Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Тема дня

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

20 октябрьста Саранскяйса Культурань Республиканскяй дворецса ушедсь мокшэрзянь масторса фкя инь кельгови илась—«Шумбрат, Мордовия!»—«Vivat, Чемпионат!» народнай творчествань республиканскяй фестивальсь. Тядде сон етафтови комсь кафтувоцеда и лемтьф 2018 кизонь футболть коряс Миронь чемпионатти. Тяддень фестивальть девизоц—«И тя сембось сонь колганза».
Кода фалу, ковда ламос Культурань Республиканскяй дворецса кармайхть етнема муниципальнай райоттнень и Саранск ошень округть отчетнай концертсна, а стане жа «Мокшэрзянь масторть мастерствац» декоративно-прикладной и изобразительнай творчествань выставкатне.
Ваныхненди ули кода няемс инь цебярь творческяй коллектифнень, артисттнень выступленияснон, содафтомс народнай мастерхнень работаснон мархта.
Фестивальть панжемста Мордовия Республикань культурань, национальнай политикань, туризмань и архивнай тевонь министрсь  А.М.Чушкин мярьгсь:
—«Шумбрат, Мордовия!» фестивальсь—тя народть ваймоц. Сон маласькофнесамазь фкя-фкянди, тиендьсамазь сяда виикс, лезни содамс-шарьхкотькшнемс мокшэрзянь народть культуранц сембе козяшинц. Ила  мархта!
Васенцекс творческяй маштомошиснон республиканскяй сценать лангса няфтезь Чамзинскяй райононь самодеятельнай коллектифне и артисттне. Чамзинскяй районць меля сатозе фестивальса васенце вастть, а тядде панжезе сонь.
Ваныхне, конат педа-пес пяшкодезь залть, кядень цяпамаса васьфнезь сценать лангс эрь лисить.
Тяда меле част пяле мархта пингс сценать лангса ульсть Старошайговскяй райононь творческяй коллектифне. Фкя ваймоса ванфоль-кулхцонтфоль концертсь. Мокшэрзянь, рузонь народнай моротнень мархта ряцок программаса маштозь ладяфтольхть кштиматне и авторскяй моротне.
 Иттнень мархта ряцок сценати лисендсть эряфкшуфне.
Эсь концертнай программанц Старошайговскяй районць ушедозе хореографическяй композицияста, конань пингста артисттне кочкасть аф оцю пялькскаста кабаконашка футбольнай топ. А велень од футболисттне няфтезь топса налхкомаса маштомошиснон.
Аф васенце кизось фестивальса морси Сире Теризморгань народнай хорсь. «Иванонь Марюсь», «Цебярь инжихть васьфттяма» мокшень моротне, улема, киньге ашезь када озадонь седихть ащема. Тияк, ванфнемок инжиень примамань-васьфтемань койхнень, мокшаватне лихтсть залу и каванязь ваныхнень мокшень суронь пачаса, пярякаса.
Тяда меле эряфкшу  морайхненди поладсть од    артист-тне. «Лаймоня» идень ансамбльсь, конань вятьсы   МР-нь культурань Заслуженнай работниксь Виктор Пивкин, моразе «Вярде панихть» народнай мороть. А меле сценась тага максфоль Сире Теризморгань народнай хорти, конань весяла сиде моронянзон коряс залса сембе озсефне покорфтозь кямоснон.
Футболть, чемпионатть и В.В.Путинонь колга сиде моронянзон мархта ваныхнень весялгофтозень Лемдяй велень пенсионеркась Мария Евстифеева.
Кядень кайги цяпаматне сязезь залть «Восторг» кштимань коллективть выступлениядонза меле. Мокшекс щаф стирнятне кштисть стама эрьгавста, улема, аф кржать эвондакшнесь мялец шоворемс еткозост.
Концертть эзда ширеса ашезь ляда оцю поколениясь. Ветеранонь хорть мархта «Шайгав веле» мороть моразе марнек залсь.
Стяда ащезь кулхцонтфоль «Счастья тебе, земля моя!» мекольце композициясь. Тянь мархта Старошайговскяй райононь артисттнень отчетнай концертсна шумордавсь, а залса нинге ламос кайгсть кядень цяпаматне и «Браво!» юватькшнематне.
О.Евдокимова.

25.10.2018 №42
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин