Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Наши мокшанские сыновья и дочери

СИНЬ ПЯШКОДЕЗЬ ИНТЕРНАЦИОНАЛЬНАЙ ДОЛГСНОН

     15 февральста топоди 30 киза ся пингста, кода Советскяй войскатне лихтьфтольхть Афганистанть территорияста. Войнась, конань официальнайста примафоль лемнемс «интернациональнай долгонь пяшкодемакс», мольсь вейхкса кувака кизот. Тя пингста советскяй войскатне примасть участия 416 плановай боевой операцияса. Од ломаттне тушендсть служама армияв, и ламоц тядятне-алятне ашезь сода, што церасна прважафт ичкоздень Афганистану. Ламотне, пяк ламотне ашесть мрда тюремань паксяста, прасть душманонь пулятнень ала. Но синь, ёфси од цератне, мекольце минутас молемс аф пелезь, афкуксонь геройкс пяшкодсть воинскяй долгснон эса. Синь повондсть засадас и палсть БТР-хнень эса, нилендезь пульть пулеметтнень ляцендемаснон ала, эсь эряфонь аф ужяльдезь тарксезь тюремань паксяста ранендаф ялгаснон, лядондсть ськамост врагть каршес, кяшендемок эсь мархтост ялгаснон меки потамаснон.
Тейнек, тячиень од ломаттненди, арьсемска стака, мезе савсь няемс-кирдемс советскяй солдаттненди. И аньцек кой-конашкада ся кизотнень мархта содафокс тиендьсамазь войнань участникнень лятфнемасна.
       …Саранск ошень эряйть, адвокатть В.П.Бородкинонь мялямса тячемс, кода кинокадраса, сяка-тев кфчиихть Афганскяй событиятне, мзярда 1979 кизоня синь танковай полксна сувась тя странав. Эста теенза ульсь аньцек 19 киза.
      Шачемас-касомас коре Василий Петрович Краснослободскяй райононь Од Синдру велеста. Аляц, Петр Ильич Бородкин, Великай Отечественнай войнань участник. Фронтса ульсь пулеметчикокс, политруколь. Войнада меле работцесь школаса учителькс. Рьванц мархта касфтсть кота итть: вете цёрат и фкя стирь. Петр Ильич лама и псиста азонкшнесь шабанзонды войнать и Родинати кельгомать колга. Шять, ня азфне и арасть церанцты, Василиенди, эряфса кинь няфтикс, кошардозь улемс видешинь кельгикс, шачема масторонь патриотокс.
       1979 кизоня Саранскяень электроннай приборонь техникумть шумордамда меле В.П.Бородкин тертьфоль Советскяй Армияв служама. —Частеньке Узбекскяй  ССР-нь Термез ошсоль, кона ащи Афганистанть мархта границать ваксса,—ушедозе азондоманц мокшалясь.—Тяса шуди Амударья ляйсь.—Мон служань танковай полкса, связень ротаса. Эсонк анокласть инголькиге. 1979 кизонь 10 декабрьста кеподемазь тревогас коре и полконьконь путозь запасной полигонц. Сембось ладяфоль военнай пингть коряс. Тяка кизонь 25 декабрьста шоподемшовор понтоннай седть ланга етаме границать омбокс. Тяда инголе эрь солдатти максфоль памятка, коса азфоль, кода вятемс пряньконь лия странаса. Минь содаськ, што мольхтяма Афганистанонь ломаттненди лездома, а аф каршезост тюрема.
Василий Петрович, кода связист, озафоль командно-штабной машинаса бронетранспортерса. Мархтостоль полконь командирть заместителец Файзуллин. «Саланг перевалти молемс ашеме куле оружияста ляцендемат,—лятфнесы «афганецсь».—А перевалть эзга етамста вень сетьмоть сяка-тев сязендезь автоматонь, пулеметонь очереттне».
     
      Кафта шит танковай полксна ащесь Пулихумри шахтерскяй ошть ваксса. А меле ульсь тревога и танковай полксна, сембе мотострелковай дивизиясь тусь Кабул ошть шири и кружазе аэродромть. Тосольхть и десантникне. Сухопутнай войскатнень эзда васенцекс сувасть Кабулу. Меле, кода лятфнесы Василий Петрович, фкя танковай батальонць, противовоздушнай средствань подразделениятне и разведвзводсь кучфтольхть Пакистанть ширде китнень ваксс. Командирхне азонкшнезь, што разведкать даннаензон коряс, тя странав ерасть эцемс американецне. Советскяй войскатне инголдазь синь…  
       —Американецне макссть душматтненди лама оружия, тонафнесть эсост. А тунда тонат ушедсть лангозонк врьгятнема. И минь етафнеме рейтт, вешендеськ и машфнеськ,—коль азондсь В.П.Бородкин. Пачфтсь мокшалясь Афганистанонь эряйхнень мархта содафтомаснон колгавок. Мзярда, кле, суваме кишлакозост, няеськ, кодама ашуста тяса эряйхть ломаттне. Тялось эста якшамоль. Советскяй солдаттне макссесть эряйхненди щапт: каннеф шинельхть, васьт. Аннезь эсь ярхцамбяльстост. А советскяй специалисттне стройсесть Афганистанца предприятият, военнай ошкат.
—Лиякс мярьгомс, саме тяза аф воявама, а лездома,—мярьгсь мокшалясь.—Тя пяк ашезь тушенда американецнень мяльс и синь тиендезь семботь, штоба минь войсканьке лисельхть тя странаста. И 80-це кизотнень песта тя теест удалась.
      Полксь, конань лувксса ульсь Афганистанца мокшалясь, лихтьфоль тя странаста 1980 кизонь июньцта. В.П.Бородкин казьфоль «Афганистанскяй народть эзда благодарностень» медальса, правительственнай казнеса. Меле МВД-са лац служаманкса казьфоль СССР-нь Верховнай Советть Президиумонц грамотаса, ВЛКСМ-нь ЦК-нь знакса.
1988 кизоня, Василий Петровичень рекомендациянц коряс, эсь воля анась пря служама емла брадоц  Александр. «Тейть эряви етамс тя боевой братствань школать»,—тяфта корхнесь Василий Петрович  радня ломаненц армияв прважамстонза. А сонць мокшалясь, лама пингонь етазь, 1995 кизоня, Чеченскяй кампаниять пингста одукс тюрсь бандформированиятнень каршес, тяни эсь странаньконь территорияса. Кода лятфнесы Василий Петрович, теенза нльне савсь корхнемс-кизефнемс Дудаевонь дуганонц.
       Афганскяй войнада меле В.П.Бородкин тонафнесь  Н.П.Огаревонь лемса МГУ-нь юридическяй факультетса. А 2001 кизоста сявомок, пенсияс лисемозонза, работась МР-ть эзга МВД-нь следственнай подразделенияса. Орадсь аф фкя преступления, кирдсь закононь сядот колси. Фкя шиста следовательсь, а меле старшай следовательсь Василий Петрович Бородкин кучсесь суду 5-6 уголовнай тев. Дополнительнай расследованиянь етафтоманкса меки ашезь мрдафтов фкявок тев. Василий Петрович фалу ащесь видешить, справедливостть инкса. И сембе пинкнень лядондсь патриотокс. Тяниень пингть «афганецсь» В.П.Бородкин работай адвокатокс. Эрь шиня лезни ломаттненди, мезенкса куленди лемозонза спасибамань валхт.                                                                              
 
                                                                                                                                          О.Евдокимова.  
 

14.02.2019 №6
 
 
 

 
НОВОСТИ
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин