Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

ЭРЯФОНЦ ЛЕМДЕЗЕ ИТТНЕНДИ

Ельниковскяй райононь Мольцанав велеса шачф-касф мокшавать Ольга Осиповна Кулаевать содаса лама киза ни и тячемс аф лотксян дивандакшнемда сонь смузьшинцты, оржа ёненцты, ломаттненди панжадокс улеманцты. Корхнят-тият мархтонза и лад арай седиезт, стама сон валда и пара вайме ломанць. Эряфонц оцюшка пяльксоц Ольга Осиповнань ётась ошса, но, аф ваномок тянь лангс, сон тянивок лядонды велень ломанькс—трудонь кельгикс, тевда-сталмода аф пеликс.
Идькс  пингсь  инь мяляфтовись
О.О.Кулаевась кассь оцю семьяса. Кота шабатнень ёткста сон омбоцекссь. Оцють эзда, шарьхкотьф, и вешевсь сяда лама. Тядянцты кудъётконь, перень тевса лезнемада башка Ольгати нинге сашенкшневсь ваннемс ёмла дуганонзон-сазорнянзон. Сембонди содаф, мзяра тевда-заботада велеса. Кафтонь-крда сяда лама эздост оцю семьяса. Кода лятфнесы Кулаевась, куд пирьфсна фалу пяшксель жуватада. Кирнесть тракст, тувот, сараст, учат. Теест эрявсь и тише сязендемс-косьфтамс, и лия корма анокламс. И тяса тядятненди-алятненди васенце лездыкс ульсть Ольга стирьсна и корязонза оцю брадоц. Тяда башка, мзярс шачфтысна-касфтысна колхозса трудендакшнесть, братт-сазорхт пенгат лазондсть, карду сувафнезь, меле куду ведь каннесть. Ольга Осиповна лятфнесы, кода яксекшнесь веденкса пялешка вайгяльбень вастса ащи лихтибряти. Ведсь тоса танцтидонга танцти улендсь. Пяшкоди колма ведаркат, кафттнень крьхця лангс повфтасыне, а колмоцеть кядь песонза кандсы. Шабравасна, эряфкшу кизоса авась, коль сюцекшнесь-ужялякшнесь эсонза тяшка оцю сталмонь каннеманкса. А Ольгась сяда курокста пяшкодьсыне веденди аноклаф кядьготнень и эряскоды стирня ялганзонды. Шабада эста велеса ламоль, эрь семьяса инь кржась ветень идь касфтовсь. Пуромихть марс—ульцясь пяшкоди.
Сембе  эряфоц сотовсь  шабатнень мархта
Нинге шабакс О.О.Кулаевать пяк мялезонзоль тонафтыень профессиясь. Учительхне ся пингть велеса инь почетнай ломаттельхть, сембе старандасть сявомс эздост пример. Вов и Ольга Осиповна сельме кайсесь работаснон лангс. Няканзон мархтовок най учителькс налхксекшнесь. Мзярда шумордазе школать, ламос апак арьсек, максозень документонзон М.Е.Евсевьевонь лемса МГПИ-нь филологическяй факультету, а педагогическяй образованиять получамда меле кярьмодсь тевс Инсаронь школаса-интернатса. Тяса тонафнесть уроз итть, аф удалаф семьяста шабат. Работамась мархтост, шарьхкотьф, аф тёждяль. Но Ольга Осиповна кажнайть мархта мушендсь марстонь кяль. Шабатне сонь кельгозь, кулхцондозь, работай ялганза тонафнесть эздонза.
Колма кизода меле, улемок ни од рьвянякс, Ольга Осиповна ётась эряма Саранскяи. И тясовок эряфоц сотневсь шабатнень мархта. Васенда работась идень садса нянечкакс, меле покодсь воспитателькс подростковай клубса, сяльде тага кярьмодсь тевс идень садса. Ульсь старшай воспитателькс, а меле—заведующайкс.
2007 кизоня О.О.Кулаевась сась работама Финно-угорскяй народонь культурань Поволжскяй центрав, кона эста аньцек тиендезень васенце аськолксонзон. Дошкольнай образовательнай учреждениятнень коряс координаторсь пильгонек-прянек тусь эсь од тевонцты. Аф фкя лацонь мероприятият, выездной заседаният, конкурст… Ольга Осиповна сембе вийса старандась тиемс идень садонь воспитательхнень работаснон сядонга мялень салайкс, аф фкя лацоннекс, сувафтомс иттнень воспитандамаснонды национальнай ширеть. Ламотненди лац содаф «Бабань парь» декоративно-прикладной творчествань конкурссь, конанди ушетксонь путыхнень ётксоль и О.О.Кулаевась. Конкурссь водендаф шабатнень ёткса патриотизмать виияфнеманкса, национальнай культурать, койхнень-обуцятнень лангс мяльснон шарфнеманкса. Ошень и райононь идень саттнень эса сидеста ётафневсть семинархт, коса башка мяль шарфневсь дошкольнай образовательнай учреждениятнень эса мокшень и эрзянь кяльхнень тонафнемаснонды.
Семьяц—инь  оцю козяшиц
Корхнихть, ломанць эста павазу, мзярда шобдава пара мяльса моли работама, а илять кепотьф мяльхть эряскоды куду. Тя азфсь пяк мала тячиень героиняньконди О.О.Кулаевати. Ольга Осиповна эряфоньберьф заняфоль кельгома тевсонза, кона тиендезе сонь павазукс. Тяка пингть, седиень озафтома вастокс теенза фалу ульсь и лядонды семьяц. Лама киза кельгозь и фкя-фкянь шарьхкотькшнезь эряй Ольга Осиповна мирденц, мокшалять Михаил Тимофеевичень мархта. Полатне шачфтсть-касфтсть колма итть—фкя цёра и кафта стирьхть. Цёрасна и оцю стирьсна, аляснон лаца, арасть врачекс, ёмлась—юрист. Кулаефнень кота уноксна. Ольга Осиповна кельгсыне синь аф азовомшка, пяк лажаткшни теест. Сяс, мзярда синь сашендыхть ширезонза, Ольга Осиповнань кудса эста уленди афкуксонь праздник.
Кельгсы  пидеманц-панеманц,  инжиень примаманц
Эрь ломанть ули кельгома тевоц. Ольга Осиповна Кулаевась, кода афкуксонь кудазорава, кельгсы и сафтсы пидемаса-панемаса. Аньцек мезе аф уленди мокшавать шранц лангса: и пярякат, и пачат, и танцтидонга танцти пицца. Мода пакшенц лангса Ольга Осиповна касфни лама перень сёрода, иможда, а меле тялонди тиенди аф фкя лацонь салатт, вареньят, салыяфни куярхт и помидорат. Мокшавась пара мяльса примси эсь ширесонза инжихть, каванякшнесыне синь эсь пидефонц-паньфонц мархта.
«Мокшень правдась»—кельгома газетац
«Мокшень правда» газетать лувондомонза ушедонь нинге шабакс,—азозе О.О.Кулаевась.—Алязе работцесь колхозса парторгокс, а сяс тяштьфнесь лама аф фкя лацонь журнал и газета, тяконь лувксса и «Мокшень правда». Лувсы газетать педа-пес, а меле тейнек, шабатненди, ваномс макссы. Страницанза эста оцюфтольхть, сявсак кядезот—пильгонек-прянек кяшеват. Пингсь мольсь, а мархтонза полафнесь и мокшень газетаньке. Сон, койсон, арась сядонга козякс содержанияс коре. Пара мяльса лувондсайне кулятнень, а стане жа содаф мокшень ломаненьконь колга заметкатнень. Тушендыхть мялезон рецепттне, конатнень мон сидеста нолнесайне тевс. Улель пара, кда газетаса макссеволь сяда лама материал идень касфтомать, семьяса фкя-фкянь ладямать колга. Кода пример, тяшнемс зарисовкат лама киза марса эряй мирттнень-рьвятнень, кеме семьятнень колга».
О.ЕВДОКИМОВА.

11.10.2018 №40
 
 
 

 
НОВОСТИ
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин