Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

М.Д.Кузьмин: «ШИРЕСА ЭРЯЗЬ РОДНОЙТИ КЕЛЬГОМАСЬ СЯДОНГА ВИИЯКШНИ»

 

Минь мокшень ломаненьке
Родной кяльти, культурати, народть эрямань-ащемань коензонды-обуцянзонды кельгомась эвондакшни семьяса, етни тядятнень-алятнень эзда. А вов ванфтомац тянь семботь, национальнай козяшить поколенияста поколенияс макссемац ащи эсь эздонк. И пяк кеняртьфти, мес тяфтама ломаньда, конат палозь палыхть мокшэрзянь народть вандыенц инкса, ётксонк аф кржа. Тяфтама смузю, инголи ваны ломаттнень ёткс канневи медицинскяй наукань докторсь, Мордовия Республикань и Россиянь Заслуженнай врачсь, МР-нь Культурань Заслуженнай работниксь Михаил Дмитриевич Кузьмин. Шачсь-кассь мокшалясь Инсарскяй райононь Исавелеса. Аделазе Н.П.Огаревонь лемса Мордовскяй госуниверситетонь медицинскяй факультетть. Кемонь кизот работась Инсарса больницяса, ульсь хирургическяй отделениянь заведующайкс. 1983 кизоня ётась эряма Оренбургу, коса поладозе врачень тевонц. Михаил Дмитриевич лама пинге вятезе урологическяй отделениять Оренбургскяй областной больницяса. Мокшалять пяк крхкат содамошинза медицинаса, конатнень сон касфнезень Италияса, Израильса, Швецияса, Англияса. Тяда башка, М.Д.Кузьмин Наукань российскяй Академиять уральскяй отделениянц ведущай научнай сотрудникоц.
Михаил Дмитриевич—афкуксонь мокшень патриот. Оренбургса сон вятьсы «Мокшэрзянь культурнай центра» общественнай организациять, коза пуроптозень областьса эряй мокшетнень и эрзятнень. Мелянь декабрьста  земляконьке сашендсь Саранскяи, коса примась участия Мордовскяй (мокшень и эрзянь) народть Межрегиональнай общественнай организациянц Исполкомонц заседаниянц работаса. Пуромкста меле М.Д.Кузьмин пара мяльса отвечась корреспондентоньконь кизефксонзон лангс.
—Михаил Дмитриевич, мзярда пуроптфоль Оренбургса Мокшэрзянь культурнай центрась и кода эвондась мяльце пуроптомс-кочкамс областьса мокшэрзятнень?
—Родонь-плямань ломаттнень мархта кочкавомать колга мяльсь эвондась эстокиге, мзярда ётань эряма области. А кошардомань тянди вов мезсь. Мзярда нинге тонафнень школаса, эсь шачема велесон, ширезонк сашендсь содаф драматургсь, педагогсь Г.Я.Меркушкин, васетькшнесь алязень мархта. Сон лама азонкшнесь сянь колга, кода эряйхть мокшэрзятне Москуса, васетькшнихть, лезнихть фкя-фкянди. Етамок эряма Оренбургу, лядсть мялезон Григорий Яковлевичень азондоманза. Сят, кит явфт шачема-касома уженяснон мархта, лац содасазь, кода вииякшни ширеса эрязь родной кяльти, Родинати кельгомась. Эвондакшни мяль улемс сяда малакс ся ломаттненди, конат тяфта жа састь Мордовияста, кирдемс фкя-фкянь мархта соткст, вийс коре лезнемс. Вов тяфта 2002 кизоня кемокстафоль «Мокшэрзянь культурнай центра» общественнай организациясь.
—Лама мокшэрзя эряй Оренбургскяй областьса?
—Населениянь мекольце переписть коряс, 39 тёжянь ломань. Но афкукс мокшэрзяда областьса сяда лама—колма сядоть малава. Ламось еткстост тяни серматфнесазь пряснон кода руст. Инь лама мокшэрзяда эряй Бугурусланскяй и Севернай райоттнень эса.
—Мезсь тячи инь пяк таколфтсы кяльс коре радняньконь?
—Инь пичефти прябалась—мокшэрзянь велетнень шамомасна. Юмайхть-арайхть велетне, юмай и сонць народоньке. Ошса пяк стака ванфтомс кяльть, культурать. Кода врач, ванан одс шачихнень, кулыхнень лувксснон мельге. Тявок аф кадонды озадонь седихть ащема.
—Михаил Дмитриевич, азонтт Центрать тевонзон колга.
—Васендакиге мялезе азондомс Оренбург ошса пуроптф мокшэрзянь подворьять колга, конань видеса ули музей. Экспонаттне кочкафтольхть областень велетнень эзга. Музеень работниксь пара мяльса содафнесыне тяза сайхнень народоньконь культуранц, коензон-обуцянзон, эряфонц эсь лацонь ширензон мархта. Арьсекшнетяма пуроптомс музейть видеса морамань коллектив. Мокшэрзянь велетнень эзга экспедициятнень пингста кочкаме-сермадоме аф кржа мора. Нолдаме диск асу морайть Екатерина Яковлевать авторскяй моронзон мархта.
Эрь кизоня тя или тона районца етафнетяма мокшэрзянь культурань областной ила. Стане жа етафневихть башка праздникт райоттнень эса, коса асушиснон няфнесазь творческяй коллектифне. Эздост областьса аф кржа. Тяфта, Новосергеевскяй райононь Рыбкина велень Культурань кудть видеса пуроптф «Келуня» народнай фольклорнай коллектив, кона содаф марнек областьса. Эвондакшнихть идень группат.
Аш кода аф азомс сяньге, што Оренбургса нльне ули мокшэрзянь ресторан, коса ули кода варжамс национальнай ярхцамбяльхнень.
—Кода тиньцонт ащихть тефне национальнай литературать мархта?
—Тянь ширде тейнек оцю лезкс максси Мордовия Республикась. Сяка жа Рыбкина мокшень велеса панчф библиотекась козя мокшэрзянь литератураса. Тяса оцю мяльса лувондсазь мокшень и эрзянь кяльса газетатнень и журналхнень. Пачфневи национальнай периодикась и школатненди. Виде, школада, коса мокшень и эрзянь кяльхне вятевихть факультатив лаца, лядонды пяк кржа. Туфталсь тянди азфоль ни вяре—кармасть юмсема велетне, кржа идьта.
Мордовиясь лезни тейнек аф аньцек мокшэрзянь литературать мархта. Минь кирттяма кеме соткст творческяй ломаттнень мархта. Ширезонк сашендыхть Мокшэрзянь национальнай театрань артисттне, общественнай тевонь вяти ломаттне.
—Михаил Дмитриевич, эрь азонтк, кода эряфонь кице пачфтензе Оренбургу.
—1983 кизоня саме тяза семьянек. Стирезе сярядсь хроническяй бронхитса, сяс эрявсь полафтомс климатть. Оренбургскяй областень коське климатсь ладясь теенза. Вов тяфта и нолдаме ункст тя модаса.
—Ёмла родинасот сидеста улендят?
—Ёт туфан шири, ашель фкявок киза, штоба афолень са шачема уженязон. Седись фалу уски тяза, кда аф заняфшись, сашендолень сяда сиденяста.
—Михаил Дмитриевич, азонтт аф лама эсь семьяцень колга.
—Рьвязе—Атюрьевскяй райононь мокшава. Сон, кода и мон, врач, пчкафни шабат. Касфтоме кафта стирьхть. Тяни ули фкя уноконьке.
—Спасиба!
О.ЕВДОКИМОВА.

10.01.2019 №1
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин