Поиск по сайту: 
 

Архив
 март 
 2019 
пн вт ср чт пт сб вс
    123
45678910
11121314151617
18192021222324
25262728293031

 
 

 

Национальная тематика

КАТК ФАЛУ КАЙГИ РОДНОЙ ВАЛСЬ!

 «Кодама тон мазыят, минь родной кяленьке!» литературно-музыкальнай илать панжезе П.С.Кирилловонь лемса краеведческяй библиотекать заведующаец Н.М.Бояркина. Эсь выступлениясонза Нина Михайловна пачфтезе пуромфненди, што Родной кялень Международнай шись, конань арьсезе-кемокстазе 1999 кизоня Генеральнай конференциясонза ЮНЕСКО-сь, кеподезень-путозень фкя серьс миронь сембе кяльхнень. Но тя Международнай илать инь оцю задачац—юмси кяльхнень эреклафтомасна, ванфтомасна и виияфтомасна. Сяс мес эрь ковня мирса юмсихть кафта кяльхть. Сяс, кирдемок мяльса тя фактть, тейнек сембонди марстонь вийса эрявихть аф аньцек ванфтомс, но и виияфнемс мокшень и эрзянь кяльхнень, а мархтост и рузоннетьке, кона тяфта жа арась тейнек родной кялькс!
 
Сяда тов илас сафне кулхцондозь классикнень стихснон, конатнень лувозь мокшень, эрзянь, рузонь, английскяй, французскяй, немецкяй и испанскяй кяльса Н.М.Бояркина и библиотекать научнай сотрудницац Н.В.Тураева.
 
Эсь стихсонза илас пуромфнень кеняртьфтезень Россиянь Писателень союзонь членць, эрзянь содаф поэтсь Татьяна Мокшанова, а поладозь тя кеняртьфти койть эсь ёмла концертсост Саранск ошень 40№ школаса тонафнись Варвара Фомина и «Эдельвейс» группань певицась Кристина Бурмистрова. Синь мазыста моразь мокшень и эрзянь тя и кунардонь пингонь содаф моротнень, конатнень инкса зрительхне теест ламос цяпазь кядьснон.
 
«Кодама тон мазыят, минь родной кяленьке!» литературно-музыкальнай илати тёкшекс арась научнай докладсь, конань тиезе Н.В.Тураева. Эсонза сон азондсь пуромфненди мокшэрзянь васенце просветительть Авксентий Филиппович Юртовонь научно-духовнай подвигонц колга, конань сон тиезе эсь народонц лемс, сёрмадомок мокшэрзянь васенце букварьхнень. Именна синь коряваст мокшень и эрзянь  иттне нинге революцияда инголе ушедсть тонафнема сёрмадома и лувома эсь кяльсост. А.Ф.Юртов тяфта жа ульсь учителькс М.Е.Евсевьевонди, мокшэрзянь омбоце великай просветительти. И синь марса, тонафтомок эсь народснон лувомати и сёрмадомати, сувафтозь сонь Российскяй духовно-культурнай цивилизацияти.
 
 Литературно-музыкальнай илать аделазе эсь выступлениясонза ушеткшни поэтсь Иван Мокшанов, кона тонафни Саранск ошень 32№ школаса.
 
                                                                                                                                      В.НЕСТЕРОВ.
 

28.02.2019 №8
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин