Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Письма из села

СОН АРУ И ВИДЕ ВАЙМОЛЬ, ЛОМАНЕНЬ ИНКСА ПИЧЕДИЕЛЬ

Таргасы бабазе кептерть ляй трвати, а кептерьса бзмолф—шуварбект, серьгонят, ватракшт. А мон эрязста фатнесайне (кядне трнатыхть, пелян эздост, но пря аф няфтян—рахасамазь), бидонняв марасайне и лад мялезон, мзяра кал кундаме. А коза лядсь лову, щёкань пиди якшам мархта тялонясь? Лятфтаса, стяян шобдава, а бабазе кошардсамань: ватта, ватта, кодама мазы сёрманят Якшам атясь вальмя клянцекненди тись! И афкукс, ванат и аф топодят тя мазышить эзда: акшеса лешаф лопанятне, тишенятне, кузонь тараткятне мяльхнень-арьсематнень вятьсазь тялонь ёфксс. А весть шобдава сргоземе альняказень мархта, кудса сетьме. Тядяньке и аляньке тя пингс фалу покодема тушендыхть, а коса, шта, бабаньке? Лаподеме вальмяти и мезе няйхтяма: ульцяса вальмять каршеса, бта мокшень    баяравакс ащи ловонь баба, ломанень серьшкаса, прокс велеряйкс щаф-наряжаф. Мзяра ульсь кенярдемада!  
 
А кодама танцтикс ульсь бабазень кядьса пидеф-паньф ярхцамбяльсь! Сатама альняказень мархта школаста, а бабазе учи эсонк, нльне сонцьке самозонк аф ярхцай. Таргасы пянакудста саразста пидеф капста мархта лямть, сембода цебярь сивольбакшть тейнек явсы. Коршатама, аньцек пиленьке тярихть. А кодама удалафтольхть бабазень пачанза, ламбама цюкорнянза, ямкс мархта модамарень пяряканза, кяльцень нильсак! Вов сон кодама павазу идькс пингсь!
2013 кизоня Шкайсь сявозе бабазень эсь ширезонза. Тяни аш шиса кельги седи и ляпе вайме родной ломанезе. Калмамстонза аф содаса мезенкса сяда пяк авардень и ризнань, мес вестьке оду аф няйса тейне пяк мала ломанезень, а пади, мес сязевсь-колавсь соткссь идькс пингозень мархта. Инголи саян куду, ашкодса-паласа бабазень, пштедян теенза и тага прязень маряса стамка ёмла стирнякс. Вов сон, вакссон—монь идькс пингозе.
 
Татьяна Ивановна Циликина (стирень фамилияц—Спирина) шачсь 1933 кизоня Рыбкинскяй райононь (тяни Краснослободскяй) Зайця велеса, оцю мокшень семьяса колмоцекс шабакс. Бабазе кельгозе лятфнеманц идькс пингонц колга. Азонкшнесь кодамотольхть инголи идень налхкшне, кода панда пряста курькснесь горнамаса (горнамась—тя тяниень пингонь ледянкатне, а инголи шабатне синць эстеест тиендсть тракс наземста озамат, конатнень валондозь ведьса, эендафнезь). Бабазень и монь ётксонк аньцек 48 киза, а конашкава полафтсь эряфсь!
 
Нинге лятфнезе, кода аф пяк мяль вельде якась школав, сяс мес теенза стакаста макссевсь рузонь кяльсь. Кода прянь шнафтозь Москуста саф щенянц инголе кайгиста лувондозе Л.Н.Толстоень «Кавказский пленник» произведениянц. Сон, ваномок книгав и кирдемок сонь алубрят, бта морафтсь—лятфнезе мезень колга ульсь корхтамась урокса и виде ваймот меки-васу азонкшнезень геройхнень Жилинонь и Костылинонь лемснон. Тя васькафнемать инкса щеняц лазозе сонь горнаманц, конань сон тиендезе-эендафнезе недяляньберьф и кодама тя ульсь пичефкс идень седити.
 
Бабазе стаки куломозонза рузкс корхтама ашезь тонада, но конашкава сон кельгозе эсь шачема кяленц! Фалу дивандакшнень лангозонза, кода сон мушендсь мокшень лепт ся паршихненди, конат ингольдень пингонь эряфса ашельхть, кепотьксонди, стиральнай автомат машинать сон лемнезе—«муськи рьвянякс», магнитофонть—«морамакс», холодильникть—«кельмофнемакс», микроволновкать—«эждемакс». Ученайхне тапсесазь пряснон, кода рузонь валхненди мушендомс шарьхкодеви мокшень валхт, а монь грамотас аф содай бабазенди ёфси тя аф стакаль.
 
А нинге мезсь сядонга пяк дивандафнемань, кода бабазе, кодама тевс афоль фатя, кулелеть эздонза ладяф валхт-арьсемат, прибауткат.
 
Вов тяфта бабазе озафнесь нарвайхть. Алнятнень путсыне сифтемс. Пильгозонза сотсы нардамать и азсыне ня валхнень: «Улест авакшкат,  пакшпрянят, понав пильгонят.
Мзяра сифтемсон варяня, сняра алыяст алня!» и туй пирьфи.
Нарваень озафтомшовор корхтай:
«Мзярня алня, сняра  лефкскя!
 Юрхтатя, юрхтава—
ванондыть
Тяда-тонада, кальдяв
ломаньда,
Каволда, даволда, Коське кядь бабада, сире атяда.
 Атякшнень—печксемс
Покравонди,
Михалажинди, Авакшкятнень— пляманди».
 Вага сон мокшень фольклорсь! Прокс аф эряви тиендемс ичкоздень экспедицият, улеза аньцек смузю бабаце вакссот и телефонцот диктофон.
 
Лятфтаса, кода бабазе азонкшнесь войнань и войнань мельдень стака пинкнень колга. Эрь кудти путфоль план, кодамс ветенц (а кинь ули виец и сяда ламонь) учань понаста цюлкат и косьфтамс кяскавнянь модамарь душматтнень каршес тюри солдаттнень лемс. Сидеста лятфнезе, кода сашендовсь ярхцсемс марожень кшида и наксада модамарьда, кулемс авардемат-ольксемат шавф мала ломаненкса.
 
17 кизоса бабазень прважазь кудста работама, торфонь таргама. Тага ульсь путф план эрь кудти—фкя ломань. Лятфнезе, кодама стака и пелькс ульсь кадомс шачема кудть и тумс ичкоздень васту, аф содаф ломань ёткс.
 
Азонкшнезе, кода 18 кизоса лиссь рьвакс и шачфтсь вете итть. Кода 36 кизоса ни лядсь мирдьфтома вете шаба мархта (атязе кулось апак учсек). Тейне, кода кафта ёмла идь мархта аванди, конанди стане жа 36 киза, пелькс арьсемска тянь колга. А мезе няйсь и кода марязе прянц тя стака пингоня бабазе? Тяда меле сонь пяк лафчемсь шумбрашиц, педсь тевлавонь пелькс урма. Сонь путозь Краснослободскяень больницяв. Шкайсь лездсь, вчек ся пингоня больницяв сафоль Саранскяйста профессор. Бабазень акляц, Маря баба, ульсь смузюкс и отькорькс, сон кочказень ветицьке шабатнень, озафтозень крандазс и алашаса ускозень Краснослободскяень больницяв, самай тя профессорть инголи сувафтозень и мярьгсь: вага ня шабатне лядыхть урозкс, кда аф лездомс синь сяряди тядяснонды. Профессорть, улема, токавсь седиец шабатнень лангс ваномста. Бабазень сяка шиня сявозь самолетса  Саранскяень республиканскяй больницяв, коса сонь пчкафтозь и путозь пильге лангс. Стакаста сярядемда меле бабазе анцесь Шкайть кядьста нинге вете кизонят шабанзон касфтоманкса, а Шкабавазсь бславазе эрямс шумбрашиса кафксогемонь кизоти молемс.
 
Сембе сяка, аф ваномок бабазень стака эряфонц лангс, мон мярьголень, сон ульсь павазу ломанькс. Ашезень нолне кядензон, маштсь ськамонза идензон трямост-кеподемост, касфтсь эздост афкуксонь ломатть.
Бабазе эрязе эряфонц питни щамфтома, золотафтома и лия козяшифтома.
 
Афкуксонь козяшинц бабазе кадозе эсь шабанзон, уноконзон и уноконь идензон эса. Сяс мес сон ульсь ару и виде ваймокс, эряфонь кельгикс, сембе тевса маштыкс, ломанень инкса пичедикс.
                                                                                                                                             Т.ПЕТРОВА.

 

21.02.2019 №7
 
 
 

 
НОВОСТИ
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин