Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

СТИРЕНЬ РИЗФ

Ну кодама тя эряф, кодама эряф! Цёрада перьфпяле пяшксе, а седи панжемс, рьвакс лисемс аш кинди. Эстейне кунара кемгафксувода вельф ни. Аран ваномать инголи, ванан эсь лангозон—сембозе бта вастова. Аф вельф сериян, афи сяшкава алнянян. Аф мокорнякс эчкан, аф олгонякс шуванян. Шалхкозевок аф пяште, аф тулоня лаца, а стандартнай. Сельмоне хуш и кода шарынят, а няихть мянь кати-коза. Щафан-каряфан моднайста. Пади, кие-кие щамонь-мезень сатома аф машты, а мон ламос утцемазень аф кельгса. Аньцек кульса, кона магазину мезе усксть—тосан ни. Ши-шишка нюрьксян очередьса, но мезе тейне эряви—сатса-рамаса. Ваность ва: юбказе од фасононне. Туфляне Прагаса стафт, кофтазе—Парижса. Ваномати ванан—эсь мялезон пара. Стирсь хуш аф однятнень эздан, но аф мекольце сортоннян. Работан управленияса. Тевса аф ляткшнихнень эздан. Да аф павазуван. Аф ся тяштть ала шачень, улема. Вов ялгазе—Люля лемоц—шамас-пондс аф кал аф пал, а мирдец—баяр аля. Автомобильса арнефтьсы. Банявга усксесы, базарувок...
 
Валена ялгазевок аф кодама кралясь. Аф мондедон цебярь. Трванза эчкт, бта розень кши печфт. Якай Валена пялес удозь. А пиже тюсонь сельмомаренза бта шяйтання мархтот. Сонць, афпаркссь, танецка-куване аф якай, а цёрань васькафтома машты, мярьгат, тяфтамкс и шачсь. Автобусса ардомста пезфтасы пиже сельмованфонц кодамовок цёра лангс и аф аерфтсы тонанц прянц шаракодомс. Улема, сельмаванянзон эса гипноз. Сяльде ни цёрась мельганза пиксокс таргави. Коза Валена, тоза цёрась. Ветексть ни шельмась лисендсь рьвакс. Тяни аноклай котоце свадьбанцты...
 
 А мон тнярс ськамонан. Ялгакска аш кинь тиендемс стирнятнень эзда. Сятненди кизода кемгафксувоть перьф. Цёратневок общежитиясонк стама пингоннет. Ётксост прязень маряса щакакс. Аф кинос мархтост молемс, аф кодамовок илас-гульбас. Хуш килькшс пря тонк.
 
А минцень управлениястонк алятнень, цёратнень лангс аф сай ваномазе. Вона кабинетса каршезон телефонть ваксс озаф Жучкин. Кизу ни, а шава пря. Эсонза аньцек коня, да туста равжа гриват. Сяконь содай—кагодонзон сюволяй. А пингонь-пингонь кодак лаподьсы валонц—хуш стяда ащек, хуш кунф тескафтт. Нона шитнень тейне мярьгсь:
 
—Аш мяльце рамамс финтрикат? Маластонь промтоварнайса мишендевихть. Очередь инксост.
—А сят месть стапне—финтрикатне?—кизефнян.
—Финтрикатнень аф содасайть?—Жучкин варжакстсь лангозон эсь равжа и туста сельмокабанзон алда наругазь.
 
Конешна, монь содамошине аф соннетнень коряс лафчт. Кда мяленте, луван лекция атомть ядранц квалма, азондса, кода тиендевихть сюрьхцемнятне, латинскяй кяльстонга содан валхт. А «финтрикать» нинге ашине куленде. И тяни Жучкин, улема, кармай кичкоряма, мес аф содаса, мезе стамсь финтрикась. А, пади, сон кенжень архтома, али стиренди эрявикс лия кодамовок парши?
 
Кабинетста лисень апак каштортт бта лия тевонкса, а монць керыне маластонь промтоварнаи. Тяса ломаньда афкукс пяшксе. И сембе ават. Кажнайть мялец сатомс стама парши... Арань очередть пулос. Учсян. Кодамот финтрикатне? Мезенди синь эрявихть? Аф содаса. А кизефтемс киньге—аф смендан. Тняра ава инксост ащи! Сталботь, паршись эрявикс. Стяян пильгосурня лангс, кеподьса нярезень, а тоса, инголе, аньцек авань прят—архнеф шяярьхть. Ламос нюрьксень очередьса. А мзярда маладонь мишендити, няине—сон явонды алянь майкат да трусат. Аватне сявондихть мирдьснонды. А тейне синь мезенди! Шяень эзост. Абон аньцек пингозень ащине. Аф пара тумс шавонь кятть. И мишендить сетьмоняста кизефтине:
—А финтрикат улихть? Ся няфтсь майкань-трусань мархненди, мярьгсь:
 —А вагот синь—финтрикатне. Финскяй трико. Кирьфтафста—финтрико.
 
Толомсь шамазе. Валозе аф азови. Тяшкава васькафтомань афпаркс Жучкинць. Шамавок эсонза аш. Аньцек коня да равжа шяярьхть. Да салу кялец. Молян—тюхадян шамазонза!
 
Жучкинонь маласа шрать ваксс озаф Кошкин. Сон алясь бта ничаво. Сереска сери, лафтуска кели. Аньцек пекоц кода очка. Кошкин корхтафкшу. Сельмонза пиндолдыхть. Бта вайса ватьфт. Ёжуста ванондыхть юбкаса щафнень мельге. Аньцек рузава рьвац кенже ала кирдьсы Кошкинонь. Кержи шири алясь аськолкс аф аськолдави.
 
Конторасонк ули семьянц мархта явф алявок—Симакин. Аньцек ся Симакинць—симида. А стамть эзда кодама толк? Мамафста сон—аф бе, аф ме.
А Купряшкин—од цёра. Монь кизосон. Аньцек аф надёжнай. Вдь тейне эряви стама, кона сяволемань мархтонза эряфонь кувака-кувака киге.
 
А Купряшкин, кда и сявсамань, кадсамань васенце ляйнять туркс ётамстокиге.
 
Варжаксни лангозон Булавкин. Шалхкалонза туста усат. А зарплатац моннеть коряска ёмланя. Ся кодама мирде ули! Пара, кда мирдце ярмаку.
 
И вообще... Аф аньцек минь управлениясонк, а сембе ошса, няйф, аш стама аля, кона тейне ладяль седис-ёньц. А, пади, туян тя ошста лияс? Тя—мяль! Туян—коза няихть сельмоне.           
                                                                                                                                Михаил МОИСЕЕВ.
 

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022