Поиск по сайту: 
 

Архив
 декабрь 
 2018 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Наши мокшанские сыновья и дочери

Александр Павлович ФЕОКТИСТОВОНЬ шачема шистонза 90 кизонь топодемати

Сонь лемоц аф юкстави
Кемнилие киза ни ётась Александр Павловичень куломда меле... Сонь эряфонь сюре вядьмоц сязевсь 76 кизоса. Стака тянди кемамс—75 кизонь эсь иласонза сон инжихнень ёткса няевсь сембода одкс. Кизоста кизос ся пингонь шамаликоц монь инголен лисенди коль сяда валдста и валдста, аф юкстависта. А кода юкстасак, кда лама киза содасак ломанть аньцек пара тевса, лиянди эрь кодама лезксса—аф най наукаса, а марнек эряфонь сталмонь кандомаса.
Александр Павлович Феоктистовонь эряфоц марнек максфоль наукати, коса такор кит-ятт аф эряйхть. А сон ся ломаттнень эзда, конат тёждя кит косонга аф вешендихть, конат анокт кргавидева кялемс видешить инкса. Улемок прянек, сединек-ваймонек наукаса (академиянь наукаса!), сон мзярдонга, эсь квалманза корхтамста, ашезе сявонде валонь сотксть «минь, учёнайхне...», конань пяк кельгсазь наукать перьф бзмолдыхне-сюволяйхне.
Тейне-арам, Александр Павлович фалу эрясь А.П.Чеховонь вешфксонц коряс: «Ломанть эса сембось улеза ару-мазы: и шамац, и ронгоц, и седиец-ваймоц, и мяленза-арьсеманза».
Наукав путксонц колга минь сембе лама содатама. А.П.Феоктистовонь тядянь-алянь кяльть колга, сонь шачема юронзон колга, литературнай нормазонза пачкодеманц колга сёрматфоц сембе тонафтыхненди кадовсь инь питни кепотьксокс, инь эрявикс кядялдонь книгакс. А сонць Александр Павлович мяляфтови наукаса, кода инь стака кинь кяли, кона тиендсь кеме сетть мельганза молихненди, панчсесь теест сельмот. Няфтсь виде ки, штоба аф эрьгаскодомс. Тянкса минь сюконятама Теенза модас.
Павазонди, минь кенереме азомс теенза ня сюконяма валхнень, мзярда сон нинге шисоль. Сембода лама—60, 75 кизонь топодемстонза. Ваность, кепотьксонди, «Советское финноугроведение» журналть 1988 кизонь нилеце номеронц (303-305 л.), коса сёрмадыхть учёнайть колга сонь аспирантонза С.Липатов и О.Поляков; «Финно-угристика» журналть 2003-це кизонь 5-це номеронц (51-53 л.), коса мялень кеподи материал макссь профессорсь Р.Бузакова. А мзяра газетава рузонь, мокшень, эрзянь кяльса шнама валда азф Александр Павловичень лемс профессорхнень Д.В.Цыганкинонь, М.В.Мосинонь ширде; сонь васень аспирантонзон—Г.Ермушкинонь и Н.Алямкинонь ширде, конат тячи, ужяленди, ашет синцьке ни шиса. А мзяра седиень архты мяль азфоль мекольце пуромкссонок—Александр Павловичень 75 кизонь юбилейсонза! Сон виздезь нолнезе прянц, щека прянза якстерьготкшнесть, и аньцек пеедсь.
Мордовия Республикань наукань Заслуженнай деятельть, сембе финно-угорскяй мирса лац содаф учёнайть, профессорть А.П.Феоктистовонь 80 кизонц васьфтеськ ни, ужяленди, эсьфтомонза... Кадомазь апак учсек. Мярьгат, тись аськолкс лия мирти—и сембе. А мзяра тев инголенза путнесь, мзяра валда и смузю арьсема тядянь-алянь кяльть вандыень шинц колга сявсь мархтонза!
Вийс коре, шта, ня тефне, конатнень ашезь кенере тиемс Александр Павлович? Тянь няфтьсы пингсь. Минь тевоньконь васень лувкссост катк ули сонь лацонза кяльть кельгомац и ванфтомац, сяда тов козякофтомац, народоньконь фкя-фкада аф явфтомац.
Мярьгихть, «кодама крандазс озат—стама мора морат». Александр Павловичень наукань тевонь ускома крандазоц пяк питниель, сонь эсонза васта сатови аф сембонди. А вакссонза, перьфканза ардыхне—финно-угроветтне П.Аристэ. В.И.Лыткин, Б.А. Серебренников, Алхо Алхониеми, Сиркка Сааринен, П.Домокош; тюрколокне—Н.А.Баскаков, К.М.Мусаев; монголистсь Т.А.Бертагаев, кавказоведсь М.А.Кумахов, иранистсь М.И.Исаев и ламотне-ламотне лиятне. Сембе синь, кода прамошт, кочкасть медь фкя-фкаста, арьсекшнезь инь эрявикс и стака кизефкснень аф фкя лаца кялень наукаса, марнек кялень теориять ваномаса. Наукаса факттнень сурста аф шокшсайть. Тя ули аф наука. Синь вешендемат эрь кодама кяльса, а сяльде ваномат: мезе ули марстоннеда, а мезсь аньцек фкя-тяка кяльса.
Александр Павловичень сембе трудонзон эса кялень материалсь нолдаф аф аньцек валда ёнь пачк, а седиенц пачканга. Сяс сонь эрь книганц лувсак, кода мора морат (кда анокат!). Монь ульсь пингозе няемс, кода сон покодсь мекольце трудонц лангса—«Moksamordvan murteet» («Мокшанские диалекты»), конань синь аноклазь Туркскяй университетонь профессорть Сиркка Сааринен мархта. Книгась лиссь Хельсинки ошса 2005 кизоня. Ашезь кенере няемс сонь авторонзон эзда фкясь. Александр Павлович шинек-иляднек аноколь ащемс рабочай кабинетсонза, аньцек аделамс тя пяк эряви и питни тевть. Мзярда сон васьфнесь аф пяк содаф вал (сембода пяк «мокшавань щамса») кандсы тейне валть кагод лопаня лангс сёрматфста, мярьгат, сиянь суркскя мусь: «Ватта, Валя, конашкава мазы валсь». А сонць сизеф и павазу. Сон марясь таньф тевса. Шять, марязе—курок туй.
Книгаса васенцеда мокшень диалекттне кочкафт башка пяк оцю ареалста—Мордовиянь тяниень территорияста и мокшетнень лия регионга эряма вастстост, синь лац ладяфт жанрань коряс. Сёрматфт транскрипцияса и ётафтфт финнонь кяльс. Конашкава оцю казне тя трудсь кялень наукати, конашкава кели пакся аноклаф од исследовательхненди! Сон бта корхтай: «Покодеда, кода минь, покодеда сяда лац! Аньцек покодеда тевонь кельгозь!»
А.П.Феоктистовонь колга пяк оцю мяльса корхтайхть минь и лия масторонь финно-угорскяй наукань и образованиянь тевонь вятихне. Мон максан теенть, кельгома лувихть, сёрмаста пакшт, конатнень коряс тинць шарьхкодьсасть тянь.
1990-це кизоня Хельсинкиса лиссь Хейкки Паасоненонь «Мордовский словарь» трудонц васенце томоц. Мокшень пяльксти редакторкс путфоль А.П.Феоктистов, эрзяннети—Г.И.Ермушкин. Главнай редакторонь тефнень вятезень финнонь содаф учёнайсь  Мартти Кахла.
Вага мезе мёрмады Мартти Кахла А.П.Феоктистовонди омбоце томть нолдамда инголе 1992 кизонь 15 августста: «...Мон сюконян тейть омбоце томть рукописенц кучеманц и томти предисловиять ётафтоманц инкса. Томсь максф типографияв эсь пингстонза.
...Тонь оцю лезксфтомот, тянь мон азса видеста, мон афолень пачкоде тя тевса кизень пяленцтывок.
Саша, мон пяк кенярдень оцю сатфксти Тонь эряфсот. Седи ваксста кучан пара мяльхть-арьсемат профессоронь должностти кочкамацень инкса. Катк ламоняс аф прядови Тонь седиень-ваймонь эрьгяце!»
А тя сёрмать кучезе 1995 кизонь 8 майста (А.П.Феоктистов мрдась Москуста Саранскяи 1991 к.) Венгриянь содаф учёнайсь—Пётр Домокош, Будапештста Лоранд Этвешень лемса финно-угорскяй кафедрать вятиец, филологиянь наукань докторсь:
«...мон эняльдян инголет и тердян эсот сявомс минь кафедрасонк финно-угорскяй лекторонь ставкать. Сон Россиянь финно-угроветтненди панжевсь международнай договорть коряс, кона ульсь кемокстаф Венгерскяй Республикань Президентть Арпад Генцень Россияв и Российскяй финно-угорскяй республикава визитонц пингста.
Минь кематама: историянь ширде козя российскяй финно-угристикать и мирса лац содаф мордовскяй филологиять эзда Тонь кандидатураце тейнек ули инь оцю и питни сатфксокс... Тон улят васенцекс, кода финно-угорскяй кафедраньконь официальнай и постояннай преподавателец, и васенцекс кармат тонафтома минь студентоньконь мордовскяй кяльти и общай финно-угристикати.
Финно-угорскяй лекторонь статусть инкса Тейть максови квартира и (мзярс) «скромнай заработок» (В.Щ.: улема, тя синь арьсемасост—«скромнай»). Тя должностсь панжи од эпоха венгерскяй и общай финно-угристикаса.
Мон надиян, Тинь тевонь максыенте кудса (Москуса и Саранскяйса) шарьхкодьсазь тя тердемать питненц и анокт улихть лездомс тевть официальнай ширенц тиемаса. Тяка пингть, шарьхкодьсазь и сянь—минь мяленьке прась аньцек Тонь кандидатурацень лангс. Тя кизефксть коряс монь ульсть лама консультацияне содафтонга содаф финно-угроветтнень мархта (академикть Карой Редейнь, профессорхнень Габор Берецкинь и Ласло Хонтинь мархта), и минь сембе праме фкя мяльс: максомс тя должностть профессорти, филологиянь наукань кандидатти А.П.Феоктистовонди, конань пяк козя творческяй путксоц, оцюфт научнай сатфксонза и международнай признанияц, венгрань кялень содамац.
Кельгома Александр Павлович! Эняльдян, примак минь тердеманьконь». Путф П.Домокошень кядь сёрматфксоц и университетонь печать. Содаф, Александр Павлович ашезе полафта пединститутонь общежитияса комнатанц Венгриять столицаса квартира лангс. Улема, ашель мялец тумс эряма лия мастору. Кудса, Мордовияса, сон ульсь аф аньцек содаф, но и сембонди кельгови ломанькс, инь эрявикс тонафтыкс и ялгакс. Виде, пелемавок эздонза ульсь—аф сяфтома. Кялень пуромксса, студенттнень мархта панжада занятияса эрь корхтайсь кирдезе мяльса: кода ба аф прамс рдазти тяфтама ломань инголе, аф тиемс эльбятькс кяльть содамаса.
Аньцек тейне мзярдовок аф шарьхкодеви, мес тяфтама ломанць стаки ляткшнесь общежитияса. Спортсметтне, актёрхне, лия структураста профессионалхне сашендыхть и кизода-кафтта меле тушендыхть. Квартирась теест васенце вешфкссь и васенце надияфтомась.
Ужяленди, Александр Павловичень мархта лиссь лиякс. Кода корхнихть: «Мезеньке ули—аф ванфтсаськ, юмафтсаськ—аварттяма»...
Сонць Александр Павлович тя пичефксть ашезе няфне. Сон лац содазе эряфть таньфонц одстокиге. Кода сёрмадсь поэтсь Н.Пагирев: «Минь танцти эряфть содасаськ питненц—минь сяпи тишесь кшиньке ульсь». Аф ваномок эряфонь сталмотнень лангс, сон фалу мольсь инголи и панчсесь ки лиятненди, лездсь, кода маштсь. А сталмотнень эзда пря кой-коста аралакшнесь ялга ёткса, спортса и драмкружокса.
Кода азондозе тейне Краснослободскяй техникумста ингольдень студентсь, а сяльде Мордовскяй пединститутонь проректорсь, историческяй факультетонь деканць Василий Семёнович Ивашкин, А.П. Феоктистов одстокиге ульсь пяк прявий, сембе тевса кенери и тяка пингть цебярь ялга.
Россиянь Наукань академиянь языкознаниянь институтса филологиянь наукань докторсь, профессорсь Г.Ц.Пюрбеев А.П.Феоктистовонь мяляфтсы «…кода ломанень, кона фалу ульсь лидеркс научнай и общественнай эряфса, конань перьф пяк кельгозь пуромкшнесть институтонь сотрудникне, стака ситуацияса маштоль вятемс эряфонь и наукаса пялькстомать. Сон ульсь фалу пара мяльса, седиец панжадоль ломаттненди. Мон содаса сонь 1964 кизоста сявомок Саранскяи тумозонза. Павазуван, сяс мес улень профессиональнай тевса тяфтама научнай наставник и ялга видеса».
Валентина ЩАНКИНА,
Мордовия Республикань Высшай школань
Заслуженнай работник.

15.11.2018 №45
 
 
 

 
НОВОСТИ
 
 

Единороссы Мордовии направили свои предложения для работы на предстоящем Съезде Партии

Обсуждение предложений, направленных на совершенствование основных принципов работы  партии  и повышении ее роли в современном обществе, прошло в ходе  региональной  партийной  дискуссии «Обновление -2018»,   которая состоялась 16 ноября в Саранске. Дискуссия  объединила   четыре  тематических блока,  касающихся обновления партии и создания эффективной политической организации; повышения коммуникаций и  взаимодействия с общественными институтами; технологических подходов в избирательных кампаниях и в межпартийной конкуренции; реальных  дел в решении проблем  конкретных людей  и  развития   всех сфер жизни общества. Итогом  стало пленарное заседание, в ходе которого была обобщена работа дискуссионных площадок  и рассмотрены наиболее интересные предложения, прозвучавшие в ходе обсуждений.  Лучшие из них  направлены   Региональным  отделением   «Единой  России»  в   Центральный исполнительный комитет Партии для обсуждения  во время работы    площадок первого дня Съезда Партии.  В ходе  региональной дискуссии был представлен широкий спектр мнений  по  вопросам, касающимся  сохранения  доверия к партии избирателей и повышения эффективности работы партийных структур.

 

20.11.2018
 
 
 
 
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин