Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Наша семья

ШНАМА СЕМЬЯ ПИЧЕПУЛОНЯСА

Пичепулоня велесь ащи аф мала вастса Атерть эзда. Мзярда-бди тяса
лаказь-лакась эряфсь. Ульсь школа, совхозонь отделения, работасть сембе
службатне. Ламоль од семьяда, шабада. Тяни велесь сиретькшни. Од
ломаньда Пичепулоняса лядонды кржа.
Прянь шнафтома вастокс сембонди ащи Савкиттнень семьясна. Василий
Васильевич мокшень тя велеса шачсь, тязк и лядсь эряма. Сон нинге од,
отькорь мокшаля. Ламось теенза вийс коре. Эсь пингстонза аделазе
Пичепулонянь кафкса кизонь школать. Сяльде тонафнесь Краснослободскяй
велень хозяйствань техникумса. Шумордамдонза меле покодсь
«Партизанский» совхозса тракторнай бригадань бригадиркс. Сокась паксят,
видесь и касфтсь сёра. Тевонц кельгозе. А тоса кандсть армияв повестка.
Родителенза, Василий Степанович и Анна Арсентьевна, бславазь цераснон
цебярьста  служама и шумбраста-тазаста мрдамс куду. Тяфта и лиссь.
Служась Василий Савкин Алма-Атаса, арась сержантокс, отделениянь
командиркс, боевой и политическяй подготовкань отличникокс. Куду мрдась
шумбраста-тазаста. Эстокиге кярьмодсь тевс, сявозь покодема Атерень
промкомбинату главнай инженеркс. Сяльде трудендась Од Кярьга велень
средняй школаса производственнай обучениянь мастеркс-учителькс.
Стройсесь колхоснень и совхоснень эзга фермат, эряма кутт, лия объектт.
Трудендась лесникокс. Тефт мокшаляти мушендовсть фалу. И эрь тевса сон
сафнезе. А 2005 кизоста сявомок вахтань методса якай Москуву добувама.
—А мезе тиемс, кда велеса аш коса работамс,—мярьгсь Василий
Васильевич.—Тяни сембе велень од алятне тряйхть пря столицаса. А кудса
сонь фалу учсы кельгома рьвац Татьяна Лазаревна. Сон стане жа
Пичепулонянь, шачсь и кассь Сержанофнень оцю и трудонь кельги
семьясост. Аляц, Лазарь      Алексеевич, ульсь постуфокс «Партизанский»
совхозса. Тядяц, Варвара Евдокимовна, кулось рана, 42 кизоса. Татьяна
Лазаревна лездсь касфтомс-кеподемс емла брадонзон-сазоронзон. Школать
аделамда меле тонафнесь Темникавонь велень хозяйствань техникумса.
Аделамдонза меле кафта кизот трудендась «Партизанский» совхозса. Тоса
пуроптфоль «Клопинский» совхозсь. Тяса трудендась бухгалтерияса.
Кемготува киза макссь Госстрахти. А мекольдень кизотнень работай велень
библиотекаса и каннесы почтать.
—Тяни велеса работа кочксемс аф сашендови,—виденцясь Татьяна
Лазаревна.—Покодемс аш коса. А тумс шири, кудцень вдь шава аф кадсак.
Минь оцю хозяйстваньке, лама жуватаньке.
Цёрасна, Анатолий, тонафни Саранскяйса кооперативнай институтса.
Сашенды куду эрь недялять. Цёрась трудонь кельги, сембоса лезни кудонь
тевса.
—Велеса эрямась  пара,—виденцясь Татьяна Лазаревна.—Пере путнетяма,
жуватат касфттама. Аньцек вов работать мархта пяк стака. Мирдезе
Москуву якай, а эстейне тяса аф ламня пандыхть, тоса аф ламня. Кода-бди
эряма.
 Вов тяфта и эряйхть велеса, вестевок мезеньге лангс аф пеняцяйхть.
И.Вешкин.
Снимкаса:
Т.Л. и В.В.Савкиттне.

24.01.2019 №3
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин