Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Наука и жизнь

Школась—велеть шамаликоц, ваймоц

Рузаевскяй райононь Трускляй велень школась эсь цебярь тевонзон мархта
лац содаф марнек республикаса. Тяса тиендеви сембось, штоба иттне оцю
мяль вельде тонафнелезь тядянь-алянь кяльть, мокшэрзянь литературать,
народоньконь историянц, культуранц, коензон-обуцянзон. Ламоц тонафнихне
сявондезь васенце и омбоце васттнень мокшень кялень и литературань
олимпиадатнень эса, кой-кит сёрмадыхть эсь кяльсонк стихт, азкст, конат
печатлакшневихть «Якстерь тяштеня» идень журналса. Кафта кизот мельцек
Региональнай олимпиадатнень эса сяськиень диплопт максфтольхть Алёна
Арыкинати и Вера Маскаевати. Тяни Вера тонафни М.Е.Евсевьевонь лемса  
МГПИ-нь филологическяй факультетонь мокшень кялень и литературань
отделенияса. Алёна Арыкинась тяда башка нинге лиссь сяськикс
республиканскяй краеведениянь олимпиадаса.
—Тядянь-алянь кяльть тонафнеманцты, сонь ванфтоманцты школасонк
шарфневи оцю мяль,—азонды школань директорсь Л.П.Иляевась.—Урокта башка
минь шабатнень мархта латцетяма эсь кяльсонк сценкат, ётафнетяма
конкурст, поэзиянь илятть, серьгятькшнетяма школав писательхть. Минь
школасонк аф весть ётафневсь мордовскяй (мокшень и эрзянь) народть
Межрегиональнай общественнай организациянц Исполкомонц заседанияц, коза
тяфта жа серьгятьфтольхть старшай классонь тонафнихне. Нинге школаса
тонафнезь иттне шарьхкотькшнесазь, мзяра путома вий, эрьгя, воляши
минценнеть ванфтомаса, кемокстамаса, сяда вяри кеподемаса. Тяфтама
васедематне лездыхть цёранятненди и стирнятненди улемс афкуксонь
патриотокс, эсь шачема-касома ширень кельгикс.
Трускляень школась—велеть эсь лацонь шамаликоц, ваймоц. Тяса панчф,
работай историянь и краеведениянь музей, вяти оцю тефт «Наследники»
поисковай отрядсь, «Сокол» спортивнай клубса иттне кемокснесазь эсь
шумбрашиснон, сатнихть спортса оцю результатт. Тяда башка, школаса
работайхть сюреса сёрмадомань и  кодамань кружокт, иттне тонафневихть
налхксема эрь кодама музыкальнай инструментса. Эрь ёткшиста Трускляень
школаса ётафневихть «Веселые старты» спортивнай пялькстомат, коса тяфта
жа примсихть участия шабатнень алясна и тядясна. Ня пялькстоматнень
анокламаса оцю путкссна физкультурань урокнень вятиснон Сергей
Васильевич Кукушкинонь и Виктор Иванович Акмаевонь. Кельговсь велень
шабатненди и эень площадкась, коса синь ётафнихть хоккейнай матчт,
шор-треконь пялькстомат.
Мекольдень пингть ламода полафтозе шамаликонц сонць школась. «Детский
спорт» «Единая Россия» партийнай проектть коряс тиф оцю реконструкция
спортивнай залса, коса полафтфтольхть киякссь, уштомань системась,
вальмятне, кенкшне, рамафоль од спортивнай инвентарь. Марнек тянди
нолдафоль фкя миллион цалковай. Лама лезкс эрь кизоня школати тиенди
«Авангард» предприятиясь, коса оцюнякс Н.В.Бурмистров и М.А.Овечкин.
Ётай кизоть синь школав рамасть партат.
—Сембонди, кие кирди школать мархта соткст, мон тячи азан сюконямань
валхт и арьсян кеме шумбраши, паваз,—мярьгсь меколи школань директорсь
Л.П.Иляевась.—Сембонь минь мяленьке фкя—касфтомс афкуксонь эсь шачема
ширень кельгихть, максомс теест кеме содамошит, анокламс синь эряфонь
цебярь кис. Кеняртьфти сявок, што лама од ломань, школань выпускник
лядондыхть эсь шачема Трускляй велезонк, покодихть паксяса, фермаса,
заняфт лия эрявикс тевса. Оттне строяйхть кутт, касфтыхть шабат,
ноляйхть кеме юрхт шачема ширеса.
Н.Лобанов.
Фототне авторть.

24.01.2019 №3
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин