Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Как жили и живут мокшане

Касфтсть кота стирьхть

Атюрьевскяй райононь Шяйгужа велеса эряй-ащи Путяйкиттнень семьясна. Мирттне-рьвятне кафцьке трудонь ветератт,  шнама ломатть районца и велеса. Ванат лангозост и аф верондат, што теест 75 кизонь. Синь тяфтама жа отькорьхть, трудонь кельгихть, пяк ламось теест нинге вийс коре. Полатне пцтай 51 киза эряйхть марса. Эряйхть ладязь, кельгозь, фкя-фкянь шарьхкодезь. Николай Иванович коль шнай рьванц эса. Прасковья Васильевна кельгозь, ужяльдезь корхтай-азонды поланянц колга. И синь можнат шарьхкодемс.     Мирттне-рьвятне Путяйкиттне касфтсть кота стирьхть.  Трямасна аф тёждяль. Шобдаста шобдас работасть: шить колхозса, илять кудса. Ашельхть аф отпусксна, аф ваймама шисна. И мзярдовок ашесть пеняцякшне эряфть лангс. А тоса венемсть идьсна. Сяда оцюфне лезнесть ёмлатненди, тядятненди-алятненди.
—Минь фалу надиякшнеме аньцек эсь виеньконь лангс,—мярьгсь Прасковья Васильевна.—Лездыеньке ашельхть. Спасиба Шкабавазти, иденьке кассть трудонь кельгикс, шнама ломанькс. Визделготкшнемс инксост аф сашендови.
Путяйкиттне  касозь сереснон Шяйгужа велеса. Николай Иванович шачсь 1943 кизоня, странаньконь инь стака пингстонза. Мольсь Великай Отечественнай войнась. Аляц, Иван Иванович, тюрсь фашисттнень каршес. Тядяц, Пелагея Романовна, трудендась колхозса. Шабанза емлатольхть, эрявсть симдемс-андомс. Эста ашельхть аф ваймама шит, аф декретнай отпускт. Сире Путяйкиттне сембонь тиезь сянкса, штоба касольхть идьсна шумбраста-тазаста. Синь касфтсть сисем цёрат. Виень аф ужяльдезь трудендасть эстонь колхозса. Сяльде покодсть «Красное знамя» совхозса.
Аф ваномок мезеньге лангс, Николай Иванович тонафнесь Од Кярьгань школаса. Тянемс мяляфтсыне кельгома тонафтыензон, войнань и трудонь ветераттнень, тылонь труженикнень И.Л.Шукшинонь, Е.Е.Шукшинонь, Е.И.Шукшинать, А.Е.Шукшинать и ламотнень лиятнень. Алятне войнасотольхть, рьвятне школада башка лия велеряйхнень мархта покодсть колхозса. Эсь седиень лямбоснон, трудонь кельгомаснон макссезь ученикснонды. Школада меле Николай Путяйкин аф лама пинге трудендась колхозса. Тоса тусь тонафнема трактористокс Челябинскяй области. Колма кизот работась металлургическяй заводса. Велень цёранять приметазь, шназь. Меле кандсть военкоматста повестка, сявозь армияв служама. Колма кизода лама служась Пермь ошса, ракетнай войскаса. Служась лац. Тянь колга корхтай и оцю казнец—«За отличие в воинской службе» медальсь.
1967 кизоня Н.И.Путяйкин сась эряма-ащема Шяйгужа велезонза. Пуроптсь семья. Рьвянди кочказе велень трудонь кельги стирть Прасковья Шукшинать. Прасковья Васильевнань аляц, Василий Васильевич, стане жа ётазень войнань толу-качаму китнень, ульсь лама бойса. Казьфоль аф фкя оцю казнеса. Кафта брадонза, Пётр и Иван, юмасть куляфтома. Войнаса получаф ранениятнень сюнеда Василий Васильевич рана тусь эряфста. Прасковья Васильевнань тядяц, Аксинья Николаевна, няезень сембе аф няематнень, трудендась алятнень мархта ряцок. И вестевок ашезень ноля кядензон, ашезь пеняцякшне эсь эряфонц лангс.
—Тядязе сембоса тейне ульсь примеркс,—мярьгсь Прасковья Васильевна.—Сон пяк ламоти монь тонафтомань.
Николай Иванович и Прасковья Васильевна кафцьке трудонь кельги ломатть. Мокшалясь сембе эряфонц максозе «Красное знамя» совхозти. А тя пцтай 40 киза. Ульсь дизелистокс, работась бульдозерса. Коза аньцек ашезь кучсе покодема.
—Мон лац-ряц кудсовок ашине няенде,—азозе Прасковья Васильевна.—Туй покодема, шабатне удыхть, сай покодема вастста, шабатне ни матфт. Ашельхть ваймама шинза.
А сонць Николай Иванович лямбе валса лятфнесыне мархтонза покоди ялганзон, хозяйствань вятихнень, конат ашесть ётне ваксканза, няендезь трудонц. Шяйгужень ингольдень передовой механизаторсь аф весть шнама валса лятфнезе И.М.Шалинонь, лиятнень лемснон. Синь пяк пичедсть «Красное знамя» совхозть инкса, тисть аф кржа сянкса, штоба ломаттне получальхть цебярь зарплата, наряжалезь, андолезь эсь идьснон.
Тяка жа «Красное знамя» совхозса трудендась и Прасковья Васильевна. Ёфси стирнякс сон сась эстонь колхозу. Валондсь капстат, табак, тиендсь лия тефт. Сяльде 22 киза потьнесь тракст «Красное знамя» совхозса.
Тяка пингть кенерькшнесь кудонь, куд пирьфонь тефнень пяшкотькшнема, макссь цебярь воспитания шабаснонды.
Совхозда меле Прасковья Васильевна лама пинге покодсь эстонь участковай больницяса санитаркакс, поваркс.
Тяни Путяйкиттне аньцек кеняртькшнихть стирьснон сатфксснонды. Светлана—учитель, Люба—товаровед, Зинаида—экономист-бухгалтер, Галина—продавец. Лидия эряй и покоди Москуса, аделась вуз. Татьянань кафта высшай образованиядонза. Путяйкиттнень кефкие уноксна, сисем уноконь идьсна. Сембе шнама ломатть. Кепотьксонди, Любовь Николаевнань колма иденза: кафта цёрат и стирь. Фкя цёрац, Николай, кафксть ульсь Сирияса, казьф кафта медальса. Омбоце цёрац, Иван, работай полицияса участковайкс. Стирец, Аксинья, тонафнесь Волгоградса, покоди Зубово-Полянскяй районца УФСИН-нь системаса. Сиренятне маряйхть гордость унокснон инкса.
—Мзярда иденьконь-уноконьконь лац молихть тевсна, эста миньге седиеньке сетьме,—мярьгсь Прасковья Васильевна.—Минь эрятама синь сатфксснон, кенярдемаснон мархта. Кда марясаськ пара куляснон, кудсонк оцю праздник.
И.Вешкин.
Снимкаса: мирттне-рьвятне Путяйкиттне.

10.01.2019 №1
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин