Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     

 
 

 

Наши мокшанские сыновья и дочери

70 КИЗА СЕДИКС-ВАЙМОКС СЛУЖАЙ МОКШЭРЗЯНЬ ЛИТЕРАТУРАТИ

25 январьста топодсь 91 киза СССР-нь Писателень союзонь членти, Мордовия Республикань Заслуженнай, Народнай писательти, Славань III степенень орденонь кавалерти А.П.Тяпаевонди. А мзяра лия казнедонза Анатолий Прохоровичень. Сембе синь афи лятфтавихть. Пцтай 70 киза сон седикс-ваймокс служай мокшэрзянь литературати. И вестевок тя оцю пингста ашезь каендакшне, ашезь тушенда шири кочкаф кинц эзда. Сон оцю патриот, мокшень кялень и литературань кельги ломань. А конашкава кельгсыне эсь мокшэрзянь краенц, лувиензон, валса аф азови. Тя эряви кулемс, няемс мархтонза корхнемста. Биографияц А.П.Тяпаевонь козя, интереснай.
Шачсь 1928 кизонь 25 январьста Пензенскяй областень Беднодемьяновск ошса (тяниень Спасск ошса). Рана лядсь тядяфтома. Етась эряма алянц шачема велезонза Кадошкинскяй райононь Пою вели. Тяса аделазе начальнай школать. Средняй образования получась  Глушка велеса. Пингсь стакадонга стакаль. Мольсь войнась. Войнада меле служась армияса. Тяда меле работась «Советская Мордовия» газетаса переводчикокс. Пцтай кемонь кизот покодсь «Мокшень правдаса» литсотрудникокс, культурань и бытонь отделонь вятикс, ответственнай секретарькс. Тяка пингть тонафнесь заочна Мордовскяй госуниверситетса.
Кемонь кизот ульсь васенда ответственнай секретарькс, сяльде главнай редакторкс «Мокша» журналса. Кемгафтува киза работась Писателень Союзонь оцюняти полафтыкс. Тяда меле 21 киза вятезе поэзиянь отделть «Мокша» журналса. Васенце стихотворенияц «Урожай» лем ала лиссь «Мокшень правдаса» нинге 1947 кизоня. Ся пингста етась пцтай 72 киза.
А.П.Тяпаев тянивок стройса. Сермады мялень салай од произведеният, ноляй книгат мокшень и рузонь кяльса.
Печатень кудть каршеса корхнетяма мокшень содаф журналистть Ф.А.Гавриловонь мархта. Ваксозонк нежедсь Мордовиянь Народнай писательсь А.П.Тяпаев.
—Тон сермадыть Советскяй Союзонь Геройть Котовонь колга очеркть «Мокшень правдав»?—кизефтезе Тяпаев ялгазень.
—Мон, Анатолий Прохорович,—отвечась Федор Андреевич.
—Цебярь работась. Морафтыне, пяк мялезон. Сатфкст тейть сермадомань тевса. Учан эздот од очеркт.
—Спасиба, Анатолий Прохорович, эстейтьке кеме шумбраши и од произведеният.
Тяда меле Федор Андреевичень шамац палозь палсь шнамать эзда. Аф азовомшка кенярдсь.
—Архтока, сонць Тяпаев шнамань серматфозень инкса,—виденцясь Федор Андреевич.—Аф сидеста тяфта уленди.
И афкукс, А.П.Тяпаев кинь шнасы, бславасы тяштемань тевти, видекс тевонза туйхть, максыхть ломанти верондама, надияма. Ламотне сонь лемнесазь эстеест учителькс, тяконь лувксса монга.
А.П.Тяпаевонь произведениянзон лангса мон касонь. Финцнень тонафнине школаса. Омбонцнень морафнине вузса. Няендине сермадыснон нинге школаса тонафнемста. Оцю класса тонафнемста «Мокшень правдась» аф весть тернемань Саранскяи велень корреспондентонь пуромксс. Тяста и васенцеда няине писательть. Пара азомс, што А.П.Тяпаев фалу ванць творчествазень мельге. И тянивок сондедонза цебярь, активнай лувиезе аш.  Сон морафнесыне сембе серматфонень, пеетьксонень. Азонкшнесыне эсь мялензон-арьсеманзон. Финцнень шнакшнесыне, омбонцнень лангса, кле, эряволь работамс. И пяк пара, што ули тяфтама лувиезе, оцю букваста Учителезе, кона, аф ваномок мезеньге лангс, тяшни сермат, гайфни телефонца, удалси мархтонза и васетькшнемс. Сонь мялец тейне пяк важнай, питни. И мзярда тяфтама ломанць, кода Тяпаев, тяшти колгат газетаса, журналса, азсыне эсь мялензон телевиденияса, радиоса, марясак пряцень павазукс  кафтонь-крда. Анатолий Прохорович тяшнесь колган, макссесь питне монь книганенди, лия серматфоненди. И тянкса теенза оцю спасиба. Мзярда срхкань сувамс Писателень союзу, Народнай писательсь васенцекс сермадсь  рекомендация. А тя корхтай пяк ламонь колга.
Аф ваномок кизонзон лангс, А.П.Тяпаев тяфтамка жа отькорь, ламонь тяшти ломань. Панчсак «Мокша» журналть, тосот Анатолий Прохоровичень од произведениянза. «Мокшень правдативок» максси сидеста и лятфнемат, и стихт, и пеетькст. Кялец козя, оржа, сембонди шарьхкодеви. Кона произведениянза пичефтихть, арьсефтихть, конатнень лувомста пеккедь шоват, кеподихть мяль.
А.П.Тяпаев фкя инь кельгома, содаф писательсь аф аньцек мокшэрзянь крайса, но  и сембе странаса. Аф лятфтавихть сембе книганзон лемсна. Синь лисендсть и мокшень, и рузонь кяльса. Ламоц произведениянза печатлафтольхть марстонь сборникнень, периодическяй изданиятнень эса. Произведениянза етафтфт лама кяльс. Синь тонафневихть школаса, вузса. Студенттне корязост тяшнихть курсовой, дипломнай работат. Лятфневихть, ванондовихть кандидатскяй, докторскяй диссертациянь сермадомста. Вов аньцек кой-кона книганзон лемсна: «Алянь мода», «Седть лангса тол», «Тяште лангонь алашат», «Миртть-рьват», «Тяштю менель ала», «Сусетт», колма томса кочкаф произведеният и стак тов. Синь башка книгакс лисендсть Мордовскяй книжнай, Москувонь «Идень литература» издательстватнень эса. Синь оцю мяльса васьфтезь Мордовиянь, странань лувихне. Оцю оценка макссть литературнай критикне, синць морафтыхне. Кие аньцек ашезе ванонда, кие аньцек ашезь тяшне писательть творчестванц колга. Нят писательхть, журналистт, учительхть, ученайхть, литературань и мокшень кялень кельгихть. Лац содафт А.В. Алёшкинонь, М.Г.Имярековонь, М.И. Малькинать, Е.И.Черновонь, С.А.Самошкинонь, В.М.Макушкинонь и лиятнень работасна.
А мзяра оржа, интереснай кизефкста А.П.Тяпаев кепсесь и кепси периодическяй изданиятнень эса. Эсост корхтамась мольфтеви литературать, кяльть колга. Сермадсь пяк лама рецензия, макссь писателень портретт. Синь лездыхть сяда лац содамс мокшэрзянь литературать, отвечамс оржа, аф шарьхкодеви кизефкснень лангс. Лятфтаса, кепотьксонди, «Эряй велесонк поэт» очерконц мокшень поэтть А.М.Кудашкинонь колга, кона печатлафоль «Мокшень правдаса». Андрей Матвеевич шачсь и кассь Мокшень Мазканя велеса Ельниковскяй районца. Сонь лемнесазь Мокшень Островскяйкс. Эрясь аф ламос. Стакаста сярядсь. Кенерсь нолдамс вете книгат мокшень кяльса. Касфтсь мокшень кафта содаф поэтт—М.Г.Имярековонь, И.Н.Кудашкинонь. А мезе Андрей Матвеевичень колга содатама? Пяк кржа. Тейне, мярьктяма, колганза пяк лама азонкшнесть учениконза. Улихть кядьсон книганза.
—А мон сонь няендине, васьфнень мархтонза,—корхтай Анатолий Прохорович.—Ащесь Саранскяйса, республиканскяй больницяса. Якань варжамонза. А аф лама пингта меле Андрей кулось.
Андрей Кудашкинонь стихонза мокшень тонафнема книгатнень эсот. Кда аф Тяпаев, Кудашкин, Имяреков, учительти колганза афоль уле мезе азомска. Сюкпря тянкса теест.
Сермадсь А.П.Тяпаев и П.Н.Черняевонь колга. Сон мокшень ломань, оцю поэт-песенник. Эрясь Лобня ошса. Моронзон морсезь Людмила Зыкина, Ольга Воронец, лиятне. Коста колганза содалеме, кда аф А.П.Тяпаев. Серматфонц аш питнец.
Анатолий Прохорович макссь оцю питне и М.Н.Бычковонь творчестванцты. Арьсян, што инголе Тяпаевонь лама апак аделак тевдонза. Кармайхть од произведениянза, рецензиянза, очерконза. Лисихть и од книганза.
Анатолий Прохорович пяк лямбе, панжада седи ломань. Машты инжиень примама-каваняма. Аф весть пялонза улень монга. Тянь азса прянь шнафтозь, гордостень марязь. Эсь сельмосон няендине, што тя ломанць фалу работаса. Мокшень изданияда башка лама лувонды рузонь кяльса. Лувонды, штоба эстеенза шарьхкодемс, мезе однясь тячи литератураса, кодама од книгат, произведеният лиссть издательстватнень эса. Мезень лангса споряйхть миронь писательхне, кодама кизефкст кепсихть. Эряфса мезське аф ащи фкя вастса. Полафни пингсь, полафнихть школьнай программатне, тонафнемань книгатне. Сувафневихть од авторхт, произведеният. Вийс корят ли шабатненди, синь тонафтыснонды шарьхкодемс тя или тона произведениять, авторть. Анатолий Прохорович азонкшнесыне эсь мялензон-арьсеманзон, максси пара советт ся ломаттненди, конат аноклакшнесазь, кемокснесазь и етафнесазь эряфс ня программатнень.
Мекольдень пингть А.П.Тяпаев шуроста васьфни лувихнень мархта. Аф няендьсаськ сонь литературнай мероприятиятнень эса. Аф максси интервьют. Но тя ефси аф корхтай сянь квалма, што Анатолий Прохорович аф лисенди кудста. Меколанкт, якай калонь кунцема, базару, лавкав. Фалу кельгома и учсеф инжи редакциятнень эса. Перац мзярдовок аф ношкамкшни, тяшти и тяшти мокшень алясь.
Ня шитнень, кода азоськ ни, А.П. Тяпаевонь ульсь шачема шиц, теенза топодсь 91 киза. Арьсетяма оцю писательти, пяк цебярь ломанти, ялгати, учительти кувакадонга кувака эряф, кеме шумбраши и творческяй од сатфкст.
Илья Вешкин,
Россиянь Писателень
союзонь член.

31.01.2019 №4
 
 
 

 
НОВОСТИ
 
 
 
 
 
 

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019  № 14
 

1 апрельста ушедсь 2019 кизоть омбоце пяленцты газетас и журналс сёрматфтомась

11.04.2019  № 14
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин