ПАЛЫ СЕДИЕНЬ ТОЛОЦ, ЭЖДИ СЕДИЕНЬ МОРОЦ

Ковылкинскяй райононь Волгапина велеса шачф-касф мокшавась Надежда Дмитриевна Кольтяпина сидеста лятфнесы, кода лама кизода инголе школаса урокть пингста тяштсь сочинения. Тевсь ульсь сисемце класса тонафнемстонза. Сочинениять темац тяфтамоль: «Кодама профессия мяльце кочкамс сай пингть?» Надя ламос арьсема ашезь карма, а тетрадезонза эстокиге сёрмадсь: «Оцю мялезе работамс больницяса, якамс акша халатса, тиендемс уколхт, путнемс капельницат. Ёран лезнемс сярядихненди».
Школать шумордамдонза меле мокшень стирсь тусь Москуву и поступась 11№ медицинскяй училищав. Аделазе тоса тонафнеманц и 1978 кизоста сявомок работай Ф.И. Иноземцевонь лемса ошень клиническяй больницять Региональнай сосудистай центрасонза анестезиологиянь и реанимациянь отделенияса. Профессияс коре—медсестра-анестезист. Ули кода азомс, што Надежда Дмитриевнань арьсефоц ётафтовсь эряфс и сон сотозе эряфонц ломаттненди лездомать, синь эряфснон араламаснон мархта.
Но, аф ваномок стака работанц лангс, кона, мярьголень, аф сембонди вийс коре, Н.Д.Кольтяпинась фалу мушендсь и мушенды пинге национальнайти—мокшеннети. Нинге ёфси шабакс тонафнезе и сидеста морсезе акша сёралть колга мороть. Сембода пяк—тишень прдамста-лядемста. Аськолят, кле, паксять ланга и морат ронгса и ваймоса! И марясак пряцень павазукс. Волгапинань школаса тонафнемстонза морсесь рузонь, мокшэрзянь морот, вайгялец кайгсь концерттнень пингста. Москусовок тяфта ащи тевсь. Аф ваномок больницяса дежурстватнень пингста сиземать, кудъётконь тефнень лангс, Надежда Дмитриевна оцю мяльса уленди тя или тона праздникненди лемтьф мокшэрзянь пуромкснень эса. Якай репетицияс, коса тонафнихть и морсихть морот. Сембодонга кельгсыне мокшавась акапельнайхнень. Н.Д.Кольтяпина—«Тяштеня» ансамблень участник. Тя коллективть мархта сон ульсь Берлинца, Францияса, Амстердамса, Израильса и лия вастса. Аф кунара пуроптфоль «Азорава» ансамбльсь, коза сувасть мокшэрзянь несколька коллектифне, сяс участникне сядовок сидеста няфнесазь морамаса маштомошиснон.
«Мялезон мокшень щамсь. Мзярда щашендса, маряса прязень сяда павазуста и кеняртьфста. А кда нинге лисян моронь морама, эста ефси юкснян сиземать, реанимацияса ётафтф сменать колга.
Ужяль уленди, мзярда аф удалси киньге мархта полафтомс работаса и мон аф повондан тя или тона репетицияти или концертти»,—мярьгсь Надежда Дмитриевна.
Н.Д.Кольтяпинась сидеста лятфнесы Мордовиянь Волгапина велеса эряманц. 21 ноябрсь, православнай оцю праздниксь, Архистратигть Михаилонь и Менелень бесплотнай лия Вийхнень Соборсна, ёмла родинасонза лувондови престольнайкс. Михалу. Тяфта теенза мярьгихть мокшетне. Волгапинаса тя шиня пицельхть-панцельхть национальнай танцти ярхцамбяльхть, аноклакшнесть поза. Тянивок мокшавать шранц лангса Михалуста и оцю праздникста ащихть мокшень пачатне и, улема, сембе мокшетнень кельгома симомбяльсна.
«Оцю мяльса сашендан шачема шири—Ковылкинскяй райононь Волгапина вели. Аньцек пачкодян тоза, маряса прязень стане, бта седиезе тяниёк мяштьстон комоти. Лад арси мялезон, и тяка пингть, сельмостон кеворихть сельмоветтне. А мзярда сай Москуву тумань пингсь, бта мезе-бди пяк родной, мала кадат тяза. И тя мезсь-бди мархтот аф сявови. Волгапинаса пяк лама раднядон, но сашендан тядянь-алянь куду. Семьясонк ульсть 8 итть—4 акат-сазорхт и 4 альнякат-дугатт. Альняканьке, Анатолий, ужяль, тяни аш шиса. Алязе, Дмитрий Сергеевич Кольтяпин, Великай Отечественнай войнань участниколь. Тядязе, Марфа Егоровна, покодсь колхозса. Синьге тяни ашет шиса и тейне пяк аф сатнихть»,—азозе Надежда Дмитриевна.
Но мокшавать ваксса стирец Татьяна Владимировна. Сон работай фитнес-инструкторкс. Казсь  Надежда Дмитриевнанди кафта уноконят-стирнят. Александра—спортонь мастер синхроннай уендемать коряс, тонафни 10 класса, Софья тонафни 2 класса.
Н.Д.Кольтяпина Мордовия Республикань Культурань, национальнай политикань, туризмань и архивнай тевонь министерствать лемста казьф «Межнациональнай согласиянкса» медальса, сон аф фкя благодарность получсесь больницяса цебярьста работаманкса.
«Мзярда сашендан Волгапинав, якан эняльдема мархта содафоненди. Сятненди, кит тяштьфнихть «Мокшень правда». Анцеса кядьстост кельгома газетазень, конань, ужяль, аш кода получсемс Москуса. Морафнеса сонь оцю мяльса»,—азозе сон.
Надежда Дмитриевна Кольтяпина лувондсы прянц павазу ломанькс. Тяконь лувксса и сяс, мес пяшкодевсь идень пингонь мялец и сон арась акша халатса ломанькс.
Аф кунара, 16 ноябрьста, мокшавать шачема шицоль. Поздравляндасаськ сонь тя праздниконц мархта.
Арьсетяма тейть, Надежда Дмитриевна, кеме шумбраши. Кеме шумбраши—шумбрашинкса!
Т.АЛЬШИНА.