Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Национальная тематика

Мордовиянь общественнай организациятнень форумста

«Марстонь вийса сатови и тиеви сембось!»
Мелянь 28 декабрьста Мордовиять столицаса ётась республикань общественнай организациятнень форумсна, коса ванфтольхть и максфоль питне 2018 кизонь работань итокненди и арьсефт тефт, конат эрявихть тиемс республикань гражданскяй обществань институттненди 2019 кизоня.
Тя форумса тяфта жа работасть республикань государственнай властень деятельхть, аф фкя лацонь религиознай конфессиянь священнослужительхть, межрегиональнай и федеральнай общественнай организациянь представительхть.
2018 кизонь работать итогонзон коряс, форумса республикань общественнай организациянь ламоц представительхне казьфтольхть Мордовия Республикань Оцюнять В.Д.Волковонь Благодарственнай сёрмаса, Культурань, национальнай политикань, туризмань и архивнай тевонь министерствань «За межнациональное согласие» медальса и Почетнай грамотаса.
Вятезе форумть Мокшэрзянь народть Межрегиональнай общественнай организациянц председателец, профессорсь Ю.А.Мишанин.

Мордовия Республикань культурань, национальнай политикань, туризмань и архивнай тевонь министрсть А.М.Чушкин:
—Кельгома ялгат, 2018 кизось миньцонк ульсь козя лама аф фкя лацонь тевса и событияса, конатнень ёткса, конешна, васенце вастса ащи футболть коряс Миронь чемпионатсь. И эряви азомс: Мордовиянь общественнай организациятне сонь ётафтоманцты и позитивнай итогонцты государственнай властень оргаттнень лезксснон вельде сувафтозь эсь няевикс       путксснон.
Тянь колга аф кунардонь совещанияса корхтась Мордовия Республикань Оцюнясь В.Д.Волков. Тяда башка, Мордовиять лидероц мярьгсь пачфтемс теенть, што Россиянь Президентсь В.В.Путин макссь оцю оценка футболть коряс Миронь чемпионатть регионцонк анокламанцты и ётафтоманцты. И тя тевти оцю и няевикс путксонкса Мордовия Республикань Оцюнясь В.Д.Волков Мордовиянь общественнай организациятненди азонды оцюдонга оцю сюкпря!
Од кизода инголе, койсон, нинге весть ули кода азомс: тейнек, Мордовия Республикань государственнай властень оргаттненди и общественнай организациятненди, 2018 кизоть кувалмоста марстонь вийса удалась нинге сяда пяк кемокстамс сембе ширдень соткснень республикань межнациональнай, межрелигиознай и межкультурнай сфераса. Ня валхнень видешиснон кемокснесазь мониторинкнень итогсна, конатнень миньцонк ётафтозь федеральнай и региональнай институттне. Омбоце ширде—ня мониторинкнень даннайснон вельде аф аньцек Приволжскяй федеральнай округса, но и Россиянь лия субъекттнень ёткса Мордовия Республикась межнациональнай, межрелигиознай и межкультурнай соткснень кемошиснон коряс сувси лидерхнень ёткс.
Но минь сембе цебярьста шарьхкодьсаськ: тефне фкя вастса вестьке аф ащихть. Сяс 2019 кизоня тейнек эряви тяфта жа эрьгавста работамс Мордовиянь межнациональнай, межрелигиознай и межкультурнай сфератнень эса.
Лиякс мярьгомс, работамс ся вешфкснень коряс, конат азфт-путфт тейнек Российскяй Федерациянь Президентть В.В.Путинонь «О национальных целях и стратегических задачах развития Российской Федерации на период до 2024 года» майскяй Указса.
Мокшэрзянь народть Межрегиональнай общественнай организациянц председателец, профессорсь Ю.А.Мишанин:
—Тячиень форумса тейнек эрявихть ваномс 2018 кизонь итокне и арьсемс-ладямс од тефт 2019 кизонди. Сяс, койсон, пяк пара, што тячиень форумса мархтонк тяфта жа покодихть республикань аф фкя лацонь религиознай конфессиянь и государственнай властень представительхть.
Кода содасаськ, 2018 кизоня Мордовия Республикаса ётафтовсь лама мероприятия, а тейнек марстонь вийса удалась тиемс аф кржа цебярь тев. Инь няевиксне эздост—Российскяй Федерациянь Президентонь и депутатонь кочкаматне, футболть коряс Миронь чемпионатсь. Пингстост и лия мероприятияса сембе минь эрьгавста работаме, сяс тячи ули кода азомс: Мордовиянь общественнай организациятне 2019 кизоть васьфтезь сатомшка няевикс сатфксса.
И тяса нинге эряви азомс: сембе ня сатфкснень тейнек удалась сатомс республикань государственнай властень оргаттнень и представительхнень лезксснон вельде!
Мордовия Республикань Общественнай палатать председателец, «Мордовиянь нароттнень Ассамблеясна» Республиканскяй общественнай культурно-просветительскяй организациять исполнительнай директороц И.В.Капитонов:
—Тейне тячи пара тя форумса няемс ся ломаттнень, конатнень мархта минь марстонь вийса 2018 кизоть кувалмоста тиеме аф кржа цебярь тев, конат няевиста кемокстазь Мордовияса эряй нароттнень ёткса межнациональнай, межрелигиознай и межкультурнай соткснень.
Сяс тячи тейне ули кода азомс: минь, республикань общественнай организациятне, тячис араме стама пуромксокс, конань пуроптозе марстонь тевсь. И тя, койсон, пяк пара.
Минь кулеме лама ни цебярь мяль сянь колга, мезть удалась марстонь вийса тейнек тиемс 2018 кизоня. Сяс мон азса эсь мялезень сянь колга, мезть тейнек эряви тиемс 2019 кизоть кувалмоста. Койсон, инь оцю задачась, кона ащи инголенк,—кандомс эсь марстонь тевоньконь вельде цебярьши кода оцю родинаньконди Россияти, стане и емла родинаньконди—Мордовия Республикати.
Рузонь Православнай Церькавонь Саранскяй и Мордовскяй епархиять секретарец, протоиерейсь Виктор Хохлов:
—Саранскяй и Мордовскяй высокопреосвященнейшай митрополитть Зиновиень лемста, кельгома ялгат, арьсян сембонди шумбраши и паваз!
Тяда башка, сонь лемстонза азондан республикань общественнай организациятненди седи ваксстонь сюкпря ся работать инкса, конань тинь вятьсасть Мордовияса марстонь вийса религиознай организациятнень мархта. Сяс аф стак межрелигиознай и межнациональнай соткснень гармонизацияснон коряс Мордовия Республикась путневи примеркс Российскяй Федерациянь лия субъекттненди.
Владыкать лемста башка спасиба тяфта жа азондан Мордовиянь культурань, национальнай политикань, туризмань и архивнай тевонь министрти А.М.Чушкинонди пяк эрявикс работать инкса, конань сон и министерствань сотрудникне вятьсазь религиознай и лия общественнай организациятнень мархта.
Мордовиянь мусульманонь Центральнай Духовнай управлениянь муфтийсь, Исламскяй культурнай центрать директороц Ф.Ф.Шафиев:
—Мордовиянь мусульманонь Центральнай Духовнай управлениять лемста сембонди арьсян кеме шумбраши, ладяма семьяса и паваз!
Афкукс, 2018 кизось ульсь пяк козя марстонь тевса и аф фкя лацонь событияса. И кизоть кувалмоста тейнек, республикань общественнай организациятненди, удалась тиемс лама цебярь тев, конат няевиста кемокстазь минь народоньконь ёткса сембе ширдень соткснень. И сембе ня тефне тейнек педа-пес тиевсть аньцек республикань государственнай властень оргаттнень лезксснон вельде!
Сяс мон надиян: 2019 кизонь тевоньке, конада, улема, кармай аф сяда кржа тяддень кизонь тефнень коряс, тяфта жа кармайхть тиендевома государственнай властень оргаттнень лезксснон вельде. И марстонь вийса тейнек тиеви и сатови сембось!
Мордовия Республикань Оцюнять Администрациянц Руководителенц заместителец—внутренняй политикать коряс Управлениять начальникоц А.В. Ратников:
—Минь республиканьке нароттнень ёткса кеме ялгаксшить коряс фалу ульсь содаф регионкс. И эрь ломанць, аф ваномок сянь лангс, кодама национальностень сон и кодама Шкаенди сон кемай, Мордовия Республикаса фалу марясы эсь прянц афкуксонь ломанькс.
Кода мярьгсь тяда инголе А.М.Чушкин, Мордовия Республикась нароттнень ёткса межнациональнай, межрелигиознай и межкультурнай соткснень кемошиснон коряс Россиянь лия    субъекттнень ёткса сувси лидерхнень ёткс. И тя афкукс тяфта.
Аф кунардонь социологическяй опрость даннаенза няфтезь: сембе лия кизефкснень ёткста, конат пингстонза макссевсть ломаттненди, 2018 кизоня инь кржаста эсост таколфтсть межнациональнай и межрелигиознай кизефксне. И тя пяк цебярь показатель. И тиесть-сатость сонь тинь—Мордовия Республикань общественнай организациятне.
Мордовия Республикань Оцюнять Администрациянц лемста азондан теенть оцюдонга оцю сюкпря работантень инкса. И минь надиятама: 2019 кизоня тинь тяфта жа эрьгавста и удалафста карматада покодема Мордовия Республикань межнациональнай, межрелигиознай и межкультурнай сфератнень эса.
В.НЕСТЕРОВ.

17.01.2019 №2
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин