Поиск по сайту: 
 

Архив
 январь 
 2020 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Культура

С.А.Самошкинонь 104 кизонь топодеманцты

    
Семен Аверьянович Самошкин шачсь 1915 кизонь 1 февральста Зубово-Полянскяй райононь Потьма велеса крестьянонь семьяса. 1937 кизоня аделазе Саранскяй педагогическяй училищать, сяльде работась Зубово-Полянскяй райононь Булдыгинскяй школаса. Тоста сявозь работама Ширингушскяй ВЛКСМ-нь районнай комитету инструкторкс. Сяльде эряфонь киц вятезе Мордовскяй книжнай издательствав, коса покодсь корректоркс, «Якстерь галстук» журналса  литсотрудникокс, «Мокшень правда» газетаса пропагандань и агитациянь отделонь заведующайкс, радиоинформациянь комитетонь главнай редакторкс, Мордовскяй книжнай издательствань редакторкс, «Советская Мордовия» газетаса ответственнай секретарькс. 1944 кизоня аделазе А.И.Полежаевонь лемса МГПИ-ть заочнай отделениянц, сяльде—аспирантурать. С.А.Самошкин филологическяй наукань кандидат, Россиянь Писателень союзонь член.
 
 
Стихонь васенце книгац лиссь 1945 кизоня «Сяськома» лем ала. Тяда меле С.А. Самошкин нолдась стихонь и очерконь лама книга. С.А.Самошкин содаф аф аньцек кода поэт и литературовед. Сон тяштсь и художественнай проза. Синь ётксост «Павазонь тяште» (1960), «Эряфть юроц» (1965), «Эрьгя» (1976), «Виияма» (1981) книганза. Эсост сон кепсесыне эряфонь важнай кизефкснень, башка мяль шарфнемок пингть социально-нравственнай ширензонды. Тяштсь поэтсь шарьхкодевиста, маштозь нолямок тевс кяленьконь сембе козяшинзон. Инь кельгома теманза—Родинати седикс-ваймокс служамась, сонь араламац, шачема-касома масторть славанц, виенц-эрьганц касфнемац. Оцю мяль С.А.Самошкин шарфнесь перьфпяльть ванфтоманцты. Поэтть лирикаса маряви оцю кенярдема, верондама вандыень шити.
 
Семен Аверьянович содаф нинге кода литературовед и критик. 1970 кизоня лиссь «Мордовская детская литература» монографияц, а стане жа М.Безбородовонь и Т.Кирдяшкинонь творчестваснон колга статьянза.
 
 Сон мордовскяй школатненди  хрестоматиянь,        педучилищатненди идень литературать коряс программань автор. Няфтезе прянц кода рузонь кяльста асу етафты. Мокшень кяльс етафтозень А.Пушкинонь, В.Маяковскяень, М.Горькаень, Н.Некрасовонь, А.Грибоедовонь «Горе от ума» комедиянц. Сонцень Самошкинонь произведениянза ётафтфт рузонь, коминь, марийскяй, чувашскяй кяльс.
 
С.А.Самошкин кулось 1999 кизонь 12 апрельста, калмаф Саранскяи.
 
ПАРЬХЦЯ ЛЯЙНЯСЬ
Тинь ашесть вана
Парьхця
ляйнять?
Ну, мезе кда, шуди стак,
И аф крхка и бта тяйня,
 
А тяряфтт уемс, аф уйсак.
Тя сянгярь, калю берякть
 крайса
 Толсь якстерь щёканзон уфай.
 Эрь, ёткстонк мук ухань  аф шнай!
 Мук ризфу ломань мороть  гайфса!
 Волнанзон ляйнясь, содай, 
арфты.
Шинь цильфса панчфкятне   крфайхть.
 Сей ёжу мешкятне 
лийкстайхть
И медня мархта меки
шарфтыхть.
  Вов акша келуть парьхцинь  щамонц
 Стай золотса шинь
сюролдась,
Тя, мярьгат, стирь 
нарядонц щась
И учи кельгом цёрать 
саманц.
Ся койть аш кода эздон нельгомс:
 Аф эряскодан цебярть шнамс.
 Но кода тейть аф  сюконямс,
 Тонь кода, крайнязе,
аф кельгомс!
Минь ёткстонк ламоц 
югу якай.
Мзярда меки куду сайхть,
Природанц эса  яла шнайхть,
 Инь мазы васткясь бта
 тяка.
Тянь видексшиц, пожалай,  стама:
 Лияннеть тонадоме  шнама.
Вов сянкса азолень пчкяль
 Ня ломаттненди
  стама мяль:
Тинь югу ёратада тяста.
Да, ули цебярец ся крайть.
А кальдяфт ли эсь перьфканк васттне?
 Вов сявомс хоть тя Парьхця ляйть!
 

14.02.2019 №6
 
 
 

 
НОВОСТИ
 
 
 
 
 
 

Од ломаттненди азонтфоль РФ-нь Конституциять колга

12 декабрьста Мордовия Республикань Государственнай Собранияса ётась пуромкс, кона лемтьфоль Российскяй Федерациянь Конституциять шинцты. Госсобранияв сашендсть Саранск ошень 23№ гимназиянь и Рузаевкань 9№ школань тонафнихне. Тяса теест ётафтфоль экскурсия зданиять эзга, няфтьфоль Госсобраниянь музейсь, азонтфоль закононь нолни органть работанц колга. Тяда меле школьникне пуромкшнесть Оцю залса, коса синь мархтост васетькшнесь МР-нь Госсобраниять Председателец, «Единая Россия» партиять Мордовскяй региональнай отделениянц Секретарец В.В.Чибиркин. Владимир Васильевич пачфтсь од ломаттненди кода и мезенди примафоль Конституциясь, азондсь республикаса властень системать колга.

—Странаньконь фкя инь васенце законоц—Конституциясь примафоль аф тёждя пингста синцень странань эряйхнень мяльснон коряс,—азозе В.В.Чибиркин.—Эсонза кемокстафт ломанть праванза и воляшинза.

 

Российскяй Федерациянь Конституциясь примафоль 1993 кизоня. Тядде теенза топодсь 25 киза.

 

В.В.Чибиркин кошардозень од ломаттнень улемс эсь странань афкуксонь гражданинкс, кельгомс шачема масторснон. Тинь эздонт, мярьгсь Владимир Васильевич, ащи Россиять сай пингоц.

 

Сяда тов Российскяй Федерациянь Конституциять колга лекция школань тонафнихненди лувсь «Молодая гвардия «Единой России» ВОО-ть МРО-ц вятиенц тевонзон тиендисна И.А.Заугольнов.

 

О.ЕВДОКИМОВА.

 

 

 

13.12.2019
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин