Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Тема дня

ИЛАСЬ ВАСЬФНЕВИ КУНАРДОНЬ ПИНГСТА СЯВОМОК

Мзярда ушедсть васьфнема Од кизоть Русьса
Кунардонь пингонь славяттнень календарьсост кизотнень лувомасна вятевсь «мирть пуроптоманц» эзда, кона ульсь 5508 кизода минь эрадонк инголе. Од кизось ушеткшнесь 1 мартста—паксятнень лангса тундань тефнень ушедомаснон мархта. Х векста (988 кизоня) ульсь Русть кстиндамац, а тянь мархта эвондась од календарсь. Тяни Древняй Русьса Од кизось ушеткшнесь церьковнай календарть коряс 1 мартста, а гражданскяйкс—1 сентябрьста. 6850 (1342) кизоня митрополитсь Феогностий лоткафтозе мартста Од кизоть васьфнеманц, кадомок и церькавти, и миряниттненди аньцек сентябреннеть. А 1699 кизонь 15 декабрьста, мзярда Русьса мольсь «мирть пуроптомста», 7208 кизось Петр I нолдась Указ, конань эса мярькфоль «лувондомс Од кизоть аф 1 сентябрьста, а 1 январьста сявомок».
1700 кизонь 1 январьста Петр I сонць вятезе праздничнай шествиять, кона шумордавсь кайги салютса. Вов тяфта Русьса васенцеда васьфтьфоль Од кизось кода европеецнень—тялонда.
Эрь странать сонцень коенза
Кунардонь пингста сявомок Од кизоть васьфнезь мастор лангонь сембе нароттне, вдь «кода Од кизоть васьфтьсак, стане сонь и етафтсак». Сяс старандасть анокламс сяда козя шрат и казнет. Эрь народсь васьфнесы илать эсь лацоннекс. Англияса кузняда башка, кудсь мазопневи омелань тараткаса. А Италияса Од кизоня плхнесазь ташта паршихнень. Францияса Мороз Атясь—Пер Ноэль—сашенкшни Од кизонь веня и путни казнет идень пильгс щаматненди. Сянди, кинди пови снав од кизонь цюкорть потмоста, макссеви «снавонь королень» лем, и тя веня сембе кулхцондыхть эсонза. Кузнять перьфке путневихть шуфтонь или севонень налхкшкат—сантотт. Швецияса Од кизонь карша кочксесазь валдонь королевать—Люциять. Сонь наряжакшнесазь акша панарса, прязонза путнихть палы штатол мархта корона. Люция канни казнет шабатненди и мезеньге танцтиня кудонь животнайхненди: катоти—слива, пинети—сахарнай пакарня, осликти—пурьхкя. Кубаса Од кизоть учемста кудса уликс кукшеннятнень, ведаркатнень, шаватнень-меснень пяшкотькшнесазь ведьта и веньгучкать пяяресазь вальмять пачк. Тяфта арьсекшнихть туй кизоти ведь лаца валда ки. Мексикаса Од кизоть васьфнесазь фейерверкса, ракетницаста ляцендемаса. Ветемба шабатненди казендихть прянькань някат.
 

28.12.2018 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин