Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Н.С.Щанкин: «УЛЕМС ПАРА ВАЙМОКС, КЕЛЬГОМС ЛОМАТТНЕНЬ, ЛЕЗНЕМС ТЕЕСТ»

Минь, «Мокшень правда» газетаса покодихнень, пяк пара мялезонк, мзярда ширезонк сашендыхть инжихть. Кельгсаськ мокшень ломаттнень мархта седикс-ваймокс корхнеманьконь, сотцемс синь эряфснон, сатфксснон колга. Ня шитнень редакциязонк сувсесь мокшень пара ломанць, трудонь ветеранць Н.С.Щанкин. Аф кржати лувиеньконь эзда сон лац содаф. Трудовой кинц Николай Степанович ушеткшнезе школань директоркс, ётазе комсомольскяй школать. Лама киза работац сотфоль национальнай кизефкснень мархта, конат тячемс аф кадондсазь мокшалять озадонь седихть ащема.
Аф кунара Николай Степановичень ульсь юбилеец, 27 сентябрьста теенза топодсь 75 киза. А сяс корхтаманьконьге ушедоськ поздравлениянь валста.
—Николай Степанович, васендакиге арьсетяма тейть кемодонга кеме шумбраши, сатфкст и лама киза эрямс!
—Спасиба!
—Шачеть-касоть мокшень велеса. Эрь, лятфтак идькс пингцень колга, кит тядятне-алятне?
—Ковылкинскяй райононь Од Пшень велеста молихть юрне. Семьясонк шачсь 12 идь, но шиса лядоме аньцек колмоненк. Алязе, Степан Федорович, Великай Отечественнай войнань ветеран, пачкодсь Берлину. Рейхстагть зданиянц лангс сембе кядьснон путнезь, а сон аф грамотнаель, путсь крез. Эстоньбере и макссь эстеенза вал, кда ляды шиса, шабанзонды обязательна максы образования. Тяфта и тись. Тячемс спасибан теенза тянкса. Войнада меле алязе работцесь колхозса пожарнайкс. Тядязе, Евдокия Никитовна, вятсь подсобнай хозяйства, касфтсь итть. Шабакс пингозе прась войнада мельдень стака кизотненди. Савсь содамс и вачашить таньфонц, мзярда наксада модамарьда башка шра лангса мезевок ашель. Родительне рана тонафтомазь трудти. Школавга нинге ашень яка, но жуватанди палаксонь сязендемась, пенгянь, ведень каннемась мельганотольхть. Мяляфтса, пуроптама ялгань келеса, васенда марса фкять кудонь тевонзон тисаськ, меле—омбоцеть. А сяльде Исса ляи эшелякшнема ласьктяма. Вейхкса кизоса тонадонь ни тишень лядема. Курмозьшка цераня, а пеелемозень яфиине аф оцюда кальдявста. Шити ниле тачкат тише эрявсь ускомс. Аф лядят сняра, шовонти пови, лядят—алня максыхть. А кизоньберьф эрявсь марнек кудботмарсь пяшкодемс.
Эсь велесонк шумордайне школать. Аф отличниколень, но тонафнень аф кальдявста. Сяда тёждяста макссевсть гуманитарнай наукатне. А сяс кагоднень максыне Н.П.Огарёвонь лемса МГУ-нь филологическяй факультету. Аделайне национальнай отделениять.
—Комсь кафтува кизоса, ёфси од цёракс, путфолеть-кочкафолеть школань директоркс. Аф пельксоль кярьмодемс тевс?
—Шарьхкотьф, таколдонь. Пелень аф сафтови. Школаса ся пингть тонафнесь 474 шаба, работась ведьгемоньда лама учитель, а стане жа аф фкя лацонь техническяй работник. Сембонь мархта эрявсь мумс марстонь кяль. Оцю лезкс од тевсон макссесь ингольдень класснай руководителезе, математикань тонафтысь Ф.Т.Аронов. Целайнек педагогическяй коллективсь примамань лац. Но ульсть и стамот, кит самазенди ашесть кенярде. Школань ингольдень директорсь нльне пеняцяма лангозон тяштсь «Советская Мордовия» газетав, араламасть, кле, од учительть эзда. А «обжафоль» работай ялгазе сяс, мес аля учительхнень кошардыне лисемс пенгянь лазондома. Монцьке кярьмотькшнень тевс мархтост ряцок и мезеньге кальдяв или нльне визькс тянь эзда ашень няенде. А сон, улема, арьсесь лиякс.
Школав самстон ладянь соткст колхозонь эстонь председательть И.Ф.Скворцовонь мархта. Сон школати машина макссесь пенгянь усксемс, а тонафнихне и коллективсь меле лезнесть колхозти серонь урядамаса. Монцьке ётксостолень. Вов тяфтамоль ётксонк фкя-фкянди лездомась.
Школаса работань аф ламос—кафта кизот. Меле кандидатуразе кочкафоль комсомолонь Ковылкинскяй горкомонь секретаренди. Тевсь, шарьхкотьф, ответственнай, сяс согласиндань аф эстокиге. А сяльде, работамок мзярошка пинге, тусь мялезон. Сашендовсь васетькшнемс-корхнемс велень труженикнень, од ломаттнень мархта, вятемс мархтост учебно-воспитательнай, трудовой работа. Тя тевса тейне пяк лездсь учительскяй опытсь. Башка мяль эста шарфневсь патриотическяй воспитанияти. Сидеста пуропнеме васедемат Великай Отечественнай войнань ветераттнень мархта, конатненди фалу ульсь мезе лятфтамс-азомс, мезти тонафтомс оттнень.
—Николай Степанович, мезсь мялезт тячиень од ломаттнень эса?
—Коста аф коста кулендят тяфтама корхнемат, кле, тяниень оттне аф стамот, кодаптолеме минь. А мес, кизефтян, теест улема минь лацонк? Эряфсь аф ащи фкя вастса, моли инголи, полафни. Мархтонза полафнихть и од ломаттне. Тяни синь сяда оцюфт возможностьсна информациянь сатомаса. Эряфсост компьютерсь, Интернетсь и стак тов занци оцю васта, мезть колга инголи афи кулентьфоль. Оттне тяни, виденц азомс, сяда грамотнайхть корязонк, но мархтост эряви работамс. Васендакиге эреклафтома-виияфтома патриотическяй работась. Тонафтомат эряфса инь питнить ванфтома. Тяса эряви, штоба «кядьснон путолезь» и властьса ащихне.
—Аф фкя киза покодеть консультантокс МР-нь национальнай политикать коряс Госкомитетса.
—2001 кизоня кярьмодень тевс тя вастса. Национальнай ширесь фалу ульсь тейне пяк малакс. Лама кизода инголе Эстониянь Тарту ошса рьвязе аралась диссертация. Монга улень мархтонза. Тоса тись доклад фкя академик, кона содась мянь 33 кяль. Тя академиксь лама корхтась нароттнень национальнай эсь лацоньшиснон ванфнеманц колга. Валонза арасть тейне эсь лацонь кинь няфтикс сяда товолдонь эряфсон и работасон.
Национальнай политикать коряс Госкомитетть тяза самстон вятезе А.А.Утешев, а кизонь ётазь председателькс арась Мордовскяй (мокшень и эрзянь) народть Межрегиональнай общественнай организациянц Исполкомонц тячиень председателец А.С. Лузгин. Эряви азомс, Александр Степановичень мархта минь улеме аф аньцек кода начальник и сонь подчиненнаец. Васенце шистокиге ётксонк ладявсть ялгаксшинь лямбе соткст. Марса работаме пенсияс лисемозон. Тячивок аф юкснетяма фкя-фкянь колга, гайфнетяма, васетькшнетяма.
Мялезе нинге лятфтамс Госкомитетть тевонзон колга. Васенцесь, вятевсь оцю работа школатнень эса мокшень и эрзянь кяльхнень тонафнемаснон коряс. Мзярда аньцек кярьмотьфоль тя тевти, аф кржаль каршек ащида школань директорхнень, родительхнень ёткса. Но тейнек удалась пачфтемс мокшень и эрзянь ломаттненди, што, кда аф ванфтсаськ эсь кяленьконь, юмафтсаськ эсь пряньконьге. И тевоньке тусь. Лама тифоль ширеса эряй мокшэрзятнень мархта соткснень кемокснеманкса. Ламоксть сашендовсь улендемс лия региоттнень эса, корхнемс ломаттнень мархта. И сембе вастова мушентфоль шарьхкодема. Аш кода аф азомс, што национальнай политикать кемокснемаса лама сатфоль Мордовиянь ингольдень Оцюнять Н.И.Меркушкинонь пингста.
—Николай Степанович, ёмла родинасот сидеста улендят? Кода тячи эряй-ащи Од Пшень велесь?
—Виденц азомс, велеса улендян аф сидеста. Радня ломаннень эзда тоса кивок ашезь ляда ни, лоткамска аш кинь шири. Улендян тядязень-алязень калмоняснон лангса.
Велесь тячи, конешна, ламода полафтсь, арась ош лаца: и ведь, и газ куттнень эса ули. Вов аньцек куттне шамондыхть, оттне тушендыхть кие коза, сиретне кулсихть. Шабат тяса пцтай ёфси аш.
—Пароль нинге содамс аф лама семьяцень колга.
—Рьвязе, Нина Андреевна, мокшава, шумордазе М.Е.Евсевьевонь лемса МГПИ-ть, меле работцесь преподавателькс. Ведьгемонь киза эрятама марса. Касфтоме стирь. Уноконьке ули, аф кунара сон лиссь рьвакс. Шять, курок идень унокт ваннетяма Нина Андреевназень мархта.
—Кой-кит ётка пингста якайхть калонь кунцема, морафнихть книгат-месть. А тонь кодама кельгома тевце?
—Кельгса шахматса налхкомазень. Кизонда пара мяльса дачаса возсян.
—Тяни тяфтама философскяй кизефкс: мезти тонафтонзе эряфсь?
—Улемс пара ваймокс, кельгомс ломаттнень, лезнемс теест. Тяфта мон эряфоньберьф и тиендень.
—Спасиба!
О.ЕВДОКИМОВА.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022