Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

В Правительстве РМ

Мордовиянь Оцюнясь ванондозень Гайдаровскяй форумонь площадкатнень эсареспубликать инновационнай ширде виияфтоманц коряс кизефкснень

16 январьста Москуса Мордовиянь Оцюнясь Владимир Волков примась участия
«Россия и мир: национальные цели развития и глобальные тренды» X
Гайдаровскяй форумонь мероприятиятнень эса. Международнай конференциясь
ладяф койс коре пуропневи РФ-нь Президентть видеса Государственнай
службань и народнай хозяйствань Российскяй академияса Е.Т.Гайдаронь
лемса Экономическяй политикань институтть ширень кирдеманц вельде и
Россиянь инновационннай региоттнень Ассоциацияснон мархта.
Форумонь участникокс улендихть Россиянь Правительствань члеттне и омба
масторонь эксперттне, общественно-политическяй деятельхне, биснесонь
представительхне. Деловой программать пингста ванондовсть Россияса и
мирса экономическяй ситуациясь, здравоохранениясь, инновациятне,
цифровой технологиятнень тевс нолямасна, государственнай управлениясь,
территориятнень виияфтомасна и лия кизефксне. Владимир Волков примась
участия мероприятиятнень эса, конат пуроптфтольхть Россиянь
инновационнай региоттнень Ассоциацияснон (АИРР) Гайдаровскяй форумонь
площадкаса. Лятфтасаськ, организацияти сувси инновационнай ширде инь
вии 14 регион: Башкириясь, Мордовиясь, Татарстанць, Алтайскяй,
Красноярскяй и Пермскяй крайхне, Иркутскяй, Калужскяй, Липецкяй,
Новосибирскяй, Самарскяй, Томскяй, Тюменскяй и Ульяновскяй областтне.
Российскяй Федерациянь субъектонь руководительхнень мархта, конат
сувсихть Ассоциацияти, васетькшнесь Россиянь Правительствать
Председателенц Заместителец Виталий Мутко. Рабочай васедемать пингста
ванондовсть региоттнень виияфтомаснон коряс кизефксне.
Мордовиянь Оцюнясь Владимир Волков, азондомок мероприятиянь итокнень
колга, отмечазе, што региоттнень—АИРР-нь члеттнень и Россиянь
Правительствать еткса марстонь работань вятемань кизефкснень ваномасна
етась конкретнайста, территориятнень виияфтомаса инь эрявикс
направлениятнень коряс.
«Ванондовсь межбюджетнай отношениятнень коряс темась, сявомок мяльс
задачатнень, конат ащихть региоттнень инголе, субъектонь эряйхнень
вешфксснон мяльса кирдезь. Сатфт сяда кеме, сембе пингонь основаса   
АИРР-нь члеттнень РФ-нь Правительстваса блокть, кона ваны региональной
виияфтомань направлениятнень мельге, тяконь лувксса инновационнайть,
марстонь тевонь вятемаса договоренностть»,—мярьгсь республикань
Оцюнясь.
Рабочай васедемать пингста Владимир Волков сувафтсь предложения, конань
ширенц кирдезь сембе участникне, инновационннай региоттнень эса
кластеронь инфраструктурань тиемать коряс     проекттнень федеральнай
финансированияснон одукс мрдафтомаснон. «Тейнек тя пяк эряви, сяс мес
сон лезды решандамс вастса инновационннай инфраструктурать виияфтоманц
коряс ламоц кизефкснень»,—мярьгсь республикань руководительсь.
Эряви азомс: Россиянь инновационннай региоттнень Ассоциациянц
даннаензон коряс, Мордовиясь 2018 кизоня арась промышленнай
производстваса инновационнай продукциять талеканц коряс (37,6 процент)
инголи молихнень еткса фкякс. Тяфта жа Россиянь Правительствать
Председателенц заместителенц мархта васедемаса лац-ряц ванондовсть
маластонь кизотнень эряма вастонь строямань объемтнень касфтомаснон
коряс Россиянь Президентть мархта путф задачать пяшкодеманц коряс
мератне. Тяда башка, васедемаса кепсевсть ошень средать цебярьгофтоманц
коряс кизефксне, тяконь лувксса ванондовсть нолдаф федеральнай
средстватнень нолдамс сяда эрявикс направлениятненди—куттнень
перьфснонды ремонтонь или ваймаманди общественнай од вастонь тиеманкса.
Владимир Волков мярьгсь, што сембе тематне ванондовсть практикать и
региононь эряйхнень      вешфксснон мяльс сявозь.

24.01.2019 №3
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин