Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

«Мордовиясь—Россиянь финно-угорскяй мирть центрац!»

А.И.Полежаевонь музейса
25 сентябрьста Саранскяйса А.И.Полежаевонь музейса «Россиянь финно-угорскяй мирть аськолксонза» лем ала етафтовсь М.Е.Евсевьевонь лемса пединститутонь филологическяй факультетонь студенттнень мархта васедема, коса Мордовия Республикань содаф писательхне, государственнай и общественнай деятельхне, ученайхне, поэттне и журналисттне азондсть сай пингонь педагокненди, кода, синь мяльснон коряс, мольфтевихть сембе ширдень тефне Россиянь финно-угорскяй мирса.
Кода мярьгсь васедемать панжемста А.И.Полежаевонь лемса музейть научнай сотрудникоц, Россиянь Писателень союзонь членць А.И.Носиков, темась, конань минь тячи ванцаськ, пяк эрявикс аф аньцек тейнек, мокшэрзятненди, но и Россиянь лия финно-угорскяй нароттненди. Сяс мес, кода и мокшэрзятнень, синьге лувкссна кири. Сембода пяк тянкса муворуфт ассимиляциянь процессне. Сяс тейнек сембе вийса эрявихть ванфтомс и виияфтомс национальнай культураньке, коеньке-обуцяньке, мокшень и эрзянь кяльхне. Сембода пяк тянь эряви тиендемс ошса, коса ассимиляциянь    процессне молихть пяк вишкста.
Историческяй наукань кандидатть В.Ф.Разживинонь мяленц коряс, ассимиляциянь процесста башка, мокшэрзятнень, кода и Россиянь лия нароттнень лувксснон, кирьфтазь Васенце мировой, гражданскяй и Омбоце мировой войнатне. Ся поколениятне, конат шавовсть ня войнатнень эса, ашесть када эсь мельгаст потомства. И, тяда башка, тяниень пингонь экологиянь и лия туфталхнень сюнеда ламотне од алятнень и аватнень эзда аф аравихть алякс и тядякс. Но, эряви азомс, тячи Россиянь Президентсь В.В.Путин и Правительствась тиендьсазь семботь, штоба странасонк касфтомс народонь лувксть. Мярьктяма, аватненди пандови «материнскяй капитал», лама идень семьятненди макссевихть аф фкя лацонь льготат, процентфтома кредитт, эсь кудонь строяманди участкат. Сяс карматама надияма: обществаньконди маластонь пингть эсь лувксоц няевиста касфтови.
Мордовия Республикань Культурань, национальнай политикань, туризмань и архивнай тевонь министерстваса Межнациональнай кизефкснень коряс отделонь оцюнясь, филологическяй наукань кандидатсь  А.М.Кочеваткин эсь выступлениянц сай пингонь педагокнень инголе лемдезе финно-угорскяй языкознаниянь кизефксненди и Мордовия Республикать оцюдонга оцю путксонцты Россиянь финно-угорскяй мирть виияфтомаса. Кода мярьгсь Александр Михайлович, кле, аф стак вдь Мордовия Республикать столицаса панчфт Россиянь финно-угорскяй нароттнень Ассоциациясна, финно-угорскяй народонь культурань Поволжскяй центрась, «Финно-угорскяй журналистонь Содружества» Межрегиональнай общественнай организациять штаб-квартирац и ноляви «Финно-угорскяй газета». Сяс ули кода азомс, Мордовия Республикась тячи—Россиянь финно-угорскяй мирть афкуксонь центрац, конанди тя мирсь путни оцю вешфкст. И ня вешфкснень Мордовиясь пяшкотькшнесыне педа-пес.
Кода латцевихть культурань, творческяй и лия эрявикс сотксне Россиянь и омба масторонь финно-угорскяй мирхнень еткса пуромфненди азондсь Финно-угорскяй писателень Международнай Ассоциациянь Правлениянь членць, «Финно-угорскяй журналистонь Содружества» Межрегиональнай общественнай организациять председателец, «Чилисема» идень журналть главнай редактороц Н.И.Ишуткин. Кода мярьгсь васедемаса пуромфненди Николай Иванович, Финно-угорскяй писателень Международнай Ассоциациясь мольфтьсыне эсь тевонзон мода-масторонь финно-угорскяй мирса. И тянь вельде тиендьсы финно-угорскяй народонь литературать и культурать фкя-фкянди содафокс и ламода сяда малакс и шарьхкодевикс. А «Финно-угорскяй журналистонь Содружества» Межрегиональнай общественнай организациясь пцтай тяка тефнень тиендьсыне Россиянь финно-угорскяй мирса. Сяс афкукс ули кода азомс: Мордовия Республикась—Россиянь финно-угорскяй мирть центрац!
Мокшэрзянь народть Межрегиональнай организациянц тевонзон колга Россиянь финно-угорскяй мирса васедемаса пуромфненди азондсь организациять секретарец О.В. Вдулкин. Кода мярьгсь Олег Владимирович, ефси аф кунара мокшэрзянь делегациясь мрдась Крым Республикаста, коса организациять тостонь отделенияц етафтозе мокшэрзянь «Шумбрат» илать. Тя илать вельде Крымса эреклафтовсь аф аньцек мокшэрзянь, но и Россиянь лия финно-угорскяй нароттнень, конатнень представительсна ульсть иласа, национальнай самосознаниясна. Сяс ули кода азомс, мокшэрзянь народсь тага сувафтсь  Россиянь финно-угорскяй мирти няевикс путкс!
В.ИОСИФОВ.

04.10.2018 №39
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин