Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Эхи весяла автобуссонк!

—О-го-го!.. Сталботь, тинь тяса маштыхть морама алашань пулоста сязьф шяярьса? Хи-хи-хи...А салонть омбоце песта кулят: —Ожу-ожу, Гитаровка? Ся коса?... А-а-а, марьсине, алязе тоста рамсесь эсь тиф гитара. Ну-у, лац морась! Кле, стапт тиендсь аньцек Паганини... —Мле, Паганини,—эцесь корхтамати салонть кучкац.—Паганини аньцек морсесь, и то аф гитараса, а скрипкаса, конатнень тиендезень Страдивари...Корхнихнень шамасна-сельмосна аф няевихть, мес автобуссь, кода най, мараф ломаньда прядоня вельф. Но вайгяльснон коряс, нят од ломатть, конат пяк кельгсазь оржа валса калякондамаснон народть инголе, кле, кулхцондода, кяленьке бритвакс ащихть, кинь-повсь пеедьсаськ-рахасаськ аф Петросянда-Хазановда или Винокурда-Шифринда кальдявста. И вов весть тяфта ардомстон (тейне эрявсь Гитаровкав фкя тевонь мельге), сувань автобусу эсь остановкасон—сон Гитаровкав ардомста ошеньконь песа,—а салонца аф тароват, аф шароват,—сняра ломаньда. —Вага нинге фкя сувась,—лангозон коня алга варжакстсь Петросянонди шары од алясь, аф шахматистсь тяфтама жа фамилияса, а юмористсь.—Корхнень вдь, корхнень: в час пик тяда лисенде кудста, господа пенсионеры, бабанянтень ваксса, кинь ули, нувседа, да телевизор ванондода. А то тячи магнитнай бурят ушеса, организмать лангс аф стане тутордыхть. Числась кодама? То-та, седьмой... Тячись аф благоприятнай...Маряса, рахама вастонди тиендьсамань Гитаровкань Лжепетросянць, и мон видекс мяльхть ювадень салонть келес:
 —Да тинь мезе тиенттяда, ломатть? Ширезонт сонць Евгений Петросян арды, а озамс вастоня ашеде када цёрати? Кода стане махть максость, а? Арьседова, мезень концерт няфти сон, люпштандярятада лангозонза сембе ширде, вдь пярмоц, сяконь ватт, лиси, а? А ну, шамдода васта тяникиге!
 —Петросян катк Москуса няфнесыне концертонзон, а минь улихть минцень,—перечась эсон кие-бди.
Васенда Гитаровкань Петросянць рахась кургонь келес. Сяльде, ванца, сетьмось, улема, шарьхкодезе: сонь лувондсазь аф Гитаровканнекс, а Москувоннекс. Дурак дурак, а ролезонза сувась и ушедсь:
 —Минь тоса стама концертт няфнетяма, нльне депутаттне пелихть эздонк.Кулезь тянь перьфканза ардыхне, сияк шамдсть кафта вастт. И минь баяркс ардоме кафта остановкат. Колмоце остановкада инголе Гитаровкань Петросянць кизефнесамань вежлявняста:
 —А тон обкомонь секретарькс ашеть работа?
 —Мзярда?
 —Застойнай пинкнень, конешна. Мес-бди шамас коре няеват содафокс... Мон вдь коса аньцек ашень уленде, тинь ошсонтка няфнень концерт...
 —Аш, изень работа,—аньцек и кенерень мярьгомс тякоть, валнень сязезень пинень увама: «Гав!  Гав!  Гав!..» Народсь—кие рахась, кие пешкодсь, маряк, пинесь эвфтезень вакссонза ащихнень,—ушедсь корхтафтома фкя и сяка темать:
 —Безобразия! Ломаттненди аш мезьса арнемс работама и работаста куду, а тяса врьгаст усксихть!
 —Тонць  врьгазат!
 —А сон мес врьгаз, вдь алясь виденц корхтасы.
 —Тонга сёлгк кургцень, а то пейхненьге аф кочкасайть.
 —Милиция... Лоткафтк автобусть, водитель... Алянь, авань, идень вайгяльхть кеподстъ салонть келес. Кие-бди лятфтазе кунара азф смузть: «Кому не хочется, пусть на такси ездит, теперь демократия!..»
 Маряса, пинеть инкса ушеткшни, кода тяни корхнетяма, оцю конфликт. А сонь азороц, кафтошка метрань сереса алясь, юватькшнесь мезе повондсь кяльбрязонза, гразясь, кле, ульсь ветеринарнай лечебницаса и врачсь мярьгсь, кле, монь пинезе питни породань, сяс эряви арфнемс пчкамозонза транспортнай средстваса.
 —Ну и арнефтьк, кие кирнетянза, вдь вов мзяра пульхки машинада!—кулевсь авань шуваня вайгяль, маряк, сонь пильгонзон ваксс ладязе вастонц пинесь.
 —А мон колмочесь Гитаровкаста Балалаевкав усконь автобусса ведраж и кивок мезевок аш,—тевть эсь лацонза шарьхкодезь мярьгсь фкя алясь.
 —Тувотка усксетяма, учатка!—пешкоткшнесь тяка маласа авась, конань кяскавса мрнясь вачеда пурхц.—Тяни што ли эсь лангсонк? Ётасть ся пинкне, саты. Тяса ашень кирде, стянь озамнязень лангста и ювадень:
 —Катк азсы валонц содаф артистсь-юмористсь Евгений Петросян. Мезе сон мярьги—стане и тисаськ, виде вдь, Евгений Ваганович?—шарфтонь вакссон озада цёрати, кона афкукс пяк шарсь Петросянонди.
 Салонца кулевсь «ура-а-а!». Сембе упорендасть Петросянонди шары цёрать лангс. И аньцек тяда меле панжевсть автобусонь кенкшкятне. Ульцяса ни кие-бди рахась: «Да тя минь шабраньконь ширеса эряй марень и абрикосонь мишенди Артанянць... Шкабаваз, мусть Петросян!..»
 Мон лоткань шуфтонь седяфкаста вачкаф куднять инголи, конань конянцты эрьхтьфоль тяштькс: «Балалаевка».

Илья ДЕВИН.

 

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022