Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Наши мокшанские сыновья и дочери

ЭРЯФОНЦ ЛЕМДЕЗЕ ЖУРНАЛИСТИКАТИ

45 киза журналистсь Любимкин макссь национальнай печатть виияфтоманцты. Тняра киза редакциясь теенза ульсь омбоце родной кудкс, «Мокшень правдась»—омбоце тядякс. Трудонь кельгоманц вельде сатсь республикань    журналисттнень, писательхнень, лувихнень еткса оцю авторитет.
Лама киза национальнай печатьса седикс-ваймокс покодеманкса и общественнай оцю работань вятеманкса Данил Александрович казьф лама казнеса. Сон казьф Мордовскяй АССР-нь Верховнай Советонь Президиумть кафта, Мордовия Республикань Почетнай грамотасост, республикань Правительствать Почетнай грамотаса. Лама журналистскяй казнедонза. Кда сембонь тяштемс, аф тяльгихть газетань пяле полосас.
 
Д.А.Любимкин кунара ни пенсияса, ваймоси. Но, кода и инголи, журналистскяй ручканц аф кадондсы, кирди кеме соткст редакциять мархта. Минь надиятама, што сон пачфти редакциязонк нинге лама мялень салай статья, азкс, стих, лия материалхт. И аф эльбяттяма, кда азсаськ: тяконь учендсазь лувихневок.
 
А тячи макссаськ Данил Александровичень юмористическяй кафта азксонзон и стихонзон.
 
Ворбетлянь суркст
Недляшиня алясь арьсесь молемс дачав, таргамс модамарензон, урядамс нинге кой-кодама перень сёронзон. Састь машинаса рьванц мархта. Лиссь атя суседсна, кизефнесыне:
 —Мес исяк апак корхтак туде? Мон спасибавок ашень аза тейть.
—Мезенкса спасиба?— изь шарьхкоде алясь—Минь исяк дачав ашеме сашенда.
—Кода ашеде сашенда? Миртть-рьват модамарьхть таргаде.
—Кодама модамарьхть? Тага весть мярьган, исяк ашеме сашенда тяза.
—А мон арьсень тинь уледе. Ванан, кода фалу, халатса щафтада. Кядентень яфчасть тейне, кодак мархтонт шумбракстонь. А тумстонт, мзярда машинав озаде, тейне кяскав модамарь кадоде, аньцек ашень кенере маладомс, спасиба азомс.
 —Сембось шарьхкотьф,—мярьгсь дачазонза саф алясь, и рьванц мархта сувасть перезост. Тоса сембось урядафоль, нльне пурьхкятневок таргафтольхть.
Сусед атясь кальдявста няи и сяс лац-ряц ашезень няе ворбетлятнень. Сянкса азорхне шарьхкодезь, конашкава обжазь—салазь, мезе кизоньберьф эсь кядьса касфнесть. Сувасть куднязост. Тулоняв повфтафтольхть ташта щамсна. Авась валхтозе халатонц, ушедсь зепонзон варчсема. И мезе мярьктяда? Мусь тоста золотань кафта суркст. Эряскодомбачк юкстазь ворбетлятне.
 
Щукань серьгятькшни
Мзярда-бди атянь-атяньке кунцесть калхт афтомаса, бреднекса, нератаса. А тяни, няк, це! Кунцек ульмоняса, а кда афтомаса или нератаса кунцят—тон браконьерат. Мес тяфта, роди содаф. Кржа калда лядсь ляйхнень и эрьхкнень эса, прокс машфтовихть, кле, кда аф кардамс браконьерхнень.
 Сяс калонь ванфты инспекторхне (эздост кой-конат синцьке кунцихть калхт афтомаса) сяконь учт—кундатядязь тонценьге.
Весть фкя алясь сай эрьхке трвава, а лафтубрясонза нюрьгихть кафта оцю щукат.
Апак учсек эвондасть инголенза калонь ванфты кафта инспекторхт.
—Повоть, щеняй?!—кенярдезь азозь теенза.
—Щукат кунцят? Калонь плямать мяльце стожамс? Браконьеркс арать?
—Церат,—эняльгодсь алясь,—верондатада али аф, а ня щукатнень монць касфтыне…
—Кода тонць касфтыть?!—дивандасть сят.
—А вов кода!—азондозе щукань кандысь.
—Панжине весть икра банканять, а тоса икрать потмоса кафта аф оцю щуканят. И мезе арьсетяда? Кармань щуканятнень банканяса аннемост, и синь ушедсть касома. Вастсна тесналгодсь, эста каянь сяканяс ведь, нолдайне тоза. Тосонга тесна кармась улема, нолдайне ваннав. Курок тостонга савсть таргамс. Нолдайне эрьхки. Няйсасть, конашкаста кассть!
—Афтомаса кундайть?
—Мезенди афтомаса карман кунцемост?!—аралась пря алясь.
—Мон сашендан андомост, кодак вяшкан—синць уихть тейне. Содасамазь. Эрьда теентьке няфтьса, кода кулхцондсамазь!
—Эрь ина, няфтьк!
Алясь маладсь эрьхкти, нолдазень щукатнень, сонць лихтсь сигарета, ушедсь курендама.
—Ну мезе, вяшк ина!—кошардозь инспекторхне.
—Мезенди?
—Щукатнень ярхцама серьгядить.
—Кодама щукат?—атказась алясь.—Мон синь афи содасайне.


21.02.2019 №7
 
 
 

 
НОВОСТИ
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин