Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
—Стаки мольфтеви идень садонь строямать коряс программась. Тя кизоть пенцты панжевихть идень 3 садикт: Саранскяйса, Рузаевскяй райононь Левжа велеса и Теньгушевскяй райононь Барашево поселкаса.
Маластонь пингть ушедови од школань строямась Юбилейнай 4-це микрорайонца. Кармайхть строявома школат и Саранскяйть Юго-Западсонза, и республикань кой-кона райоттнень эса. Мольфтеви ни школань строямась Краснослободскяйса, Зубово-Полянскяй райононь Умет поселкаса, Торбеевскяй райононь Дракино велеса.
Нацпроектть рамкаса странаса тиеви учительхнень профессиональнай ширде касфтомаснон коряс од система. Важнайкс лядонды школатнень кадраса обеспечендамаса—заработнай платать касфтомац. Пяшкотькшнемок Президентть 2012 кизонь майскяй Указонц, минь тя работать аф лоткафнесаськ,—мярьгсь Владимир Волков.—Учительхнень зар-платаснон касфтоманц коряс работась кармай мольфтевома сяда тов.
Учителень шити лемтьф иласа поздравленияда башка ульсть и казнет. Республикать инголе оцю заслуганкса и законотворческяй тевонь вятеманкса Славань III степенень орденца казьф МР-нь Госсобраниять Председателенц заместителец Иван Москаев. Профессияс коре сон географиянь учитель, трудовой кинц ушедозе Ардатовскяй райононь Куракинскяй средняй школаса, а 1984-2016 кизотнень работась директоркс Саранск ошень 27№ школаса.
Пара койс коре, Учителень шиста, инь цебярь тонафтыхненди максфтольхть Президентть грантонза—200 тежянь цалковаень, республикань Оцюнять грантонза—50 тежянь цалковаень. Азома сявок, республиканскяй гранттнень получазь аф аньцек школань 25 учительсь, но и идень садонь 10 воспитательхне и средняй профессиональнай образованиянь учреждениянь 3 преподавательхне.
Азфт школатне, конат активнайста сувафнесазь эряфс инновационнай образовательнай программатнень и синь арасть республикань Оцюнять грантонзон—500 тежянь цалковаень получайкс. Тя Саранск ошень 7№ лицейсь и 25№ школась, Ковылкинскяй 3№ средняй школась, Краснослободскяй райононь П.М.Волковонь лемса Красноподгорнай средняй школась и лиятне.
Профессиональнай образовательнай организациятнень еткса республикань Оцюнять премиянц получаманц коряс конкурсонь сяськикс тядде лувф мясной и молочнай промышленностень Торбеевскяй колледжсь. Сон получай 2 миллиотт цалковай грант.