Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

События

Мордовия Республикань Оцюнять Од кизоть мархта поздравленияц

Инь кельгома, лямбе и семьянь праздникта инголе минь  тиенттяма ётай кизоти итокт и строятама платт сай пингонди. Ётни кизось ульсь минь странаньконди, Мордовияти, сембонди тейнек аф теждякс. Сон няфтезе, кодама питни стабильностсь, обществаса ладямась и марса улемась. 2018 кизоня республикань эряйхне марса сембе странать мархта примасть участия кафта оцю событияса. Нят Российскяй Федерациянь Президентонь кочкаматне и футболть коряс Миронь чемпионатсь. Мартста Владимир Владимирович Путин кирдсь кеме сяськома, ломаттне кемоста кирдезь ширенц. Минь вайгялень максомань результатоньке нинге весть няфтезе, што Мордовиянь народсь фкя-фкянь мархта сотф кеме сотксса, ответственнай и ваны инголи. И мезсь пяк важна—минь машттама мяляфтома цебярть и улемс благодарнайкс. Минь азонттама оцю спасиба государствань Оцюняти инициативаньконь ширеснон кирдеманкса, конат водендафт республикаса эряфть цебярьгофтоманкса. Футболть коряс Миронь чемпионатсь, конань матченза ётасть Саранскяйса, официальнайста лувф инь цебярькс сембе пингонь историясонза. Минь  республикань сембе эряеньконь работаснонды, конат примасть участия турнирть анокламаса и ётафтомаса, тя питни оценка. Минь няфтеськ сембонди, што тейнек вийс коре и маштозь ётафнемс планетарнай масштабонь событият. Пяк важна, што од китне, аэропортсь и вокзалхне, благоустроендаф эряма васттне, спортивнай центратне, жилищно-коммунальнай хозяйствань объекттне тячи ни цебярьгофнесазь эрть эздонк эряфоньконь качестванц. Мялямсь историческяй         событиять колга, конанди минь араме участникокс, сонь ваймоц и праздникть атмосферац лядыхть мархтонк сембе пингс. Аф ваномок стака экономическяй ситуациять лангс, минь сатоме  промышленнай производствань касома, велень хозяйстваса цебярь результатт, пяшкодеськ сембе социальнай обязательстваньконь. Касыхть эряма вастонь и кинь строямань объемпне, сяда тов мольфтеви тяниень пингонь инфраструктурань тиемась. Од кизоня учсамазь оцю созидательнай работа, конанди ули кода обеспечендамс эряфонь ламоц сфератнень эса афкуксонь сатфксонь сатома. Содаса и надиян, аньцек видексонь созидательнай трудсь и марса улемась, кода и фалу, кармайхть вятема минь инголи. Катк туйхть ётай пингонди сембе кальдявсь и тушенкшни кизонь сембе афсатыксне, а сембе цебярсь ванфтови и ламолгофтови. Седи ваксста арьсян, штоба 2019 кизось кандоль эрь кудти мир, ладяма, ваймонь сетьмоши и достатка. Шумбраши, паваз, кельгома, сембе цебярть и катк пяшкодевихть пара мяленте-арьсеманте. Од киза мархта, кельгома ялгат!
 
Мордовия Республикань Оцюнясь В.Д.Волков.
 

28.12.2018 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин