МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
Рабочай васедемать пингста предприятиять генеральнай директороц Андрей Николаев азозе республикань Оцюняти, што 2018 кизоня заводсь нолдась 1,9 миллион вайгяльбе оптическяй волокна и тяконь мархта васенцеда получась прибыль.
Эряви отмечамс, што васендакиге заводса арьсекшневсь нолямс 2,4 миллион вайгяльбе волокна кизоти. Тяниень пингть РФ-нь промышленностть виияфтоманц Фондонц лезксонц вельде предприятиясь етафнесы эряфс производственнай мощносттнень 4 миллиотт вайгяльбети самс касфтомаснон коряс проектть. Проектть рамкаса 2018 кизонь декабрьста шумордаф дополнительнай технологическяй оборудованиянь и инженернай систематнень монтажсна, тяни етафтовихть нолдамань-ладямань работатне. Касфтф производственнай мощностьс лисемась арьсекшневи тяддеть омбоце кварталста.
Лятфтасаськ, мелянь ноябрьста республикань Оцюнясь Финляндияса рабочай васедеманзон пингста васетькшнесь технологическяй оборудованиянь компаниять-поставщикть руководстванц мархта и ванць машинань васенце партиять Мордовияв грузяманц мельге. Тяда башка, Владимир Волков ванондозе финскяй партнерхнень ширеса оптическяй волокнань вытяжкань заготовкань нолдамать.
Ня заготовкатнень (лиякс синь лемнесазь преформакс) арьсекшневи нолямс и Саранскяйса, тя кармай производствань омбоце очередсь. Тяниень пингть  предприятиясь рамси преформат Японияста.
Мордовиянь Оцюнясь Владимир Волков отмечазе тя проектть оцю эрявиксшинц. «Тейнек сон пяк эряви, сонь эряфс етафтомац лезды валхтомс импортнай поставкатнень эзда ащемать и ладямс Саранскяйса оптическяй волокнань производствать замкнутай цикланц»,—мярьгсь республикань Оцюнясь.
Рабочай васедемать пингста ванондовсть кизефксне, конат сотфт сай пингонь проектть анокламанц мархта.