Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

«НАЦИЯНЬКОНЬ СУДЬБАЦ— ЭСЬ КЯДЬСОНК»

     —Юрий Александрович, азондость, кода мольфтевихть анокламатне мокшэрзянь народть Всероссийскяй VII съездонцты? И кит теенть лездыхть ня тефнень вятемста?
      —Мокшэрзянь народонь Межрегиональнай общественнай организациять Уставонц вешфксонзон коряс, минь народоньконь Всероссийскяй съездонза ётафневихть эрь вете кизоти весть. Сяс мокшэрзянь народть Всероссийскяй VII съездоц арьсеф ётафтомс Мордовиять столицаса тядде 23-25 октябрьста. Форумса кармай 750 ломань, конат сайхть съезду Российскяй Федерациянь 50 регионцта. Съездсь арьсекшневи ётафтомс И.М. Яушевонь лемса Оперань и балетонь национальнай театрать мазы, оцю и валда залсонза, коса съездонь делегаттненди, наблюдательхненди и инжихненди ули кода покодемс цебярь условияса.     
         Съездонь анокламань кизефкснень коряс 22 январьста ётафтсь совещания Мордовия Республикань Оцюнясь В.Д.Волков. Пингстонза Мокшэрзянь народонь Межрегиональнай общественнай организациянь Исполкомть членонзон мархта республикать лидероц ванозень сембе эрявикс кизефкснень, конат эрявихть пяшкодемс съездть цебярьста ётафтоманц инкса. Совещанияса В.Д.Волков тяфта жа макссь порученият съездонь мероприятиятнень ётафтомс Российскяй Федерациянь государственнай национальнай политикань Стратегиять рамкаса.
Тя пингста Мокшэрзянь народть Всероссийскяй VII съездонц анокламанц и ётафтоманц коряс аноклави Мордовия Республикань Оцюнять специальнай Указоц. Арьсян, эсонза кармайхть максфт съездть анокламанц и ётафтоманц коряс конкретнай порученият Мордовиянь Правительствати и азови-кемокстави съездонь Организационнай комитетть составоц. Минь предложенияньконь коряс, тоза сувайхть содаф ломатть, конатненди вийс коре максомс тейнек эрявикс лезкс съездонь мероприятиятнень анокламста и етафтомста.
      
      Тяда башка, минь тиеме ни съездть анокламанц коряс рабочай группа. Ломаттне, конат тоза сувасть, кармайхть аноклама съездонь документтнень и тиема лия эрявикс тефт съездть лац ётафтоманц инкса.
     —Кода содаф, Юрий Александрович, мокшэрзянь народть Всероссийскяй эрь съездоц етафневсь эсь девизонц вешфксонзон коряс. Сяс пара улель содамс, кодама девизонь ала арьсеви етафтомс тяддень съездсь и мес кочкаф тя девизсь?
      
—Мокшэрзянь народть VII съездонцты темакс, конань коряс и конань эшксса кармай мольфтевома съездть работац, минь кочкаськ-ладяськ тя девизть: «Мордовский (мокшанский и эрзянский) народ в едином культурном коде многонациональной России». Койсон, сон инь цебярьста поладозе VI съездонь девизть—«Мордовский народ в формировании общероссийской гражданской идентичности»—идеологиянц.
    И тя идеологическяй поладомаса минь лац няйсаськ: Мокшэрзянь народть Межрегиональнай общественнай организацияц тага весть няфнесы эсь ответственностенц Россиять судьбанц инкса!
      
      Тянди улихть оцюдонга оцю и пара туфталхт. Минь народоньке, кона эряй Россияса 1000 лама киза, ашезень полафта эсь национальнай шамаликонц, эсь кялензон и культуранц. Мокшэрзянь народсь Россиянь лия нароттнень мархта тись-касфтсь и фалу аралась Российскяй государствать эса. Сяс лама национальностень Россиять—марстонь культурнай кодонц квалма темась арась тейнек пяк актуальнайкс, кирдемок мяльса полафткснень Российскяй Федерациянь государственнай национальнай политикань Стратегияса, конат кемокстафт Россиянь Президентть В.В.Путинонь 2018 кизонь 6 декабрень Указса.
        —Юрий Александрович, кодама вешфксонь коряс кочкавихть съезду делегаттне?     
       —Мокшэрзянь народть Межрегиональнай общественнай организациянц Исполкомонц решениянц коряс, ладяфт делегатонь кочкамань тяфтама нормат.
       
Российскяй Федерациянь эрь субъектса, коса вятьсазь тевснон Мокшэрзянь народть Межрегиональнай общественнай организациянц Региональнай отделениянза, эрь 3000 мокшэрзяста кочкави 1 делегат. Ся регионца, коса мокшэрзяда 1000 лама, но 3000 кржа, тяфта жа кочкави 1 делегат.
     Мордовия Республикаса делегаттне кочкавихть тяфта. Саранск ошень райоттнень эса эрь 1000 мокшэрзяста кочкави 1 делегат, а республикань муниципальнай райоттнень эса  1 делегат кочкави эрь 2000 мокшэрзяста.
       Ня вешфкснень коряс, 744237 мокшэрзятнень эзда съезду кочкави 350 делегат.
      Тяда башка, съездса кармайхть наблюдательхть и инжихть Российскяй Федерациянь 50 регионцта. Марнек мокшэрзянь народть VII съездса, кода сяда вяре азыне ни, кармай пцтай 750 ломань.
      
       —Кодама инь оцю кизефкст кармайхть вановома VII съездса?
       —Васенцекс, конешна, ванови, мезе ульсь тиф ётай вете кизоста. Лиякс мярьгомс, кода ётафтфт эряфс Мокшэрзянь народть VII съездонц Резолюциянц вешфксонза.
      Сяльде съездонь кафта пленарнай и вете секциянь заседанияса вановихть ня кизефксне: кода марясы тячи эсь прянц мокшэрзянь народсь российскяй социумса, кода эряйхть тя пингонь национальнай культурась, литературась, газетатне и журналхне, мокшень и эрзянь кяльхне, кода и кодама работа мольфтихть марстонь вийса властсь и общественнай организациятне, кода ащихть тефне семьянь койхнень ванфтомаснон и демографиянь процесснень мархта.
       Съездса сембе доклаттне и выступлениятне, делегаттнень мяльснон коряс, кармайхть азондовома рузонь, мокшень или эрзянь кяльса. Съездонь сембе решениятне кармайхть кемоксневома панжада голосованияса.
       —Юрий Александрович, VII съездть идеологиянц мокшэрзянь и Россиянь лия нароттнень ёньц и ваймос пачфтеманкса, кодама мероприятият арьсеви ётафтомс Мордовия Республикаса и Российскяй Федерациянь лия субъекттнень эса, коса компактнайста эряйхть мокшэрзят?  
       —Мокшэрзянь народть VII съездонц  идеологиянц нароттненди пачфтеманкса Мордовия Республикаса и Российскяй Федерациянь пцтай 50 субъектса, коса улихть Мокшэрзянь народть Межрегиональнай общественнай организациянц Региональнай отделениянза, ётафтовихть научно-практическяй конференцият, мокшэрзянь культурань шит, национально-фольклорнай илат и лия эрявикс и няевикс мероприятият.
       Инь няевиксне ётксост, койсон, «Шумбрат!» Всероссийскяй национально-фольклорнай илась, «Волгась—ялгаксшинь ляй. Волжскяй нароттнень культураснон диалогсна» Международнай этнокультурнай экспедициясь-фестивальсь и торжественнай мероприятиятне, конат лемтьфт мокшэрзянь народть великай просветителензон А.Ф.Юртовонь и М.Е.Евсевьевонь юбилейснонды.
     
     —Кода мокшэрзянь общественнай деятель, учёнай и Россиянь гражданин, Юрий Александрович, мезе тон учсят мокшэрзянь народть VII съездонц эзда?
      —Мон надиян: мокшэрзянь народть Всероссийскяй VII съездоц максы цебярь импульс сембе тевоньконди. Лезды тейнек ванфтомс и виияфтомс мокшень и эрзянь кяленьконь, национальнай культураньконь, коеньконь и национальнай шамаликоньконь российскяй нациянь нароттнень семьяса!
                                                                                                                                       В.НЕСТЕРОВ.  
 

14.02.2019 №6
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин