Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     

 
 

 

Тема дня

«Инголе—оцю тефт!»

9 ноябрьста Саранскяйса ётась «Единая Россия» Всероссийскяй политическяй партиять Мордовскяй региональнай отделениянц ХХVI конференцияц. Тяса тяфта жа ульсть: Мордовия Республикань Оцюнясь, «Единая Россия» партиянь Высшай Советонь членць В.Д.Волков, Мордовия Республикань Государственнай Собраниять Председателец, партиять региональнай отделениянц Секретарец В.В.Чибиркин, Мордовия Республикань Правительствать Председателец В.Ф.Сушков, партиянь активисттне и сонь ширенц кирдиенза, республикань государственнай властень представительхне, Российскяй Федерациянь Государственнай Думань депутаттне А.В.Воробьев, С.В.Чиндяскин, Мордовиять эзда сенаторсь В.В.Литюшкин, республикань инь вии промышленнай предприятиянь и общественнай организациянь руководительхне.
Конференцияса марнек ульсь 219 делегат. Шинь повесткать коряс ванфтольхть ниле кизефкст, конатнень еткса инь оцюфне—тя тяддень кизонь работать итогонза и «Единай Россиять» маластонь съездонцты, кона декабрьста етафтови Москуса, делегатонь кочкамась.
Кизонь работать итогонзон колга доклад конференцияса тись партиять региональнай отделениянц Секретарец, Мордовия Республикань Государственнай Собраниять Председателец В.В.Чибиркин. Сон макссь оцю оценка республикань единоросснень работаснонды, конань синь тиезь Российскяй Федерациянь Президентонь кочкаматнень анокламаснон и етафтомаснон, а тяфта жа футболть коряс Миронь чемпионатть пингста. Сяс 2018 кизонь 18 мартста В.В.Путинонь инкса эсь вайгяльснон максозь Мордовияса эряйхнень 85,35 процентсна, а кочкамань участкав самать коряс Приволжскяй федеральнай округонь лия региоттнень еткса Мордовиясь лиссь васенце вастти.
Футболть коряс Миронь чемпионатть пингста республикань единороссне тяфта жа етафтсть оцю работа, кона сядонга кеподезе Мордовиять имидженц кода Россияса, стане и омба масторса. И тяфтама жа оцю работа тифоль партиянь проекттнень эряфс етафтомаснон коряс.
Докладть коряс пренияса тя кизонь работать итогонзон колга корхтасть региональнай отделениянь Секретарть заместителец Н.М.Андрюшечкина, Октябрьскяй местнай отделениянь секретарсь И.В.Ванисова, Ичалковскяй местнай отделениянь секретарсь Н.И. Пантюшин и лия единороссне.
Пренияда меле    единороссне фкя мяльса кочкасть съезду 6 делегатт.
Сяльде конференцияса корхтась Мордовия Республикань Оцюнясь, «Единая Россия» партиянь Высшай Советонь членць В.Д.Волков. Сон мярьгсь, кле, итоговай форумса тейнек эряви корхнемс аф аньцек тиф работать, но и крхкаста ванондомс прябалатнень и лия оржа кизефкснень. Инь эрявиксне эздост—тя граждаттнень доходснон касфтомасна, одс шачихнень лувксснон касфтомасна, кулыхнень и ашу ломанень лувксть кирьфтамасна. Сяс инголе эсонк учсихть оцю тефт. И тя тефнень эса эряви улемс васенце вастса.
Сяда тов Мордовиянь Оцюнясь мярьгсь, кле, вете кизоста, мзярс республикаса мольфтевсть футболть коряс Миронь чемпионатти анокламатне, ня тефненди карьхцяфоль 31 миллиардта лама цалковай. Синь вельдест кафтонь-крда виияфтфоль строительнай работатнень темпсна, мазоптфтольхть Саранск и Рузаевка ошне,  машфтфтольхть коммунальнай прябалатне, рамафтольхть «скорай помощень» машинат и лия эрявикс техника. И тячивок Мордовия Республикаса арьсеви етафтомс эряфс 12 национальнай и 60 федеральнай проект. Тянкса республикати 6 кизоста федеральнай бюджетста максови 136 миллиардта лама цалковай. Синь лангозост кармайхть строявома од кутт, од кит велетнень и районнай центратнень эса, поладови льготнай ипотекась.
Тяда меле казьфтольхть партиянь активисттне. Мордовия Республикань Оцюнясь В.Д.Волков «За самоотверженный труд» Почетнай знакса казезе партиянь Мордовскяй региональнай отделениянь Секретарть заместителенц, Мордовиянь Оцюнять администрациянц руководителенц васенце заместителенц В.В.Маресьевонь. Мордовскяй региональнай отделениянь Секретарть В.В.Чибиркинонь, партиянь Центральнай исполнительнай комитетть Благодарственнай сермаса казьфтольхть лия активисттне.
В.Нестеров.

15.11.2018 №45
 
 
 

 
НОВОСТИ
 
 
 
 
 
 

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019  № 14
 

1 апрельста ушедсь 2019 кизоть омбоце пяленцты газетас и журналс сёрматфтомась

11.04.2019  № 14
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин