Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Наши мокшанские сыновья и дочери

Профессорть эряфонь киц

Степан Ильич Липатов шачсь 1938 кизонь 10 декабрьста Ковылкинскяй райононь Сире Сомай мокшень велеса. 1957 кизоня кармась тонафнема Мордовскяй госуниверситетса. Аделамдонза меле тусь Краснослободскяй райононь Зайця вели шабатнень мокшень кяльти и литературати тонафтомост.

 

1964 кизоня Липатов сась тонафнема Мордовскяй госуниверситетть видеса аспирантурав, конань аделамда меле покодсь мокшэрзянь кялень кафедраса васенда преподавателькс, а тоса старшай преподавателькс, а 1974 кизоста сявомок—сон доцент. Мзярда филологиянь факультетса панчфоль мокшень кялень кафедра, сон путфоль кафедрань вятикс, коса покодсь аф фкя киза, арась профессоркс.

 

Аспирантураса сон тонафнезень финно-угрань кяльхнень, сёрмадсь диссертация «Рыбкинань-Мамолаевань эряйхнень корхтамаса башка ширетне», конань лац аралазе 1972 кизоня Эстониянь Тартувонь университетса. Тя работати макссть цебярь питне учёнайхне финно-угроветтне.С.И.Липатовонь кандидатонь диссертациянц лангс башка мяль шарфтсь и шназе сонь академиксь Пауль Аристэ. Аф стак сон ульсь теенза оппонентокс.Степан Ильич эсь диссертациясонза ванондсыне аф аньцек Рыбкинаса и Мамолаеваса, но и Поникедь, Валгапеле, Сире Сомай, Сире Толку, СиреТерьган, Зайця, Сире Лепию, Сире Потьма, Сире Маманя, Цятна, Керата, Шямонь, Родя, Од Толку, Од Сомай, Сомазляй, Од Лепию, Од Потьма, Од Маманя велетнень эса корхтаматнень фонетикань и морфологиянь системаснон. Сембе ня велетне ащихть Краснослободскяйть и Ковылкинать ёткса Мокша ляйть кафцьке трваванза.

 

«Учёнайсь сёрмадсь стама исследования, кона эряви аф аньцек лингвисттненди-теоретикненди, но и практикненди,—тяштсь С.И.Липатовонь колга фкя статьясонза сонь ингольдень студентоц, а сяльде Мордовскяй госуниверситетса марса работай пяк цебярь ялгац Н.С.Алямкин.—Степан Ильичень исследованиянь интересонза ульсть пяк келихть: сон ванондозень фонетикань, морфологиянь и лексикань ламоц кизефкснень мокшень литературнай кяльса и диалекттнень эса. Оцю мяль учёнайсь шарфнесь национальнай школаса родной кяльть тонафнеманц лангс».Сяда тов статьять сермадыец Н.С.Алямкин пачфни, што С.И.Липатов тяштсь мокшэрзянь кяльхнень коряс 100-да лама научнай и историческяй статья и мокшень кялень методикаса и стилистикаса методическяй пособият студенттненди, сувсесь «Грамматика мордовских языков», «Лексикология современных мордовских языков». «Методика преподавания мордовских (мокшанского и эрзянского) языков» вузонь учебникнень тяштиснон-аноклайснон ёткс. Пяк лама вий сон путсь мокшень кяльса сёрмадомань, корхтамань норматнень и «Мокшень-рузонь» валксть анокламаса.Научнай работанза нолявсть аф аньцек республикасонк, но и омба масторонь журналса, конат лисендсть Эстонияса, Финляндияса.Диалектологиянь экспедициятнень пингста С.И.Липатов улендсь мокшень ламоц велева аф аньцек Мордовияса, но и лама регионца  Пензенскяй, Рязанскяй, Самарскяй областтнень эса, Татарстанца. Кочкась тоста козя материал. Лама кизонь работада меле лиссть сонь тяфтама статьянза: «Мокшень кяльса раднянь и семейнай свойствань термиттне», «Щамань-карямань термиттне мокшень кяльса», «Ботаническяй лепне мокшень кяльса» и лият. Синь пара мяльса лувондсазь аф аньцек учёнайхне, но и учительхне и студенттне.С.И.Липатов лама тиендсь и мокшень школатнень эса родной кяльть тонафнеманц цебярьгофтоманкса, сёрматкшнесь рецензият школьнай учебникненди и учебнай пособиятненди. Методикань коряс статьянза

 

 

сидеста лисендсть «Мокшень правда» газетаса и «Мокша» журналса,

 

 

«Учительхненди лезксонди», «Родной кяльть арушинц инкса» и «Корхтатама родной кяльть и сонь тонафнеманц колга» рубрикатнень ала, коса авторсь кепсесь пяк эрявикс кизефкст.

 

Степан Ильиченди сашендсть лезксонкса од, лингвистикаса васенце аськолксонь тиенди  аспиранттне, студенттне. И мзярдовок ашезе ужяльде сон аф пингонц, аф виензон—сембонди лезнесь, макссесь пара советт.Липатовонь сембе эряфоц—научнайсь, педагогическяйсь и общественнайсь—тя творческяй вешендема, конань эзда лац няеви и эряфти кельгомась.Кулось Степан Ильич Липатов 1997 кизонь 12 сентябрьста. Калмаф Саранскяйса.

 


14.12.2018 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин