Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

Мокшэрзянь костюмонь праздниксь удалась!

Мокшэрзянь костюм, щам-карям. Кажнайсь эздонк сидеста лятфнесы, кода инголи шачема-касома велеса якасть мокшаватне. Эрь районть ули национальнай эсь щамоц, кона ульсь и лядонды ломаттненди оцю козяшикс. Ноляви сон тевс праздникнень, пуромкснень, а кой-коса—эрь шиня.
Мокшэрзянь костюмонь праздник мелянь декабрьста  ульсь Саранскяйса А.С.Пушкинонь лемса Национальнай библиотекаса. Аноклазь сонь тя библиотекать национальнай и краеведческяй литературань отделонц сотрудниконза и Мордовскяй (мокшень и эрзянь) народть Межрегиональнай общественнай организацияц «Мордовия мастеровая: традиции и современность» республиканскяй этнокультурнай образовательнай проектть мяльса кирдезь.
Мокшэрзянь костюмонь праздниксь ётась «Мордовский национальный костюм—всемирное достояние» лем ала.
Библиотекать фойеса работасть мастер-класст, выставкат мокшень и эрзянь щапнень коряс, ульсь кода тифтемс лятфнембяленди фотографият праздникс саф мастерхнень, инжихнень мархта.
Кулевсть мокшень и эрзянь морот. Ломаттне малаткшнесть выставкатненди, ванондозь эсост няфтьф мазышить, тяконь лувксса мокшень и эрзянь щапнень.
Козя, мазы выставка аноклась и усксь газетаньконь кунардонь ялгац, Мордовия Республикань культурань Заслуженнай работниксь, сюреса сёрмадысь Старошайговскяй райононь Лемдяй велеста мокшавась Мария Ивановна Бикеева.
Мария Ивановна фалу примси участия ламоц пуромкснень эса, а выставкатнень пингста сюреса сёрматф панаронза фалу салсесазь ломаттнень мяльснон мазышиснон мархта.
«Эрь панарсь, каркссь, пряруцясь, нардамась—кода идь, конань каннесак седицень ала, а сяльде максат теенза эряф»,—вов кода мярьгсь сон маштыень кядензон мархта ноляви сембе тя мазышить колга.
Аф стак М.И.Бикеевать сюреса сёрматф мокшень панаронза Мордовия Республикать эзда казьфтольхть СССР-нь Народнай артистти, СССР-нь и Российскяй Федерациянь Государственнай премиянь лауреатти Олег Павлович Табаковонди, СССР-нь Народнай артистти, П.И.Чайковскяень лемса Симфоническяй оцю оркестрать главнай дирижеронцты и руководителенцты Владимир Иванович Федосеевонди, а стане жа и лия инжихненди мокшэрзянь масторса улемстост. Пара, што республиканьконь квалма лятфнембялькс теест арасть мокшень панархне.
Мокшэрзянь костюмть колга нолдафтольхть книгат, пособият, колганза тяштьф аф кржа статья. Национальнай щамоньконь гордостень марязь каннесазь содаф мокшаватне. Тянь семботь ульсь кода няемс «Чудесный мир мордовского костюма» книгань и лия изданиянь выставкаста, кона стане жа аноклафоль тя праздникти.
Мокшэрзянь щапт улихть Европань этнографическяй инь оцю музейхнень эзда фкаса—Санкт-Петербургонь Российскяй этнографическяй музейса, коста мокшэрзянь костюмонь праздникс сайхненди няфтьфоль видеозапись.
Исследовательскяй кодама тев вятеви мокшэрзянь национальнай щамть коряс? Тянь колга келиста пачфтсь мокшэрзянь костюмть колга книгатнень авторсна, «Шумбрат, Мордовия!» республиканскяй фестивальть выставканц экспертнай советонц председателец, Мордовия Республикань культурань Заслуженнай работниксь Т.П.Прокина. Татьяна Петровна тись мялень салай презентация, конань пингста няфтевсь мокшень и эрзянь щапнень мазышисна.
Презентациянц пингста сценаса ащесть кафта стирьхть, а машты кядь мокшавась и эрзявась наряжазь синь мокшень и эрзянь щамса. Мокшень щамсь ульсь Старошайговскяй райононь Сире Теризморга велень. Ломаттне няезь, што национальнай костюмонь лац-ряц щамась—тевсь аф тёждятнень эзда. Но мзярда тя тевсь педа-пес тиф—сельмоце аф явфтови мазышить эзда. Вов и тянивок афкуксонь баяравакс арасть стирьхне!
Тя шиня библиотекать Актовай залонц сценанц лангса кштисть-морасть Сире Теризморгань народнай хорсь, «Толава» фольклорно-этнографическяй народнай ансамбльсь. «Мерема» народнай фольклорнай ансамбльсь. И сембе коллектифнень участниксна щафтольхть-каряфтольхть мокшень и эрзянь щамса.
Мокшэрзянь костюмти лемтьф праздникти оцю мяль шарфтсь Российскяй Федерациянь культурань Заслуженнай работниксь, Славань III степенень орденца казьфсь, Сире Теризморгань мокшавась Нина Михайловна Кадерова. Минь, кле, тячи касфнесаськ мокшэрзянь костюмть питненц, а тя пяк кеняртьфти.
Нина Михайловнань ули кода лемдемс национальнай щамонь ванфтыкс и кочкайкс. Тя тевти сон макссь пяк лама киза.
Праздникса корхтасть Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин, тя организациять Исполкомонц председателец А.С.Лузгин, лиятне.
Кеняртьфти, што праздникса ульсь аф кржа од ломаньда, тяконь лувксса и омба масторонь студентта, конат тонафнихть Мордовияса. Стирьхне и цёратне малаткшнесть мокшень и эрзянь щамса наряжафненди, тиендсть мархтост фотографият.
Мокшэрзянь национальнай костюмсь мокшетненди и эрзятненди фалу ульсь искусствань произведениякс. Тя искусствась ётнесь поколенияста поколенияс. Мокшэрзянь щамса няфтьфт народть инь цебярь ширенза, мастерствац. И пара, што теенза лемневихть и ётафневихть праздникт.
Т.Альшина.

10.01.2019 №1
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин