ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
Эряви азомс, кой-кона од ломаттне фкя пингста арасть несколька премиянь лауреатокс. Кепотьксонди, Асу шабанди Республиканскяй лицеень воспитанникне Сулейман Казимов, Даниил Помогаев и Никита Романов фкя пингста сяськсть естественно-научнай дисциплинатнень, физикать и астрономиять коряс российскяй и международнай олимпиадатнень эса.
В.Д.Волков шарфтсь мяль сянди, што кизоста кизос республикань од ломаттне сатнихть коль сяда оцю сатфкст школьниконь Всероссийскяй олимпиадаса. Меля синь сявсть 49 призовой васта. Казнетнень 80 процентснон сатозь Асу шабанди Республиканскяй лицеень тонафнихне. Стане жа меля синь сявсть кафта золотань и кафта сиянь медальхть международнай и мировой олимпиадатнень пингста.
—Республиканскяй лицейсь несколька киза мельцек занцесы омбоце вастть Россиянь инь цебярь школатнень рейтингсост. Касонды  республиканскяй школатнень лувкссна, конат сувсихть странань 500 инь цебярьхнень лувксс,—азозе региононь вятись.
Кода мярьгсь В.Д.Волков, республиканскяй власттне сяда товга кармайхть кирнема асу од ломаттнень ширеснон. Тяфта, МР-нь Оцюнять валонзон коряс, тядде республикаса арьсекшневи панжемс асу шабатнень мархта работать коряс Центра «Сириус» центрать опытонц мяльс сявозь. Кармай келепневома Идень технопарксь. Тядде тевс сувафтови Идень мобильнай кафта технопаркнень эзда фкясь. А маластонь кизотнень арьсекшневи панжемс нинге колма стационарнай технопаркт республикань райоттнень эса.
Тяда меле В.Д.Волков максозень асу од ломаттненди диплопнень и премиятнень. Благодарностень башка валхт азфтольхть стирьхнень-цератнень тядяснонды-аляснонды, тонафтыснонды. Залса озсеф родительхненди казьфтольхть панчфт и лятфнембяленди казнет Мордовиянь Оцюнять эзда.
Мероприятияса стане жа примась участия Международнай тефнень коряс Федерациянь Советонь комитетть председателенц васенце заместителец С.И.Кисляк. Валонзон коряс, республикань руководствась оцю мяль шарфни образованиянь и од ломанень политикань кизефксненди, мезсь вяти оцю сатфксонь сатнемати.
О.Евдокимова.