Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Тема дня

МОРДОВИЯНЬ АГРАРИЙХНЕ ТАГА САТСТЬ МЯЛЕНЬ КЕПОДИ САТФКСТ

16 ноябрьста республиканьконь столицаса—Саранскяйса ётафтовсь оцю ила, кона
лемтьфоль Велень хозяйствань и перерабатывающай промышленностень шити
Мордовия Республикасонк оцю мяль шарфневи велень хозяйствать виияфтоманцты. Тевс нолявихть тяниень пингонь технологиятне, коль сяда лама АПК-нь предприятия работайхть рентабельнайста, мезсь лезды валовай региональнай продуктаса велень хозяйствать талеканц касфнеманцты. Тядде сон ётазе 17 процентть. Аф васенце кизось ни Мордовиясь Поволжьяса и марнек Россияса инголи молихнень ёткса лофцонь, сиволень и алонь получамаса. Тянь и лиять колга мольсь корхтамась Велень хозяйствань и перерабатывающай промышленностень работниконь шиня, кона ётафтовсь 16 ноябрьста Культурань республиканскяй Дворецса.
Седи ваксста поздравляндамок велень хозяйствань и перерабатывающай промышленностень работникнень профессиональнай праздникснон мархта, Мордовия Республикань Оцюнясь Владимир Волков мярьгсь: «Велесь тейнек—кода нефтась Тюменьца. Кда тоса добувайхть сырье и мишендьсазь сонь, то тейнек эряви касфнемс сёра, жуватат, нармотть, перень сёрот, мишендемс сяда лама лофца, сиволь, алхт, велень лия продукция. Тяддень кизоть минь шумордасаськ цебярь результатса. Аф ваномок кизонь коське шитнень лангс, республикань паксянь труженикне кочкасть 1 миллион 114 тёжянь тонна сёра, эрь гектарста средняйста сявф 27 центнер. Кафксть ётай кизоть коряс кассь лофцонь и сиволень получамась. Ня показательхнень коряс Мордовиясь занязе васенце вастть Приволжскяй федеральнай округса. Нинге сяда кеняртьфтихть птицефабрикань коллектифнень сатфкссна. Тядде государствати прважаф 1 миллиард 400 тёжянь саразонь ал. Тя показательсь инь оцюсь марнек Россияса.
Мордовия Республикань Оцюнясь азозень ся райоттнень и хозяйстватнень, коса получасть сембода оцю урожай и мисть сембода лама лофца, сиволь. Тяфта, Атяшевскяй районць тядде кочкась 100 тёжянь тонна сёра, 35-38 центнеронь эрь гектарста средняйста сявсть Дубенскяй и Чамзинскяй райононь сёронь касфнихне. 50 центнерда ламонь сёра эрь гектарста получасть Инсарскяй районцта индивидуальнай предпринимательсь О.В.Пикаев, Рузаевскяй райононь «Исток» велень хозяйствань предприятиясь, «Октябрьская» птицефабрикась.
Получаф сахарнай якстеряпсонь пяк цебярь урожай. Инь лама тяфтама продукция получаф Атяшевскяй районца—141 тёжянь тонна, Ардатовскяйса—74 тёжянь тонна.
Оцю результатт сатфт и животноводстваса. Киза кувалмоста получави 300 тёжянь тонна сиволь, эрь траксста средняйста ули потяф аф кота тёжянь килограммада кржа лофца. Ня показательхнень эса оцю путкссна Лямбирскяй райононь животновоттнень. Кемонь ковста синь государствати  мисть 7 миллиартт цалковаень питнес продукция. Лофцонь получамаса васенце вастса молихть Большеигнатовскяй и Ичалковскяй райоттне, коса тячиень шити эрь траксста средняйста потясть 6500 килограммань лофца. Нинге сяда оцюфт результатсна башка хозяйстватнень. Тяфта, Ичалковскяй райононь «Дружба» велень хозяйствань предприятияса киза кувалмоста эрь траксста потяви 11500 килограмма лофца, кемонь тёжянень килограмма тяфтама жа продукция получави предпринимательть О.В.Пикаевонь фермаса, Рузаевскяй райононь «Рузово» хозяйстваса. Тядде оцю сатфкст лофцонь потямаса тяфта жа сатсть Старошайговскяй, Краснослободскяй, Инсарскяй, Кочкуровскяй, Темниковскяй райононь жуватань мельге якайхне.
Ули мезенкса шнафтомс пря и перерабатывающай промышленностьса покодихненди. Торжественнай пуромксса лятфтафоль «Золотая осень» всероссийскяй агропромышленнай выставкась, коса минь республиканьке тядде получась  золотань 25 медаль. Тя пяк ламонь колга корхтай.
Тяда меле казьфтольхть райоттнень, АПК-нь предприятиятнень, фермерхнень, личнай подсобнай хозяйстватнень, од специалисттнень ёткса пялькстомаса сяськихне. Казнетнень максозь Мордовия Республикань Оцюнясь Владимир Волков, МР-нь Госсобраниянь Председательсь Владимир Чибиркин, МР-нь Правительствань Председательсь Владимир Сушков, Правительствань Председательть васенце заместителец—МР-нь велень хозяйствань и продовольствиянь министрсь Владимир Сидоров.
Пуромфнень тяфта жа седи ваксста поздравляндазь Российскяй Федерациянь Государственнай Думань депутаттне Александр Воробьев, Виктор Кидяев, Мордовиять эзда сенаторхне Сергей Кисляк и Владимир Литюшкин.
Н.ЛОБАНОВ.

22.11.2018 №46
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин