Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

АВАНЬ КЯДЬТЕВОНЬ ТВОРЧЕСКЯЙ ВЫСТАВКА

«Ступени жизни» клубть, кона пуроптф М.Е.Евсевьевонь лемса 1№ библиотекать-филиалть и «Войнань и трудонь ветеранонь Пролетарскяй Советсь» общественнай организациять сотрудниконзон вийснон вельде проектонц мяльса кирдезь, аф кунара вяре азф библиотекать зданияса ётась «Души и рук прекрасные творенья» авань кядьтевонь творческяй выставка.
Выставкать аноклазь оргкомитетть членонза С.В.Трапеза (библиотекать заведующаец), В.Д.Маркеева и Т.В.Куликова. Няфтьфтольхть крёзса, гладьса сюреса сёрмадомась, ёмла ожнаса сермадомась, французскяй сюлмонясь, болгарскяй крёзсь, лоскодста кодамась и стамась, батиксь, пэчворксь, кячкаскаса и виндерняса кодамась, шуфтста поделкатне, ляпе налхкшсь и стак тов.
«Рукодельница» клубть 11 участницанзон маштыень кядьса тифсна—декоративно-прикладной искусствань мялень салай элементт. Т.В.Куликова ёмла ожнаса сёрмадсь «Божья Матерь» и «Богородица с Младенцем» шкаень ликонят, мулине сюреса сёрмадсь «Горный пейзаж» и «Рыжий кот» работат, перьфпяльдень материалста тись крганят и кячкаскаса кодась кружевань салфеткат.
А.Ф.Демышева аноклась лентаса и ёмла ожнаса сёрматф «Тялонь пейзаж». Мяль салсихть В.Н.Милкинать работанза—цифровой живописьса тиф «Осенний пейзаж» паннось, крёзса сёрматфт «Собачкась», «Курочкась и Петушоксь», «Совёноксь» и «Английскяй пейзажсь».
Аш кода аф шнамс А.А.Лагошенконь, Р.В.Бочковать, Т.В.Руновать, и      С.В.Ямашкинать работаснон. Сембе синь тифт маштозь, мастерицатне ётафтозь седиснон и ваймоснон пачк. Пейзашт, натюрмортт, батикт-картинат, сюреса, ёмла ожнаса, лентаса сермадомась, кузонь тарадста поделкатне, паннотне и стак тов. Марнек экспозициясь—тя творчествань козя мир.
Декоративно-прикладной творчествань работатненди канневихть Т.И. Степновать гипсонь скульптуранза.
Башка азома В.Д.Маркеевать колга, кона няфтезе Христость Ликонц выжиганиянь техникаса. Тяда башка, сон мусь вирьста шуфтста фигура, конань петезе-тиезе и вельхтязе лакса. Валентина Дмитриевна цебярь поэтесса, публикациянза лисендсть педагогическяй общественностть представителензон «Диалог» сборниксост. Тя сборникть В.Д.Маркеева кочказе Н.Е.Тюринать мархта, лиссь сон 2003 кизоня.
Тя мезть Валентина Дмитриевна лувозень эсь стихонзон. Стихснон мархта пуромфнень кеняртьфтезь Н.Кострицына и В.Демешев.
Цебярь казнекс арасть Пролетарскяй райононь «Луч» Культурань кудста художественнай самодеятельностень участникнень-солисткатнень В.Дятловскаять, О.Левинать, дуэтть, коза сувсихть Р.Миндрова и Е.Томилин, «Сударушка» авань ансамбльть выступлениясна.
Н.Кострицына,
Россиянь Писателень и
Журналистонь союзонь член.

10.01.2019 №1
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин