Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Тема дня

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
Миньцонк аш козя сырьевой база: уголь, нефта, газ, золота и лият. Тяфтама условияса сембоса эряви надиямс аньцек эсь лангозонк. И республикаса эряйхне тянь пяк лац шарьхкодьсазь. Производстваса цебярь сатфксне макссихть возможность тейнек сяда лац решандакшнемс и социальнай кизефкснень. Мокшэрзянь крайсонк лац мольфтев эряма вастонь, школань, больницянь, лия объектонь строямась. А кода аф марямс гордость мекольдень кизотнень строяф мировой стандарттненди сембоса отвечай спортивнай учреждениятнень инкса. Сембе минь марятама оцюдонга оцю гордость и сянкса, што республиканьконди максфоль честь етафтомс футболть коряс Миронь чемпионатонь ниле матчнень. Минь няфтеськ, што тейнек вийс коре и  маштозь етафнемс планетарнай масштабонь событият.
И ня кеняртьфти тефнень, мялень кеподи сатфкснень колга  азондомать  можналь нинге  поладомс.
Оцю сатфксокс лувондови общественнай согласиясь и межнациональнай мирсь, созидательнай эрь работати тяряфтомась, пользань кандозь населениянь разнай социальнай группатнень мархта властень оргаттнень кеме соткссна.
Мордовияса тяни эряй кемотть нациянь представитель. Етксост мокшет, эрзят, руст, татархт… Тейнек и сяда тов эряви эрямс мирнайста, виияфнемок эрь народть культуранц, кяленц, цебярь коензон. Аньцек фкя-фкянь мархта ладязь, шарьхкодезь, фкя-фкянди лездозь можна и сяда  тов касомс-вииямс сембе ширде.

10.01.2019 №1
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин