Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

МУЗЫКАСЬ занци оцю васта эряфсонза

Шачсь Александра  Григорьевна Инсар ошса. Валонзон коряс, музыкати кельгомась эсонза эвондась нинге шабакскиге. И тянкса сон азонды оцю спасиба 1№ Инсарскяй средняй школань музыкань учительти Светлана Владимировна Анисимовати. Самай сон  эвондафтозе Сашать эса сценати кельгомать. Школаса тонафнемста А.Чекашкина аф весть выступандакшнесь районнай и школьнай пуромкснень эса, Культурань республиканскяй Дворецса.

 

2006 кизоня, шумордамок школать сиянь медальса, Александра  поступась Нароттнень ялгаксшиснон Российскяй университету. Васенце   курсса тонафнезень омба масторонь кяльхнень. Тя университетть интерклубсонза арась содафокс классическяй вокалонь студиять художественнай руководителенц Галина Фёдоровна Матюховать мархта. Сон ламоса лездсь стирти. Васендакиге, тонафтозе морамань тевти. Тяфта ульсь студенческяй сембе кизотнень.

 

2007 кизоня А.Чекашкина сяськсь «Радуга талантов» студенческяй творчествань фестивальса, морамок Патрисия Каасонь «Monmecamoi» моронц. Тянкса теенза максфоль казне—Хорватияв молема, коса мокшень стирть выступлениянза тусть ваныхнень мяльс. Александра Григорьевна омба масторса улемстонза пачфнесь тостонь эряйхненди Россиять и Мордовиять колга.Классическяй вокалонь студиясь ульсь российскяй ламоц ошнень эса и фалу кулендсь шнамань валхт. Инь мяляфтови пуромксокс А.Чекашкинати ульсь родной университетонц 50 кизонь топодемац. Эста, странаньконь главнай сценасонза—Государственнай Кремлевскяй Дворецса сон кштись и моразе «Эх, мордовочка» мороть. Кштимать смекамс-путомс и мора кочкамс теенза лездсть Москуса Мордовиянь Постояннай Представительстваста активисттне Л.В.Круглова и Н.Т.Кувезенкова.«Эсь кялень, коень-обуцянь кельги ломаттнень вельде мон повонь «семьяс», конань лемоц Москуса Мордовия Республикань Постояннай Представительствась. Эсонза Россиять столицаса эряй мокшетне и эрзятне марясазь пряснон кода кудса. Тяса ётнихть     концерттненди, пуромксненди анокламат, репетицият»,—мярьгсь Александра Григорьевна.Тяни мокшавась Главнай военнай прокуратурань   военнослужащай. Конешна, аф тёждя уленди кандомс службать и примсемс участия пуромкснень эса, аноклакшнемс выступлениятненди. Но Москувонь Мокшэрзянь землячествать   концертонзон эса уленди оцю мяльса. И тя канни теенза оцю кенярдема. Тяддень февральста Мокшэрзянь землячествась прважазе Масланцять и тя концертса Александра Григорьевна ульсь пуромксонь вятикс. Августста Москувонь Кузьминки ваймамань паркса ётась «Шумбрат» праздниксь. Ноябрть песта, мокшетне и эрзятне васьфнесть Г.В.Плехановонь лемса Российскяй экономическяй университетть «Конгресс-Центр» ДК-сонза.

 

 

Ёфси аф кунара Александра арась «Пою моё отечество!» музыкальнай международнай фестивалень-конкурсонь лауреатокс. Тя фестивальсь-конкурссь ётафтовсь «Красная гвоздика» национальнай патриотическяй моронь содаф фестивальть-конкурсть, «Музфонд» музыкальнай культурать и искусствать пропаганданц, ширень кирдеманц и виияфтоманц коряс  фондть, Евразиянь нароттнень Ассамблеяснон Композиторонь и музыкальнай деятелень Советть патронажснон ала.

 

Фестивальса-конкурсса Александра Григорьевна васенцеда концертса примась участия  Наукань Российскяй Академиянь Ученаень Центральнай кудть А.П.Бородинонь лемса симфоническяй оркестранц концертса. Сонь художественнай руководителец Павел Борисович Ландо. Александра Григорьевна Чекашкинать валонзон коряс, инголе сонь учсы лама мезе мялень салай. 2020 кизоня топоди 60 киза Нароттнень ялгаксшиснон Российскяй университетти, коса мокшавась тонафнесь. Сон примазе тянди лемтьф праздникть ётафтыензон тердемаснон и тии выступления Государственнай Кремлевскяй Дворецть сценасонза. Пингстонза мяль шарфты шачема масторти—Мордовияти. Надияй, што пингоц саты семботи: военнай службати, выступлениятненди, семьянцты.

 

«Сяда тов виияфнесайне сотксонень Москувонь Мокшэрзянь землячествать мархта»,—азозе сон. А.Г.Чекашкинать мирдец, Юрий Алексеевич Ковдий, кассь Инсарса. Тяни миртть-рьват эряйхть Москуса.

 

Т.АЛЬШИНА.

 


14.12.2018 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин