Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

Панжевсь од театральнай сезонць

Ташта койсь тя пингонь ванфса
Од театральнай сезонть панжевомац—тя фалу оцюдонга оцю ила и зрительти, и театрати. И тяфтама оцю праздник 27 сентябрьста ётафтсь Мордовиянь национальнай драматическяй театрась, кона панжезе Од театральнай сезононц мокшэрзянь содаф драматургть Ксения Петровать «Ташто койсэ» пьесанц коряс путф спектакльса.
Спектакльть ушедомда инголе Национальнай театрать директороц С.И.Дорогайкина мярьгсь зрительхненди: кле, спасиба сембонди сянкса, мес тячи тинь минь мархтонкотада. Надиян, од сезононьконь ушедсаськ и етафтсаськ удалафста, сяс мес минь анокламе теенть лама цебярь спектакльда, конатнень ванома тернетядязь и учтядязь фалу!
Мордовиянь Национальнай драматическяй театрань коллективть и зрительхнень Од театральнай сезонть панжевоманц мархта тяфта жа лямбоста поздравляндазень Мордовия Республикань культурань, национальнай политикань, туризмань и архивнай тевонь министрть васенце заместителец А.И.Карьгин. Александр Иванович мярьгсь: «Тейне пяк пара няемс сембонь тинь тя мазы и валда залса и поздравляндамс Од театральнай сезонть панжевоманц мархта! Зрительхнень еткса тячи лама од ломаньда. И тя кеняртьфти, сяс мес няеви, што Мордовиянь национальнай драматическяй театрать творчестванц и зрительть еткса ули эрек соткс. И мон надиян: тячиень илась сядонга пяк кемокстасы тя сотксть и ламолгофтсы театрань зрительть лувксонц. И, тяда башка, максы од вийхть-эрьгя мокшень и эрзянь кяльхненди, минь мокшэрзянь национальнай культураньконди!»
Тяса эряви азомс: «Ташто койсэ» спектакльсь афкукс лезды ванфтомс и виияфтомс минь национальнай культураньконь, сяс мес эсонза лама мокшэрзянь кунардонь пингонь морода, кштимада-мезьда. Актерхне сембе рольхнень эса налхкихть кунардонь пингонь мокшэрзянь койхнень коряс и национальнай щамбяльса наряжафста. Сяс спектакльть ваномста няйсак афкуксонь эряфть, кодамса эрясть минь атянь-атяньке пцтай 200 кизода инголе.
Спектакльса, коса налхкихть национальнай театрань пцтай сембе актерхне, азондови валда кельгомать колга, конаса кельгсть фкя-фкянь ся пингонь од ломаттне. И азондови синь аляснон-тядяснон и лия ломаттнень казяма ваймоснон колга, конат тянь сюнеда тиезь эсь цераснон и стирьснон павазфтома ломанькс.
Конешна, сембе актерхне «Ташто койсэ» спектакльса налхксть кепотьф мяльса. И национальнай театрань труппати тянкса зрительсь азсь оцюдонга оцю спасиба кядень вии цяпамаса и панчфонь пусмоса.
Тяка пингть, эряви азомс, инь мялень салайста эсь рольснон налхкозь Мордовиянь Народнай артисткась Тамара Весеньева, Заслуженнай артисткатне Галина Самаркина, Валентина Ермошкина, артисттне—Евгений Благов, Дмитрий Мишечкин, Андрей Анисимов, Анатолий Нуштайкин, Андрей Кипайкин и Владимир Стороженко.
В.Нестеров.

04.10.2018 №39
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин