Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Национальная тематика

КАЗЕНДИ ЛОМАТТНЕНДИ КЕНЯРДЕМА

 
Оцю паваз мумс эряфса эсь вастцень. Ломанць, кона заняф кельгома тевсонза, фалу сашенды работама кепотьф мяльса. А кда ушеткшни эсь тевонц колга азондома, сельмосонза крьвязькшнихть валда цятконят. Тянь ули кода азомс Саранск ошень округонь Культурань дворецонь эряфкшу ломаттнень мархта работать коряс отделть вятиенц, мокшавать Т.И. Кадейкинать колга. Татьяна Ивановнань марнек эряфоц сотф культурать, культурно-просветительскяй работать мархта. Сон васьфни-содафни лама ломань мархта, пуропни-аноклакшни теест аф фкя лацонь илат, мероприятият, конатнень пингста сонцьке лисенди сценать лангс. Эсь тевонц мокшавась пяк кельгсы и лувондсы сонь инь мялень салайкс.
 
Шачсь-кассь Т.И.Кадейкинась Инсарскяй райононь Шадымо-Рыскино велеса. Тядяц, велень учительсь, и аляц, кона лама киза покодсь колхозонь председателькс, касфтсть ниле шабат. Ёт школаса тонафнемста тячиень героиняньке пяк кельгозе кштиманц-мораманц, оцю мяльса якась творческяй кружокненди. А школать аделамда меле поступась тонафнема Ардатовань культпросветучилищав, оцюволь мялец арамс клубнай работникокс. Васенда, тядянц мярьгоманц коряс, кагодонзон максозень библиотечнай отделенияв. А мзярда экзаменонь примайхне кулхцондозь мокшень стирть, приметафоль морамань асувоц, сон етафтфоль хоровой дирижированиянь отделенияв. Тяса Кадейкинась васенцеда няезе пианиноть, но нюрьхкяня пингста тонадсь лангсонза морама ся тонафни ялганзон коряс, конат аделасть музыкальнай школа.
Училищать академическяй хоронь вяти специальностьс коре лац шумордамдонза меле МР-нь Культурань министерствась макссь Татьяна Ивановнанди аф конкурсс коре направления Культурань Московскяй государственнай институтть Рязанскяй филиалозонза поступаманкса, коса мокшавась получазе культработниконь, культурно-просветительскяй работань организаторонь-методистонь квалификациять.
Институтта меле Татьяна Ивановна арьсекшнесь лисемс работама клубу, но тядяц ащесь тянди каршек. Эсь трудовой биографияц мокшавась ушедозе Кадошкинскяй средняй школаса. Мзярда пуроптфоль Кадошкинскяй районць, Т.И.Кадейкинась тертьфоль вятемонза «Дом пионеров и школьников» шабанди дополнительнай образовательнай учреждениять. 16 киза мокшавась ульсь тяса директоркс.
Комсь ветие киза педагогическяй тевонь вятемста Татьяна Ивановна  пуроптсь «Мордовочка» идень фольклорнай ансамбль, педагогическяй коллективть еткса ансамбль, ветеранонь хор. Вятсь оцю работа «стака» подросткатнень мархта. Тонафнемста и работамста Т.И.Кадейкинась примсесь участия районца и республикаса етафневи мероприятиятнень эса.
Пенсияс лисемдонза меле Т.И.Кадейкинась етась эряма Саранскяи и лиссь работама Саранск ошень округонь Культурань дворецу. Васенда покодсь ведущай методистокс, тяни вятьсы эряфкшу ломаттнень мархта работать коряс отделть.
2014 кизоня Культурань кудть видеса Татьяна Ивановна пуроптсь «Мокшаночка» фольклорнай ансамбль. Тя коллективу сувасть Ковылкинскяй, Старошайговскяй, Инсарскяй и Кадошкинскяй райононь мокшаватне, конат тяни эряйхть Саранскяйса. Сембоц ансамбльть эса кемонь морси. Коллективсь морси сире пингонь мокшень и рузонь морот, а сценать лангс артисттне фалу лисендихть пяк мазы мокшень щамса.
«Мокшаночка» ансамбльсь сидеста примси участия аф фкя лацонь мероприятиятнень, илатнень пингста, тяконь лувксса «Шумбрат, Мордовия!» народнай творчествань республиканскяй фестивальса. Татьяна Ивановна сонцьке морси тя коллективса.
Саранск ошень окргуонь Культурань дворецса работамста Т.И.Кадейкинась стане жа пуроптсь «Гармониянь кельгиень клуб», коза сувасть кемотть гармонист и сиде моронянь морсихть. Кепотьксонди, инь сире гармонистти клубса 85 киза, а сембода отти аньцек кемгафксува. Клубонь участникне лац содафт Саранскяйса и кельговихть тястонь эряйхнень мархта. Гармонисттнень и сиде моронянь морсихнень ули кода няемс-кулемс «Шумбрат, Мордовия!» нарднай творчествань республиканскяй фестивальса, «Масланця» народнай праздникса, «Морак, гармония» ошень иласа, «Моя весна, моя победа» фестивальса-конкурсса и лия мероприятиятнень эса.
Аф фкя киза ни Культурань дворецть видеса работай «Ветеран» ошень клубсь. Сонь стане жа вятьсы тячиень героиняньке. Татьяна Ивановна сидеста етафни аф фкя лацонь пуромкст, коза сашендыхть эряфкшу ломаттне—поэтическяй, литературнай илятть, шахматаса налхкомать коряс студият, лятфнемань илятть, конатнень пингста тевс нолневихть документальнай фильматне. Т.И.Кадейкинась фалу старандай етафнемс пуромкснень интереснайста, кеподемс эряфкшу ломаттнень мяльснон. И тя сонь аф кальдявста лисенди. Клубонь участникнень лувкссна коль касонды, а Татьяна Ивановнань лемс сидеста кайгондихть спасибамань валхт.
Т.И.Кадейкинать организаторонь маштомошинц вельде мяляфтовиста и мялень салазь етнихть васедематне «Капель» авторскяй моронь и «Без возраста» васедемань клубса.
Кода ни азоськ вяре, Т.И.Кадейкинась пяк кельгсы эсь тевонц и малаткшни теенза оцю ответственностень марязь. Сон кельгсы работамс ломаттнень мархта, каннемс теест кенярдема. Мокшавась фалу старандай работасонза нолнемс тевс мезень-мезень одня. Башка мяль шарфни национальнай ширети—культурать, койхнень-обуцятнень ванфнемаснонды.
Тевонц лац тиендеманкса Татьяна Ивановна казьф лама оцю казнеса—Мордовия Республикань Правительствать Почетнай грамотаса, МР-нь Оцюнять Благодарностьса, Мордовиянь Культурань министерствать грамотаса и дипломса, лия казнеса. Аф кунара МР-нь культурань, национальнай политикань, туризмань и архивнай тевонь министрсь казезе Татьяна Ивановнань «За межнациональное согласие» медальса.
Т.И.Кадейкинась аф аньцек эсь тевонь лац содай работник, сон кельгома тядя и щава. Татьяна Ивановнань кафта иденза, конат мзярдовок аф колсесазь мяленц. А инь оцю гордостень маряма вастоц мокшавать емла уноконяц.
О.Евдокимова.

31.01.2019 №4
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин