Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Наши мокшанские сыновья и дочери

«Терди эсонк Илья Девин эрь кизонь илас—Девинскяй лувомас»

Васенце Девинскяй лувоматнень пингста Старошайговскяй райононь оцюнясь Геннадий Александрович Мухин мярьгсь: «Катк тя мероприятиясь арай цебярь койкс минь районцонк. Сон эряви ётафнемс эрь кизоня мезенге лангс апак ватт».

 

28 ноябрьста 13 частти Сире Теризморгань Национальнай культурань центрав кочкавсть Илья Девинонь творчестванц кельгиенза. Традицияс коре, мероприятиясь ушедсь панчфонь путомаста и поэтть бюстонцты сюконямаста. Ошста састь инжихть, сят, кит лац содазь и ульсть малат Илья Максимовиченди: Мокшэрзянь народть Межрегиональнай общественнай организациянц председателец Юрий Александрович Мишанин, Мордовия Республикань Заслуженнай поэтсь Раиса Константиновна Орлова, Мордовия Республикань Заслуженнай артисткась Галина Николаевна Макшева, Мордовия Республикань А.С.Пушкинонь лемса Национальнай библиотекань главнай библиотекарсь Вера Ивановна Пронина. Тяфта же Девинонди сюконясть Сире Теризморга велень администрациянь оцюнясь Светлана Фёдоровна Виляйкина, школань директорсь Светлана Дмитриевна Автайкина, И.М.Девинонь лемса библиотекань работникне, велень эряйхне.

 

Центрань фойеса панжевсь выставкась, коса кочкафтольхть Девинонь стихонь сборниконза, фотографиянза. А ся пингть сценать лангста кайгсть стихт, морот, конатнень седи ваксста азондозь школань тонафнихне. Илать петезе Сире Теризморга велень Народнай хорсь. Оцю мяль вельде няфтсть инструментальнай номер Виктор Пивкин и Николай Родькин. Синь пачфтезь зрительхненди «Панжи, панжи лайме порась» композициять. Сяльде, тяка же мороть коряс, кштисть мокшекс наряжаф стирьхне.  Эрь кизоня тя илась ётафневсь эсь лацоннекс. Вановсь поэтть и войнань пингонь, и кельгомань, и идень творчествац. Но тяфтама ила, коса Девин пуроптомазь Велень ульцяс, нинге ашель.  Сядынголе кочксевсть тяфтама ульцяс велень эряйхне: морсесть морот, сиде моронят, лувондсть стихт, кштишендсть гармошка инголе. Ульцяса аф весть ульсь и Илья Максимович, сон кельгозень сире пингонь мокшень моротнень, кштишендсь скрипка и волынка инголе, маштсь шутендама.
 Тяддень 13 ноябрьста топодсь 20 киза, кода поэтсь аш ётксонк. Сон кадсь тейнек седиень токай валхт: «Лемозень эсь ёткстонт тясте нарда». И  Девин аф юкстави эсь творчестванц инкса, кона, кода ару лихтибря пси мани шиня, эшентьфнесыне минь ронгоньконь, кона кода лямбе толня тялонь якшама шиста эжнесыне седиеньконь.Лама лятфнемада ульсь иласа Илья Максимовичень колга. И нинге сяда лама пингта эряволь, штоба поладомс ня лятфнематнень. Пяк надиятама, што тяфтама васедемада кармай нинге аф фкя. А  етафтф мероприятиясь, надиятама, кады аньцек пара мяльхть ваймозонк.

 

С.ВИДЯСОВА,

 

Сире Теризморга велень Национальнай культурань центрать директороц.

 


14.12.2018 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин