Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Юмор и сатира

Сакал

Монць ломанць аф одан. Виде, якан нинге кафта пильге лангса—байдеконяфтома. Сакалонь нолдазь одкстомома ашень срхксе... Нарсень, кода и сембе атятне, эрь шиня. И мес аф нарсемс? Тяни тя тевсовок техническяй прогресс. Шофт-месть аф завотцемат, бритват аф шовсемат. Сявондине «Молодость» электробритвазень, кжнафнине улозень алга, щеканень ланга. Шамастон «лядендине» сембе шачить-касыть. Сакалняньбес. Да пенсионерть пингтонзонга—аньцек нарсек. А пенсияс лисемдон инголе школаса итть тонафнекшнень. Тяни синь, ингольдень учениконе, оцю ломатть. Кие лектор, кие директор. Ульцяса-коса васьфнемстон сюконязь мархтон шумбракснихть. Аф кунара лисендсь мархтон осал тев. Палас повондонь. Урмаськоткшнень—вастстон ашень стяшендов. Койка лангсолень аф фкя недяля. Бритвазендивок ашель кярьмодемшка. Да, корхтайхть, семботи сашенды пе. Сась пе афпаркс урмазтивок. Стянь пильге лангс. Маладонь ваномати и—вай, шкабаваз!—тоста лангозон варжакстсь аф содаф шама: сакалхнень еткса сельмот цифтордыхть и, кода шяй тишетнень еткса коцькя, лисьф шалхка. И тя мон тяфтамсь? А мес? Тя нльне интересна! Сакалозе тяфтама акшеня, тустоня, бта аптекаста аньцек тяни кантф вата. Ашень фатя аф васоньбеельс, аф бритвас. Кадыне сакалть. Тялось малаткшнесь. Срхкань рамамс акша воротник мархта пальта—сакалозень коряс. А тянкса сберкнижкаста эрявсь валхтомс ярмак. Сань сберкассав. Тястонь кассиршась Маша Сергушкина—ингольдень ученицазе. Школаса тонафнемстонза отькорель стирнясь. Шуваняняль. Тяни музе эчкомомась... Сон эрь мезне васьфнемань кенярдезь: мзолфкац крьвязькшнесь валда лампанякс: Иван Андреич да Иван Андреич. А тячи ширезон афи ваны. Улема, кати-мес колаф мялец. Пади, кудса мирдец обжазе, а, пади, мес-мес монь лангозон кяжиясь. Теенза бта афи шумуван. —Шумбранят, Маша,—пшкядень теенза васенцекссь. А сон аньцек и мторгодсь: —Шумбратада. —Ярмаконкса сань,—мярьгонь.—Сяда нильгемонь цалковай эряви валхтомс. Венептине сберкнижказень, монцень мзолфозе. Маша ванозе книжкать да кодак кашангоды: —Тонь кядьсот лиянь документ! Тон Иван Андреичень вастс ерат ярмакт норгомс? Да тя книжкать азоронц мон идькс пингстокиге содаса. —Тя мон, тя мон—Иван Андреичсь,—чакаса клокса мяштезень, коза валги сакалозе. —Гражданин, няфтьк паспортцень,—казямста пшкядсь сберкассань работницась. Таргайне повжирестон паспортозень, венептине. Маша ванозе да кодак пешкоды: —Иван Андреевичень паспортоцка кядьсот! Тон мезе тиеть ся пара ломанть мархта? Грабайть?! Лиянь документт каннят? Сберкассав сувси ломаттне лангозон кармасть ванома келептьф сельмоса. Кати-коста тифтедсь сержантонь погон мархта милиционер, мярьгсь: —Гражданин, аде! Сержантсь вятемань милицияв. Сувафтомань пялес шобда, кельме кабинетс. Тяса шрать ваксс комафста ащесь майор, од аля. Кеподезе прянц, варжакстсь лангозон—сельмонза шобда варянят, шалхкоц лапш. Да тя вдь Сема Алташкин. Сонга монь ингольдень ученикозе. Зарниколь. Партатненди пеель нярняса керсезе эсь фамилиянц. Но монь кельголемань. Ламоксть сонь итцине. Весть, мяляфтса, школаса колазе вальмя сельмонять. Кда тянь колга пачкодель кулясь школань директорти, Семань пяк наказалезь. Да мон ашень кепотьфте шум. Вальмяти клянцек путонь монць. А Алташкинонди аньцек мярьгонь прянц вятемс сяда сетьмоста. Сон валга макссесь. И ва тяни мон ся Алташкинть инголян. —Кият, костоннят, гражданин?—кизефтемань стама вайгяльса, бта инголенза ульсь разбойниконь оцюня. —Сема! Алташкин!—пшкядень теенза.—Али тон эсь ингольдень учительцень Иван Андреевичень юкстайть? Майорсь варжакстсь лангозон сядонга кяжиста: —Тон ва мезе, гражданин! Минь тяса аф рахсекшнихть. Лацкас лятфтак эсь лемцень, фамилияцень, коса эрят-ащат. Мон ванонь арьсезь Алташкинонь шамас, и сон тейне няевсь стамкс, кодамоль и эста, школаса тонафнемстонза. Зарниконне. Тяфтамти каршек вал аф азоват. —Ламос кармат учсефтемон?!—кайгсь ингольдень двоешникть вайгялец. Монь кати-мес ашель мялезе азонкшнемс сярядемазень, сакалонь нолдамазень колга. —Кият тон?—кайгсь пилесон серень вайгяльсь. —Английскяй консулан,—пшкядень.—Черчиллень унокоцан. Майорсь келептезень сельмонзон: —О-о! Да тон, бльшем, вятемалеть аф сей, а акша халатстотненди. Пянкштадсь седиезе. Тя нинге ашезь сатне! Кржа—милицияв повонь. Тяфтама Алташкинць вдь и ускфттанза еньда лисьфнень еткс. Мярьгонь теенза: —Сема, лятфтак, кода эста школаса колайть вальмять, кода мон путыне клянцекть и идихтень оцю наказамада. Майорть сельмоса эй покольнятне ушедсть солама. Сяльде нинге теенза лятфнень школаста эряфонь пакшкат. Азондонь и урмазень, сакалонь нолдамазень колга, сянь колга, кода сберкассаса ашемань сода и Маша Сергушкина, кона Алташкинонь мархта тонафнесь фкя класса. И ва майорсь, ингольдень ученикозе Сема Алташкин, маладсь тейне. Ашкодомань кргада, цють аф плманжа лангса кармась эняльдема, штоба афолень кяжия тяфта васьфтеманксон. Сяльде маладсь телефонти, звонясь сберкассав. Машанди азондозе, кода лиссь тапаркссь. Телефоннай трубкаса ламос ашезь азов тона пестоть валоц. Сяльде пшкядсь: —Вай... месендень! Конашкава обжайне пара ломанть... Иван Андреевичень... Катк ина сай куроконе сей, ярмаконкса. Мон учса...
 
                                                                                                                             Михаил МОИСЕЕВ.
 

28.12.2018 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин