Поиск по сайту: 
 

Архив
 сентябрь 
 2020 
пн вт ср чт пт сб вс
 123456
78910111213
14151617181920
21222324252627
282930    

 
 

 

Люди и дела

МОРДОВИЯСА ШКОЛАНЬ ИНЬ ОД ДИРЕКТОРСЬ РАБОТАЙ РУЗАЕВСКЯЙ РАЙОНЦА

Тяни сон вятьсы 33 ломаньцта ащи школьнай коллективть и ваны 114 ученикть тонафтомаснон-воспитандамаснон мельге.
 
Д.В.Учватова шачсь-кассь Рузаевскяй райононь Левжа велеса мокшень семьяса. Сай пингонь профессиянц кочкамста стирсь тусь тядянц, Наталья Яковлевнань киге, кона лама киза ни вятьсыне велень школаса мокшень кялень урокнень. Аляц, Виктор Николаевич, трудендай Рузаевка ошса электромонтеркс. Школаса тонафнемста Даша ульсь отькорь шабакс. Сатнесь цебярь сатфкст тонафнемаса, примсесь участия аф фкя лацонь мероприятиятнень, конкурснень эса. Тяда башка, стирнясь морсекшнесь идень «Пайгонят» фольклорнай коллективса. Школада меле Дарья Учватовась поступась тонафнема Н.П.Огаревонь лемса Мордовскяй государственнай университетонь филологическяй факультетонь финно-угорскяй отделенияв. Тясовок стирсь ульсь, кода корхнихть, активисткакс, сембоса сафнезе, сембе вастова кенерькшнесь. Колма кизот ульсь факультетонь студенческяй советонь председателькс. 2011 кизоня лиссь сяськикс «Студент года» конкурсса. Тяка жа кизоня Учватовась примась участия «Звезда Севера-2011» финно-угорскяй народонь стирьхнень еткса мазышинь Международнай конкурсса, коса лиссь сяськикс «Голос Севера» номинацияса. Университетть Дарья шумордазе якстерь дипломса, а меле поступась аспирантурав. Тяка пингть касфнезень содамошинзон МГУ-нь юридическяй факультетса.
 
2014 кизоня Д.В.Учватовась сась работама Приреченскяй средняй школав, коса кармась тонафтомост шабатнень мокшень кяльти. Тянивок, улемок школань директоркс, Дарья Викторовна стаки вяти родной кяльть коряс урокт, коза шабатне фалу сашендыхть пара мяльса. Тя и шарьхкотьф, вдь занятиятнень Учватовась етафнесыне эсь лацоннекс, эрь мезне вешенди и нолни тевс мезень-мезень одня, штоба тиемс урокть интереснайкс, а азфть—тёждяста шарьхкодевикс. Шабатне оцю мяльса тонафнесазь мокшэрзянь культурать, койхнень-обуцятнень, нльне, аф ваномок сянь лангс, што ламошкасна национальностьс коре руст. Кельгсазь и мокшень моротнень, конатнень, эряви азомс, Дарья Викторовна морсесыне сонць.
 
Тяфта лиссь, што меля савсь вешемс школати од вяти. 10 сентябрьста Д.В.Учватовась официальнайста арась тя должностти. Тяни комсь сисем кизоса стирть лафтувонзон лангса оцюдонга оцю ответственность. Дарья Викторовна виденцясь: работац стака, веши лама пинге и вий, но тя сонь аф эвфнесы. Од директорть оцюфт планонза, надияфни, што школьнай зданиясь, кона строяфоль 1974 кизоня, арай содамошинь тяниень пингонь кудкс. Школать учендсазь оцю полафткст. «Одкстоптома веши материально-техническяй базась, штоба шабатне получсельхть содамошит цебярь условияса,—азозе Дарья Владимировна.—Стане жа лама работама тонафнемань процессть цебярьгофтоманц лангса».
 
Оцю надиямат директорсь путни педагогическяй коллективть лангс. Арьсефть пяшкодемаса педагокне директорть васенце лездыенза. Работай ялганза корхтайхть—Дарья Викторовна вешфксу, видешинь кельги, лац содасы эсь тевонц и эрьгав. Мзярда кепотьфоль кизефкссь директоронь должностти путоманц колга, Учватовать инкса вайгяльснон максозь сембе тонафтыхне.—Дарья Викторовна афкукс эсь вастсонза. Сон кельгсыне шабатнень, седиец палы школать инкса. Вов тяфтамокс, койсон, эряви улемс директорти. Теенза ламось вийс коре,—мярьгсь учебно-воспитательнай работать коряс директорть заместителец Л.В.Червякова.
 
Эсь ширденк мяленьке азомс: «Удалаза кице, од директор! Катк сембе арьсефце пяшкодеви!»
 
                                                                                                                                  О.ЕВДОКИМОВА.
 

21.02.2019 №7
 
 
 

 
НОВОСТИ

КАСОМАНЬ И ВИИЯМАНЬ КИГЕ

25.09.2020
 
 
 
 

ТЯЧИ—МИНЬ ШАЧЕМА ШИНЬКЕ!

24.09.2020  № 37
 
 
 
 

ТЯФТАМА ВАСЬФНЕМАТНЕ ЭЖНЕСАЗЬ ВАЙМОТЬ

Ётась «Волга–река мира» Международнай этнокультурнай XIX-це фестивальсь-экспедициясь

 

 

Арась эсь лацонь койкс эрь кизоня етафнемс Поволжьянь ошнень эзга «Волга–река мира. Диалог культур волжских народов»  этнокультурнай фестивальть-экспедициять. Тядде международнай тя форумсь пуроптфоль кевейхксыецеда. Кода фалу сонь работасонза примасть участия региональнай властень, национально-культурнай общественнай организациянь представительхть, содаф ученайхть, артистт, писательхть, журналистт, конат сашендсть Россиянь 14 регионцта. Сембоц пуромкшнесь 80 ломань. Фестивальсь арась теест васедема, инь пичефтить-таколфтыть колга седикс-ваймокс корхнема вастокс. Ваномс кепотьфоль лама оржа кизефкс, конат, васендакиге, сотфтольхть национальнай культурать, кяльхнень ванфтомаснон мархта. Якстерь сюре кикс таргавсь фестивалень программать эса военнай тематикась, вдь тядде минь васьфтеськ Великай Победать 75 кизонц.

 

18.09.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин