стак тов.
В.Д.Волков азозе, што мекольдень кизотнень республикаса кассь макссеви кредиттнень лувкссна. Тяфта, тяддень сисем ковста Мордовиянь эряйхненди максф 71 миллиард цалковайда лама кредит, мезсь 44 процентта сяда лама мелянь кизоть коряс. Ня средстватнень оцюшка пялькссна нолдаф Мордовияса эряфс етафневи инвестиционнай оцю проекттнень финансировандаманкса. Юридическяй лицатненди и предпринимательхненди максф кредиттнень пялесна нолдафт обрабатывающай производствань сферати, колмоцекс пялькссна—велень хозяйствати и торговляти.
Физическяй лицатненди максф кредиттнень талекасна—38 процент. Башка вастса ащи ипотечнай кредитованиясь. Кода азозе республикань Оцюнясь, Мордовияса лама тиендеви сянкса, штоба эряма вастонь рамамась улель зепс коре. Эряфс етафневи несколька федеральнай жилищнай программа. Колма кизода инголе республикаса тевс сувафтфоль Россияса инь уцез ипотекась—5 процент алу.
—Тяниень пингть ипотечнай кредиттнень коряс средняй ставкась республикаса 9,5 процент,—азозе региононь вятись.—Но ломаттне получсесазь синь 5 процент алу, лядыкс пяльксть компенсировандасы республиканскяй бюджетсь.
В.Д.Волков азозе, што Россиянь Президентть В.В.Путинонь Посланиясонза путф задачать мяльс сявозь ипотекать коряс ставкась кармай кирьфневома сяда товга.
Корхтамок сай пингонди задачатнень колга, региононь Оцюнясь башка мяль шарфтсь инфляциять кирьфтаманцты. Тячиень шити инфляциясь Мордовияса фкя инь емлась странаса—2 процентт. Целайнек Россияса инфляциясь августста ульсь 3,1 процент.
Мордовиянь Национальнай Банкть сотрудниконзон и банковскяй системань ветераттнень стане жа поздравляндазь РФ-нь Центральнай Банкть Волго-Вятскяй главнай управлениянц начальниконц заместителец Ю.Г.Серова, МР-ть эзга главнай федеральнай инспекторсь М.С.Сезганов, Мордовия Республикань Госсобраниянь Бюджетть, финанснень и налокнень коряс комитетть председателец С.Е.Киселева, Россиянь Банкть Мордовскяй отделениянц управляющаец А.Ю.Колосков.
О.Евдокимова.

04.10.2018 №39
 
 
 

 
НОВОСТИ
 
 
 
 
 
 

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019  № 14
 

1 апрельста ушедсь 2019 кизоть омбоце пяленцты газетас и журналс сёрматфтомась

11.04.2019  № 14
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин