Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Обо всем понемногу

Микробатне кельгсазь лямбе васттнень

—Аф кунара кулине телевизорста, бта васта лангонь бельеть эряви полафнемс весть-кафксть ковти. Стерильнай арушись бта стане жа кальдяв… Тя афкукс тяфта? Или сяда цебярь ули, кда полафнемс пододеяльникнень-меснень весть недяляти?
Е.ЕГОРОВА.
—Тинь кельгома вастонтень кельгсасть аф аньцек тинць, но и микробатне: лямбось и летьксь курокста ламолгофнесазь микроорганизматнень лувксснон. Нинге синь киськонтень пялькскаснон эзда кельгсазь ярхцамать. Но инь пелькссь сянь эса, тяни лама кудонь сида (клещ): синь эвондафнихть аллергия, кона шарфни кельмофтевомать и нльне астмать лангс. Сяс васта лангонь бельеть полафнесть недяляти весть и муськондесть 40 градусонь температураса. Кодамовок дополнительнай дезинфицирующай средстват аф эрявкстыхть. Тялонда ломанць сяда аф ливоськоткшни, сяс простынятне-месне полафнемат кафта недяляти весть. Но, кда мархтонт утци катонте, вастонтень полафнесть эрь недяляня, нльне, кда бельесь няеви аруста. И нинге: спальняса тясть кирне кудса якамань рдазу щамонтень—эсост микробатнень лувкссна касонды, кода и аф свежай продуктатнень эса.
 
Гусархне ваймосихть!
Индияста 58 кизоса Гирдхар Вьяс арась содафокс марнек мирса усанзон вельде. Алясь касфтсь усат, конатнень кувалмосна 6 метрат 70 сантиметра. Индиецсь аф нарси 1985 кизоста сявомок, но шамасонза кувака шяярень рекордсь мзярс апак кемокстак. Вьяс шташендсыне усанзон аньцек весть кизоти. Но парикмахерскяи якай эрь недяляня. Вьяс  маштозь ашкорясыне усанзон жгутокс и марсесыне синь тя тевонди аноклаф капроновай сумкас.
 
Арасть ялгакс крокодилхнень мархта
Буркина-Фасоса (Западнай Африкась) ули васта, кона абонгофнесыне туристтнень. Африканскяй тя странать эрьхконзон эзда фкаса эряйхть крокодилхт, конат арасть ялгакс ломаттнень мархта. Ся маластонь велеряйхне  якайхть крокодилхнень мельге—аннесазь синь саразда, кочксихть ведь, аватне ёфси маласост  муськихть, иттне налхксихть аф ичкозе. Тевсь сянь эса, што тоса коське климатсь. Сон ламода валхтсы крокодилхнень кяжишиснон.
 
Салат «Маскарад»
Эрявксты:
крабовай палочкат,
сянгяря снав—100 граммань,
ветчина—200 грамма,
кафтонь помидора,
модамарь,
постнай вай,
майонез—2-3 столовай куцювонь,
капер или сянгяря шурьхкя,
чесноконь 2 пейнят.
Кода анокламс:
ветчинать и крабовай палочкатнень керсемс шужярнякс. Марамс крхка тарелкас. Каямс сянгяря снавть, шуваняста керсеф помидоратнень, каперть (шурьхкять) и мелкайгофтф чеснокть. Башка керсемс модамарьть и рястамс постнай вайса. Ванода, штоба модамарень пакшкятне афольхть синнев. Рястаф модамарьсь марама кагодонь салфетка лангс. Модамарьсь каяма лия ингредиенттненди и шовордама майонезса.

10.01.2019 №1
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин