Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

«Минь содасаськ: мезе тихтяма и коза мольхтяма!»

 

 

 

 

—Анатолий Михайлович, кодамкс ульсь тяддень кизось Мордовия

 

Республикань Культурань, национальнай политикань, туризмань и архивнай тевонь министерствати и сонь республиканскяй и муниципальнай учреждениянзонды?

 

—Койсон, тяддень кизось кода министерствати, стане и сонь 

 

учреждениянзонды ётафтф мероприятиятнень серьснон и эрявиксшиснон коряс арась козя и пяк няевикс пингокс. Сявсаськ, кепотьксонди, футболть коряс Миронь чемпионатти, конань  матченза ётасть Мордовиять столицаса, аноклаф культурнай программать. Эсонза болельщикне и чемпионатонь лия инжихне няезь республикань культурать инь мазы и эсь лацонь ширензон.Лиякс мярьгомс, Мордовиянь театратне, концертнай организациятне, музейхне и библиотекатне, национально-культурнай центратне и национальнай культурань автономиятне сувафтозь чемпионатонь культурнай программати инь мазыть и цебярть, мезсь ся пингста эсост ульсь. Тяка пингть эряви азомс: культурнай программаса минь васенце вастти лихтеськ региональнай национальнай компонентть—мокшэрзянь национальнай культурать. И тянь вельде, койсон, тиеськ  Мордовия Республикать болельщикненди и чемпионатонь лия инжихненди ламода сяда мяляфтовикс. Шарьхкотьф, тя лездсь тейнек няевиста касфтомс-кеподемс туристонь лувксть. И, тяда башка, удалась келептемс республикань культурать мазышинц колга кулятнень  аф аньцек Россиянь региоттнень эзга, но и маластонь и ичкоздень омба масторга,  коста сашендсть пялонк болельщикт и лия инжихть. И аф эльбядян, кда азса: работась, конань футболть коряс Миронь чемпионатть пингста марстонь вийса тиезь республикань культурань учреждениятне, кеподезь Мордовия Республикать позитивнай имидженц од серьс.Конешна, аф аньцек футболть коряс Миронь чемпионатть пингста республикань культурань учреждениятне работасть виень аф ужяльдезь. Январь ковста сявомок и тяниень пингти молемс Мордовиянь театратне няфтсть зрительхненди од спектакльхть республикасонк, якасть гастрольс  Россиянь лия региоттнень эзга и международнай фестивальс. Од форматса и пяк удалафста Саранскяйса минь ётафтоськ «Соотечественники» Международнай фестивальть, концертнай организацияньке келиста няфтезь мокшэрзянь национальнай искусствать Россияса и омба масторса, кепотьксонди, Сирияса.

 

Республикань музейхне, библиотекатне, национально-культурнай центратне и национальнай культурань автономиятне тяфта жа ётафтсть од выставкат, васедемат республикань поэттнень и писательхнень мархта и лия

 

мероприятият, конат аф аньцек виияфтозь республикань лама ширдень культурать, но и няевиста кемокстазь российскяй нациянь нароттнень  ёткса межнациональнай соткснень аф аньцек Мордовияса, но и Россиянь лия региоттнень эса, коса компактнайста эряйхть мокшэрзят.

 

И мекпяли  нинге ёран азомс: сембе тя работать Мордовия Республикань Культурань, национальнай политикань, туризмань и архивнай тевонь министерствась и сонь республиканскяй, муниципальнай учреждениянза тиезь, кирдемок мяльса вешфкснень, конат путфт культурать инголе Российскяй Федерациянь Президентть В.В.Путинонь Федеральнай Собранияти и Мордовия Республикань Оцюнять В.Д.Волковонь Государственнай Собранияти Посланияснон эса.

 

—Кода содасаськ, Анатолий Михайлович, министерствать эрь кизонь работаса няевикс и башка вастс фалу лихневихть-путневихть национальнай политикань кизефксне.

 

—Тя афкукс тяфта. И лиякс межнациональнай сфераса работамс аш кода. Тякоть ули кода азомс религиять мархта сотф кизефксненьге коряс,

 

конатнень мархта тейнек тяфта жа сашендови работамс.Конешна, тяса нинге эряви азомс: цебярьста вятемс-тиемс тевоньконь межнациональнай и межрелигиознай сфераса тейнек няевиста лезды Мордовия Республикань Оцюнять видеса Межнациональнай и межконфессиональнай соткснень коряс Советсь.  Эзонза сувсихть Мордовия Республикань исполнительнай властень, местнай самоуправлениянь и исполнительнай властень федеральнай территориальнай оргаттнень руководительсна, а тяфта жа республикань общественнай национальнай, религиознай организациятнень и научнай сообществать представительсна. И эрь мероприятияса, конат миньцонк ётафневихть Международнай, Всероссийскяй, Межрегиональнай, республиканскяй, межрайоннай и районнай уровеньца, исполнительнай властень, местнай самоуправлениянь и общественнай организациянь представительхне фалу работайхть мархтонк виень апак ужяльтть.

 

Марстонь тя работать цебярь итогонзон няфнесазь социологическяй исследованиятне, конатнень эрь кизоня Мордовияса ётафнесазь республиканскяй и федеральнай социально-экономическяй мониторингонь Научнай центратне. Синь даннайсна няфнесазь: Мордовия Республикась межнациональнай и межрегиональнай сфераса сембе ширдень соткснень кемошиснон коряс лама киза ни Российскяй Федерацияса лисенди     васенце васттненди.Тядде тя сатфксть сатоманцты тяфта жа няевиста лездсть тейнек мероприятиятне, конат ётафтовсть Международнай, Всероссийскяй,

 

Межрегиональнай, республиканскяй и районнай уровеньца. Нят—«Волгась—ялгаксшинь ляй. Волжскяй нароттнень культураснон диалогсна» Международнай этнокультурнай экспедициясь-фестивальсь, «Шумбрат», «Велень озкс», «Акша келу, «Сабантуй», «Шумбрат, Мордовия!» республиканскяй национальнай илатне, «Мусульмане России: гражданская идентичность и современные форматы межкультурного взаимодействия» Всероссийскяй форумсь, «Малые жемчужины России» фестивальсь, кона ётафтовсь Темниковскяй муниципальнай районца, и лия оцю и ёмла форупне.

 

—Коса тядде мольфтевсть тефне Республикать столицаса и муниципальнай райоттнень эса туризмать виияфтоманц коряс? И кода работасть республикань музейхне и архифне?

 

—Тяса, васенцекс, эряви азомс: футболть коряс Миронь чемпионатть пингста республикань туризмась няевиста ушедсь касома. Болельщикнень и чемпионатонь лия инжихнень мяльс тусть аф аньцек республикань музейхне, библиотекатне, стадионць и спортивнай лия сооружениятне, но и туристическяй маршруттне, конат теест аноклафтольхть Мордовиянь муниципальнай райоттнень эса.Кирдемок мяльса тя цебярь рабочай опытть, минь, конешна, ушедоме виияфтома туристическяй отраслять сяда тов. Кода Мордовия Республикать столицаса, стане и муниципальнай райоттнень эса нолдафт тевс туристическяй од маршрутт.  Эсост васенце вастса ащи республикань музейхнень, библиотекатнень и национально-культурнай центратнень потенциалсна.Башка пара валхт тяфта жа ули кода азомс республикань музейхнень и архифнень работаснон квалма, конатнень выставкаснон и лия мероприятияснон ванозь тёжятть ломань. Конешна, тя отраслясовок тейнек ули коза касомс. И минь тянь лангса работатама.

 

—Анатолий Михайлович, кода тядде министерствась и сонь учреждениянза работасть федеральнай программаса и проектса?

 

—Тядде культурань государственнай и муниципальнай учреждениянь руководительхненди минь ётафтоме республиканскяй кафта семинархт, конатнень пингста тонафтоме эсост сяда маштозь работамс федеральнай программаса и проектса. И, эряви азомс, ня семинархне макссть лама-мезе учреждениянь руководительхненди  сяда маштозь работамс ся вешфкснень коряс, конат путфт культурать инголе  Россиянь Президентть В.В.Путинонь «О национальных целях и стратегических задачах развития Российской Федерации на период до 2024 года» Указсонза. Кепотьксонди, «Большие гастроли» федеральнай проектть рамкаса Мордовиянь национальнай драматическяй театрась якась гастрольс Татарстан Республикав и Ивановскяй области, Мордовиянь някань театрась ульсь эсь спектаклензон мархта Ингушетия, Марий Эл Республикатнень эса  и Волгоград ошса.Тяфта жа удалафста культурань республиканскяй и муниципальнай учреждениятне работасть «Культурная среда», «Творческие люди» и «Цифровая культура» проекттнень вешфксснон коряс, а тяфта жа «Единая Россия» партиять «Культура малой родины», «Местный дом культуры» проектонзон эса. И, конешна, мольфтевсь работась «Президентскяй грантонь фондть мархта». Кепотьксонди, тя фондста тядде «Малый художественный альтернативный театрик» Мордовиянь театрась-студиясь спектаклень путомс сатсь 1,2 миллион цалковай. Надиян: федеральнай и партийнай проекттнень рамкаса, а тяфта жа «Президентскяй грантонь фондть» мархта республиканскяй и муниципальнай учреждениятне тяфта жа эрьгавста кармайхть работама  сай кизотьке.

 

—Малаткшни Од кизось. И сон, Анатолий Михайлович, улема, путы республикань культурать инголе од кизефкст.

 

—Минь тянди аноктама, сяс мес содасаськ: культурась, кода и эряфсь,

 

фалу касонкшни, вииякшни и полафни. Сяс Мордовиянь культурань работникненди арьсян Од кизоть васьфтемс и ётафтомс шумбрашиса, валда мяльса и эрьгаса пяшкотьфста. Тяконь  арьсеса «Мокшень правда» газетать лувиензонды и сембе ломаттненди!

 

 

В.Нестеров.

 


14.12.2018 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин