Поиск по сайту: 
 

Архив
 август 
 2019 
пн вт ср чт пт сб вс
   1234
567891011
12131415161718
19202122232425
262728293031 

 
 

 

Национальная тематика

УЧЁНАЙ, ЛОМАНЬ,ГРАЖДАНИН…

А.С.Лузгинонь 70 кизонцты
2019 кизонь январьста Мордовия Республикань научнай общественностсь отмечай юбилей—общественнай содаф деятельть, руководительть-государственникть, ученайть, историческяй наукань докторть, профессорть А.С.Лузгинонь 70 кизонц. Александр Степанович путсь оцю путкс региональнай этнографиять, краеведениянь историять и Россиянь родиноведениять конструктивнай виияфтомаснонды. Сонь научнай трудонза: статьянза, монографиянза, учебно-педагогическяй изданиянза арасть шра лангонь книгакс и путеводителькс студентонь несколька поколениянди.
А.С.Лузгин шачсь 1949 кизонь 8 январьста Мордовскяй АССР-нь Торбеевскяй райононь Торбеево велеса. 1966 кизоня шумордазе Торбеевскяй средняй школать.
Сяльде цебярьста аделазе  Мордовскяй госпединститутонь филологическяй факультетть.
Од ломанць фалу арьсесь ученайкс арамать колга. 1973 кизоня А.С.Лузгин поступась Мордовскяй АССР-нь Министронь Советть видеса НИИЯЛИЭ-ть очнай аспирантуразонза «Этнография» специальностть коряс. 1974-1975 кизотнень служась Советскяй Армияса. Меле шумордазе аспирантураса тонафнемать и пцтай сисем кизот работась научнай сотрудникокс тя учрежденияса. Примсесь участия научнай экспедициятнень, плановай издательскяй проекттнень анокламаса. 1981 кизоня од исследовательсь аралазе кандидатскяй диссертациянц. 1986 кизоня А.С.Лузгин примафоль работама партиянь обкомть лекторскяй группазонза, а меле ётафтфоль   КПСС-нь ОК-у межнациональнай отношениятнень коряс консультантокс.
А.С.Лузгин ульсь тевонь ушедыкс Мордовия Республикань национальнай вииямань и межнациональнай сотрудничествань программать васенце вариантонц анокламстонза. Лиссть «В тесном соседстве» монографиясь, а стане жа «Мордовский народ: что нас волнует» книгась (сон ульсь составителькс и статьятнень эзда фкяти авторкс).
90-це кизотне—аф тёждя пингсь. 1991 кизонь сентябрьста сявомок 1992 кизонь февральти молемс учёнайсь работась МАССР-нь Правительстваса. 1992 кизонь февральста сявомок 1998 кизонь августти молемс А.С. Лузгин ульсь вятикс Мордовскяй книжнай издательстваса, а меле 2003 кизонь мартть самс—МР-нь печатень и информациянь министркс.
2003 кизонь мартста сявомок 2013 кизонь сентябрти молемс покодсь МР-нь национальнай политикать коряс Госкомитетонь председателькс, МР-нь министркс.
2003 кизоня МР-нь Госкомнацсь  А.С.Лузгинонь руководстванц ала и РФ-нь мокшэрзянь НКА-тнень мархта арьсесазь мялень салай проекттнень, конатнень еткса «Волгась—миронь ляй. Волжскяй нароттнень культураснон диалогсна» этнокультурнай проектсь.
Тёжянь кизонь юбилейти анокламста А.С.Лузгин ульсь тевонь ушедыхнень эзда фкясь Российскяй Федерациянь региоттнень эса, тяконь лувксса Дагестанца, Ингушетияса, Чеченскяй Республикаса и Кабардино-Балкарияса (2009-2012 кк.), Мордовия Республикань Шитнень анокламаса и эряфс етафтомаса.
Мордовскяй (мокшень и эрзянь) народть VI съездсонза (2014 к.) А.С.Лузгин кочкафоль Мокшэрзянь народть Межрегиональнай общественнай организациянц Исполкомонцты председателькс.
2002 кизоня А.С.Лузгин аралазе докторскяй диссертациянц. Тяштезень «Промыслы Мордовии», «Жизнь промыслов», «Промыслы и мастеровые люди Мордовии», «Народные промыслы мордовского края», «Мордовия мастеровая» монографиятнень.
Юбилеенцты учёнайсь, общественнай и государственнай деятельсь А.С. Лузгин сась цебярь сатфкс мархта, конат отмечафт оцю казнеса—сон Мордовия Республикань государственнай властень органонь Заслуженнай работник, Мордовия Республикань Государственнай премиянь лауреат, улихть государственнай и ведомственнай казненза: «За доблестный труд» СССР-нь медальсь, Славань III степенень орденць, лама лия медальхне.

Мяльхть-арьсемат юбилярть колга
 
Н.Ф.Мокшин,
Н.П.Огарёвонь лемса Мордовскяй госуниверситетонь Россиянь историянь кафедрань заведующайсь, профессорсь:
 «Улень Александр Степанович Лузгинонь докторскяй диссертациянцты научнай консультантокс. Ученайсь, ули кода мярьгомс, кассь сельминголен, содаса сонь нинге студентокс пединститутса тонафнемста. Судьбась теенза аноклась партийно-советскяй работниконь карьера, но сон кочказень научнай исследованиятнень. Фалу оцю мяльса содафнень сонь трудонзон мархта, сяс мес кафцьке заняфтама фкя тевса—этнографияса. Сон аф аньцек теоретик, исследователь, ученай. Александр Степанович фалу ерась поладомс научнай открытиянзон практикати, эреклафтомс ремеслатнень, промыслатнень. Тяфта, теенза удалась мрдафтомс Мордовиянь Ардатовскяй райононь Урусово велети валенцянь кевордиень ингольдень славанц. Эрявсь тя тевса ушеды, и тяфтамкс арась А.С.Лузгин».
Н.М.Арсентьев,
Н.П.Огарёвонь лемса   МГУ-нь Историко-социологическяй институтть директороц, историческяй наукань докторсь, профессорсь,     РАН-нь членць-корреспондентсь:
 «Александр Степанович Лузгин сувси ломаттнень-созидательхнень лувксс. Коса сон афоль уле—работаса или кудса, фалу ляткшни позитивнай ломанькс. Мархтонза марясак пряцень тёждяста, мяльце корхнемс и корхнемс, фалу кирдьсы ширецень. Сон машты оценкань максома, афкуксонь профессионал дискуссиятнень пингста, пяк цебярь специалист наукаса. Александр Степановичень шарьхкодьсазь и примасазь сембе, тияк сон фалу ляткшни тевонь содай политикокс, кона ащи позициянц инкса, аф пелезь азондсыне мялензон-арьсеманзон, сембода пяк, мзярда корхтамась мольфтеви обществать духовнай ширенц—кяльть, историять и народть культуранц ванфтомаснон колга».
Н.И.Воронина,
М.М.Бахтинонь Центранц директороц, философскяй наукань докторсь, профессорсь:
  
«Улемс ученай историкокс аф тёждя, но улемс историкокс, кона фалу панчсесыне эсь народонц эряфонц тайнанзон, тя кафксть стака. Асушиса и апак лотксек вешемаса, эряфонь философиянц мархта сон пцтай пяле век мазопнесы российскяй родиноведениять и Мордовия Республикань краеведениять, пяшкотькшнемок синь од смузьса, панчси гуманитаристикати исследовательскяй од ширет. Сонь руководстванц ала кассть наукань кандидатт и докторхт. Профессорсь А.С.Лузгин,  кода докторскяй советоньконь членоц, фалу мольфти экспертиза и маштозь тиенди рецензият финно-угорскяй прябалатнень коряс диссертационнай работатненди, лезни од ученайхненди исследовательскяй тевсост».
Ю.А.Мишанин,
филологическяй наукань докторсь, профессорсь, Мордовскяй (мокшень и эрзянь) народть Межрегиональнай общественнай организациянц председателец:
     «Александр Степановичень мархта васенце васьфтематнень пингстокивок няевсь, што тя пси седи, панжада вайме и оцю ответственностень маряй ломань. Монь фалу дивандафнесамань сонь тевонь кельгомац и эрьгавста работамац. Аф шуроста улендсь тяфта: ламос лиема, а колма частта меле—научнай конференция. И, кода фалу, минь эсь пряньконь маряськ лац, кда мархтонколь А.С. Лузгин, сяс мес мархтонза сембось лисенди пяк цебярьста. Выступлениянза най салсихть мяль и сембода шарьхкодевихть. Министркс работамстонза кабинетонц кенкшенза фалу панжадотольхть ломаттненди. Н.П. Огарёвонь лемса Мордовскяй госуниверситетонь Национальнай культурань институтса покодемстонза Александр Степанович ульсь фкя инь содаф и кельгови преподавателькс.
П.Н.Тултаев,
Российскяй Федерациянь финно-угорскяй нароттнень Ассоциацияснон Председателец, Саранск ошень округонь оцюнясь:
          «Лац-ряц арьсеф позициясь, семботь лангс ёнюста, шарьхкодезь ваномась—вов мезсь эряви национальнай кизефкснень ванондомста, и Александр Степанович сявондезе тянь руководстванди национальнай политикать коряс министркс улемстонза. Учёнайсь поладозень эсь тевсонза теориять и практикать, сон наукань афкуксонь доктор. Сонь пяк уважандасазь финно-угорскяй мирса. Кирттяма кеме соткст Александр Степановичень мархта. Улемок Российскяй Федерациянь финно-угорскяй нароттнень Ассоциацияснон основной эксперттнень эзда фкясь, сонь козядонга козя опытоц, содасы финно-угорскяй региоттнень эса национальнай кизефксть коряс темать, содасы, кода ащихть тефне—тя сембось пяк и пяк эряви».

17.01.2019 №2
 
 
 

 
НОВОСТИ
 

Новый благотворительный проект для пенсионеров Саранска!

В Саранске с 1 июля стартует новый благотворительный проект «От грёз к реальности». Проект был разработан Мордовским республиканским отделением Общероссийского благотворительного общественного фонда «Российский фонд милосердия и здоровья», его поддержка осуществлена в рамках конкурса социально­-значимых просветительских проектов для пожилых людей «Серебряный возраст» на средства, предоставленные АО «Райффайзенбанк».
Цель проекта—обучение пожилых людей оказанию психологической и педагогической самопомощи и взаимопомощи с целью сохранения благоприятного психологического самочувствия, развития и активизации их интеллектуальной деятельности и позитивной жизненной позиции.
В рамках проекта предполагается осуществить обучение 50 пожилых людей основам геронтопсихологической и педагогической самопомощи и взаимопомощи. Обучение будет проходить на базе ГБУ РМ «Комплексный центр социального обслуживания по г.о. Саранск» с июля по октябрь 2019 года. В качестве выездных мероприятий по проекту запланированы посещения Мордовского республиканского краеведческого музея им. И.Д.Воронина, библиотеки им. А.С.Пушкина, городского зо-опарка.
19.07.2019
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин