Поиск по сайту: 
 

Архив
 июль 
 2019 
пн вт ср чт пт сб вс
1234567
891011121314
15161718192021
22232425262728
293031    

 
 

 

Тема дня

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.
1979 кизоста сявомок 1991 кизоти молемс Валентин Васильевич покодсь Мордовскяй государственнай университетонь Механизациянь и электрификациянь факультетонь деканкс, ульсь руководителькс университетонь зданиянь комплексть—Саранск ошень Ялга рабочай поселкань Механикань и энергетикань институтть строяманцты.
1991 кизоста сявомок 1993 кизоти молемс В.В.Конаков ульсь Агропромышленнай институтти директоркс—Н.П.Огаревонь лемса Мордовскяй государственнай университетса учебнай работать коряс проректоркс.
Валентин Васильевич путсь оцю путкс Механикань и энергетикань институтть, Агропромышленнай институтть материально-техническяй базанц пуроптоманцты и синь научно-педагогическяй кадраснон анокламаснонды.
1993 кизоня В.В.Конаков етай государственнай службас и арай Мордовия Республикаса Российскяй Федерациянь Президентть Полномочнай представителькс. Республикать    вииямаса тя аф теждя пингть Валентин Васильевичень тевонза водендафтольхть Мордовиять политическяй и социально-экономическяй кризисста лихтеманкса, политическяй стабильностень сатоманкса, федеральнай центрать мархта соткснень виияфтоманкса, Российскяй государствать целайкс ванфтоманкса.
2000 кизоня В.В.Конаков етай работама Мордовия Республикань Правительствав Правительствань Председателень заместителень вастти. Валентин Васильевич отвечась социальнай сферать, наукать и од технологиятнень, высшай школать и образованиять виияфтоманкса.
2007 кизоня В.В.Конаков кочкави Мордовия Республикань нилеце созывонь Государственнай Собраниянь депутатокс и арай Председателень васенце заместителькс, а 2010 кизоста сявомок 2011 кизоти молемс—Мордовия Республикань Государственнай Собраниянь Председателькс.
2012 кизоня Валентин Васильевич шумордазе карьеранц политикаса и тага мрдась образованияти—арась вятикс Мордовскяй государственнай университетонь регионологиянь Научно-исследовательскяй институтти и ульсь Мордовия Республикань социально-экономическяй мониторингонь Научнай центрань директоркс. Валентин Васильевич 60-да лама научнай и учебно-методическяй работань автор.
Работань сембе участкатнень эса Валентин Васильевич няфтезе прянц инициативнай, принципиальнай и вешфксу руководителькс, оцю авторитет мархта ломанькс, сонь кельгозь и уважандазь коллективса, коса работцесь, республиканскяй активть и простой ломаттнень еткса.
В.В.Конаковонь лама кизонь сатфксонь канни трудоц отмечандаф государственнай оцю казнеса—«За трудовую доблесть» медальса, Славань III и II степенень орденца, Мордовия Республикань Почетнай грамотаса, «За заслуги. В ознаменование 1000-летия единения мордовского народа с народами Российского государства» медальса. Валентин Васильевиченди максфтольхть «Заслуженный работник высшей школы Республики Мордовия» (1992 к.) и «Заслуженный работник органов государственной власти Республики Мордовия» (2009 к.) почетнай лепт.
Валда мялямсь Валентин Васильевич Конаковонь колга сембе пингс ляды минь седисонк.

В.Д.Волков, В.В.Чибиркин, В.Ф.Сушков, А.В.Воробьев, В.В.Литюшкин, М.С.Сезганов, А.А.Богатов, В.Н.Сидоров, Г.А.Лотванова, А.И.Седов, П.Н.Тултаев, С.М.Вдовин, В.Г.Прокин, П.В.Сенин, В.Н.Тарасов, И.М.Фадеева, В.С.Учайкин.

31.01.2019 №4
 
 
 

 
НОВОСТИ
 
 
 
 
 
 
 

«Сембось ушеткшни ёфксста!»

Тяддень 24-27 июньцта Мордовия Республикаса, республикань Общественнай палатать тердеманц коряс, рабочай визит мархта ульсь советскяй и российскяй содаф писательсь В.А.Бахревский.
24 июньцта Мордовия Республикань Пресс-центраса сон васетькшнесь республикань писательхнень, поэттнень и журналисттнень мархта. Васедемать вятезе Мордовия Республикань Общественнай палатать председателец, историческяй наукань докторсь И.В.Капитонов.
Васедемать ушетксста Иван Владимирович пуромфненди нюрьхкяняста азондсь писательть эряфонь и творческяй кинзон колга. Владислав Анатольевич Бахревский—советскяй и российскяй прозаик, поэт, идень писатель, драматург, публицист, критик—шачсь 1936 кизоня Воронежса. Сермадсь и нолдась иттненди и оцюфненди 30-да лама книга. Инь содафокс арасть сонь «Василий Шуйский», «Никон», «Аввакум», «Страстотерпцы» и лия историческяй романонза. Тяфта жа арасть содафокс «Дворец Золушки», «Кот в сапогах с секретами», «Первоклассник Митя и кролик Ушки-на-макушке» емла лувити ефксонза и азксонза.
27.06.2019  № 25
 

Саранскяйса казезь «Победань диктантса» сяськихнень

22 июньцта, Лятфнемань и ризнамань шиня, Мордовиять столицаса казезь «Победань Диктант»—Великай Отечественнай  войнань темас коре Всероссийскяй диктантть сяськиензон.
Сяськихнень чествовандазь 1941-1945 кк. военнай и трудовой подвигонь Мемориальнай музейса. Синь поздравляндазень и макссь питни казнет «Единая Россия» партиянь МРО-ть Секретарец, партиять Генеральнай советонц членоц Владимир Васильевич Чибиркин.
—Минь аф аньцек лятфнесаськ геройхнень, но и мяленьке шарфтомс общественностть мяленц етай шинь пелькс событиятнень лангс. Историять эряви содамс и мяляфтомс сембонди, штоба куломань канды войнась, кона сявсь 27 миллион ломанень эряф, афоль уле  вестевок. Историять содаманц касфтоманкса и героическяй етай пингть аф лац няфнеманц аф нолдаманкса «Единая Россия» партиять инициативанц коряс сембе странать эзга 7 майста етафтовсь Великай Отечественнай войнань темать коряс Всероссийскяй диктант—«Победань Диктант».
27.06.2019  № 25
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин