Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Юмор и сатира

Эрьготьф боранонь мельге

Эхи повонды алятненди! Минь, аватне, аньцек кода аф сюцесаськ: и стапт, и тяфтапт, мярьгат, мезеньге цебярь пакшкасна аш. А кда явихть, алять аш кашт молиец, сяс авась лангозонза сембе пяндратнень лозняфнесыне.
Ульсь тев, мирдезе кадондомань. Мес, тянь сяльде содасасть. А тяни ушедса кучкаста. Шоворсь поланязе омба велень ава мархта. Недяля тоса эряй, кафта, ков ётась и омбоцесь. Арьсень еложды-тии да мрдай. Пингсь мольсь, а сон ашезь срхксевок мрдамс, аньцек эрь ковня ярмаконь перевод эздонза сашендсь, роди эсь воля алиментт кучси.
Ванан, тефне кальдяфт, можна векть мирдьфтома эрямс. Весть еткшиста сяда рананя аделайне работазень, мярьгонь ниле цераненди лацкас щамс-карямс, озамс автобусс и пачкодемс ся вели, коса поланязе эряй. Ломаттне няфтезь кудть. Чакань-покань кенкшти. Панжезе эчказа ава. Кизефтине:
—Геннадий Иваныч Шольдерев тяса эряй?
—Да, тяса,—отвечась и тердемань куду. Ювадсь горенцяв:—Гена, тонь кизефнетядязь.—Авась варжаксни шамазон, пади, талакоткшии—киян. Церанень аф няйсыне, синь кадыне ульцяв.
Кухняв лиссь горенцяста поланязе. Козк няемань, шамац крьвязсь. Мон эстокиге озафтыне седиенц:
—Тят пеле, Гена, сялондома и тюрендема аф карман. Цератне ожанень цють ашезь сязенде: ускомасть, кле, аляньконди, пяк ни лажадоме. Синь нилексне ушесот.
Генань лафтувонц фталда пелезь варжаксни азоравась. Сявок, улема, учи скандал, а мон сяда тов корхтан:
—И тонга, ава ялгай, седицень пяк тяк сязенде. Апрякамат аш мезенкса, эрь авась эсь павазонц вешендьсы. Аноклака, ялгай, лямбе ведня. Автобусса пулияме и ливоськодоме, идняньконди и тейне штамс эряви. А сяльде ладняс-рядняс корхнетяма.
Тона, валонь апак аст,  крьвястезе газонь плитанц, эждсь ведь, венептсь сапонь и ару нардама. Мон серьгядине ушеста церанень.
—Шумбрат, аляй,—пшкядсь оцюсь.
—Шумбрат, аляй,—пшкядсть лядыксневок. Алясна отвечась—цють вайгяленц кулеськ. Ванан, абондсь, аф содасы, кода вятемс прянц. А мон стаки кошяряса азоравать:
—Тяни, ялгай, ужнафтомасть. Ся ушедсь шра лангс путнема мезец ули. Сюлеканявок таргась.
—Винанясь, ялгай, лишнай,—корхтан.—Мон ефси аф симан и тейнтьке афолень мярьге.
—Монга тяфта,—комафтозе прянц авась.—Тя аньцек инжиенди.
—Инжихненди и ванфтк, а минь аф инжихтяма! Гена варжаксни ширезон коня алга и мзнай. Минь аф эряскодозь ярхцатама. Авась старандай мяленьконь ваномс. А церане аф няемга салаване аляснон лангс варжакснихть. Урядаськ шра лангс аноклафть, азонь спасиба ужинонкса и аньцек эста кизефтине азоравать лемонц.
—Ия,—сетьмоняста отвечась сон.
—Да мезень тя лем! Кафта букваста... Да рахсемга, што ли, тяфтама лемса кивок казензе?
Вихцода пеедезевсь Иясь, мезевок изь аза. Эста мярьгонь аляти:
—Эрька, Гена, сявить цератнень пери, няфтьк, кодама куярхт-помидорхт тоса касфтоть. А тейнек Иять мархта, надиян, тоньфтомотка скушна аф ули.
Алясь срхкамбачк салаване яфчазе кяденц, няк, тяфта веши, штоба мезеньге кальдяв афолень лаподе. Монга люкафтыне прязень: тят пеле. Алятне лиссть, мон лездонь ава ялгазти урядамс шра лангть, штамс тарелкатнень-меснень. Тевоньконь тиеськ апак каштортт.
—Ну, а тяни, ава ялгай, эрька корхнетяма,—ушедонь тяда меле.—Мон осалнян, тон эчконят. Кда сядынголень весонь кафта пес озафтолемазь, тон, конешна, утялеть. Но, кда монь пезон озайхть нинге идне, эста тон кеподят кальда вяри. Вийсь-сталмось минне, мезевок аф тият. Церане сятявнят, но пряснон обжамс аф макссазь, вийсна—аляснон лаца. Кда кошардсайне, стане сейхттядязь, недяляньберьф шяярьхне аф сеендевихть. Вов кода может лисемс. Сяс, эрька, тевоньконь аделасаськ кельгозне, шумфтома-гамфтома. Паронь арьсезь эняльдян: прважак Генань сетьмоняста и стане, штоба китьке ширезт юксталезе. Тянь тиемац ёфсикс теждя: вдь судсь минь ашемазь явфта, Шольдерев стаки лувови тейне законнай мирдекс. А мархтот эряй... тонць содасак, кода тяфтама эрямати мярьгихть.
—Да вдь мон сонь ашине терне, сонць мумань. И азозе, кле, явфтада,—кашкомф вайгяльса ушедсь Иясь.—А прважамс—кода прважаса? Мезеньге кальдяв тейне изь тие. Мес Гена тусь эздот?
—Можна мярьгомс, стакащемда. Сон работамать кельгсы, эрь тевса шарьхкоди. Весть ялгац серьгядезе шабашкас. Тиезь тевснон и тяда меле стане «штазь»—поланязе цють крыленцяти пачкодсь. Мон самай крыленця куцеманятнень штань. Козк няине олаф сельмонзон и мятярдеманц, кяжиянь и нярь ланга рдазу нуласа стане кайсень—пяндра путьксне мянь шабрань вальмятненди ляцсть. Матыне удома. Сон омбоце шиня мезевок ашезь мяляфта. Но нуласа пиксоманц велень аватне вальмава няезь, кармасть алять рахсемонза, кие-бди сиде моронявок ладясь. Ну и Гена визькста да кяжда и ворьгодсь велеста. А сяльде, улема, эсь прянь няемась шорясь куду мрдамс. Вага и сембе, мезе ётксонколь.
—Мон арьсень, мезевок сяда оцю ульсь. А сон вона кода...
Ламос тяфта корхнеме. Мрдасть Гена и иденьке. Авась шарьхкодсь—ляттама пялонза удома—ушеса шобдаль ни, кизефтемань:
—Цератненди коза ацамс—куду или саду?
—Садса удотама, садса!—ювадсть тонат.
Церане кенярдезь лиссть кудста. Мирдезе, улема, няфтезе ни теест тоса удома вастть.
—А тонць, Даря, коза мадат?
—Кода коза? Мирдезень ваксс!
Авать нльне кашкомсь вайгялец:
—Да вдь... кода сонць…
—Аф кода сонць, а кода монць. Законнай рьвацан, тяк юксне!
Гена пикссеф пинень лаца салаване варжаксни то фкять, то омбоцеть шири, сонць вишкста якай горенцяста кухняв и меки. Ашень кирде, сялгине:
—Мес клеткаса леф лаца якат? Или прокс юкстамайть ни?
Сон стакаста мзнай, аф содасы коза кядензон тиемс. Спасиба, Иясь сявсь фкя кроватьста понацапт-месть и тусь кудонголи.
…Шобдава стяме рана.
—Тон, Ия,—мярьгонь авати,—кочкайть азорозень щамонзон-карямонзон, мезевок тят юкста.
Сянь шамац акшемсь, сельмонза якстерьхть, перьфсна сенепт. Валонь апак аст ушедсь кочкамост. Завтракть эзда атказаме. Мзярда сембось аноколь ни, мярьгонь цераненди лисемс палисаднику. Кудса лядоме колмоненк.
—Ну, мезе, Ия ялгай? Тят кяжия, мон аф тоннеть нельгине, а монценнеть мрдафтыне. Пади, цебярь ломань тейтьке муви. Спасиба, мес лац якать Геназень мельге, мес кирдить аруста-уряднайста. Тонга, Гена, аст спасиба. Арьсян, авать кальдявоц тейть ашель.
Алясь мезе-бди мторгодсь.
—Тяни пращаманди палада. Мекольцеда!
Вихца паласть. Иять шамава сельмоветтне снавкс кеворихть, а Гена сяконь содай—мзнай.
Вятине Геназень, кода эрьготьф боранонь. Азса, аванят, виде ваймот: алятне лияста улендихть прокс боран лацот—эсь ортаснон эрьфнесазь. Ванома да ванома мельгаст.
Вов и сембе. Эрятама лац, фкя-фкянь мезьсовок аф апрякатама. Рдазу нулать тяда меле вестевок тевс ашине ноля.
Аванят, пади, киндивок опытозе ладяй?
М.БЫЧКОВ.
 

15.11.2018 №45
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин